11
აპრილიდღის ზოგადი ასტროლოგიური პროგნოზი
თავდაცვის მინისტრის მოადგილემ, ალექსი ბატიაშვილმა მისი დაკითხვის ოქმი არ დაადასტურა და ხელი არ მოაწერა. ამის შესახებ დაკითხვის შემდეგ ჟურნალისტებს ბატიაშვილის ადვოკატმა ლევან სამუშიამ განუცხადა.
როგორც სამუშია აცხადებს, დაკითხვა დარღვევებით წარიმართა. მისი თქმით, დაკითხვის დასრულების შემდეგ დაკითხვის ოქმში არ იყო ასახული ალექსი ბატიაშვილის პასუხები სრულად და არ იყო დაფიქსირებული ბატიაშვილის და მისი ადვოკატის პროტესტი.
"დაკითხვა წარიმართა საოცარი დარღვევებით, ვერც ვიფიქრებდი, რომ საქართველოს მთავარ პროკურატურაში მსგავსი რამ მოხდებოდა. დაკითხვის მიმდინარეობისას ალექსი ბატიაშვილი როდესაც სცემდა პასუხს, გამომძიებელ ფუტკარაძეს პასუხები არ მოსწონდა და ცდილობდა, რომ სხვა პასუხები მიეღო, რაზეც პროტესტი დავაფიქსირეთ და შესაბამისი პროტესტი იქნა ჩვენს თვალწინ ოქმში შეტანილი. როდესაც დაკითხვა დასრულდა, წარმოდგვიდგინეს ოქმები და საოცრება მოხდა. დაკითხვის ოქმში ალექსი ბატიაშვილის პასუხების უმრავლესობა არ იქნა ასახული ისე, როგორც იყო ნათქვამი, უმრავლესობა კი იქნა ამოღებული. პროტესტები არ იყო დაფიქსირებული", - აღნიშნა ადვოკატმა.
მისივე თქმით, მას შემდეგ, რაც მათ აღნიშნული დარღვევა გააპროტესტეს, გამომძიებელმა მეორე ოქმი წარუდგინა, სადაც პროტესტი იყო დაფიქსირებული, თუმცა, დაკითხვის პროცესი არ იყო სრულფასოვნად ასახული. სამუშიას თქმით, მათ ეს ოქმიც გააპროტესტეს და დაკითხვის ოქმში ასახულ ფაქტებს არ დაეთანხმნენ.
"ბატიაშვილმა განაცხადა, რომ არ იზიარებდა ასახულ ფაქტებს, შესაბამისად, ვერ დაადასტურებდა და აღნიშნულ ოქმზე ხელს ვერ მოაწერდა", - განაცხადა სამუშიამ.
კითხვაზე, იყო თუ არა ზეწოლა დაკითხვის დროს, სამუშიამ განაცხადა: "ზეწოლას ვერ გაგვიბედავდნენ, მაგრამ იყო შეფარული, ასე ვთქვათ, მცდელობა იმისა, რომ სასურველი პასუხები მიეღო გამომძიებელს".
ადვოკატმა აღნიშნა, რომ ალექსი ბატიაშვილი მზად არის, ნებისმიერ დროს გამოცხადდეს დაკითხვაზე და ითანამშრომლოს გამოძიებასთან.
თავდაცვის მინისტრის მოადგილეს დღეს 14.00 საათიდან კითხავდნენ. ალექსი ბატიაშვილმა პროკურატურა უკომენტაროდ დატოვა.
პროკურატურაში, დაკითხვაზე შესვლამდე კი ალექსი ბატიაშვილმა ჟურნალისტებთან საუბრისას "სილქნეტის" ფინანსურ დირექტორთან მისი ნათესაურო კავშირი დაადასტურა, თუმცა აღნიშნა, რომ ტენდერის დროს მასთან შეხება არ ჰქონია.
პროკურატურის ინფორმაციით, ალექსი ბატიაშვილი კომპანია "სილქნეტის" ფინანსური დირექტორის ახლო ნათესავია და საქმის მასალებში იკვეთება, რომ საქართველოს თავდაცვის სამინისტროსა და კომპანია "სილქნეტს" შორის გაფორმებულ ხელშეკრულებას ხელს აწერს სწორედ ბატიაშვილი.
თავდაცვის სამინისტროს შესყიდვების საქმეზე სამინისტროს ხუთი თანამშრომელია დაკავებული. თბილისის საქალაქო სასამართლომ ხუთივე დაკავებულს აღმკვეთი ღონისძიების სახით პატიმრობა შეუფარდა. საქმეს გრიფი "საიდუმლო" ადევს.
თავდაცვის სამინისტროს თანამდებობის პირებს კომპანია "სილქნეტის" სასარგებლოდ სახელმწიფო ბიუჯეტის კუთვნილი 4 102 872 ლარის გაფლანგვა ედებათ ბრალად.
