გიგი უგულავა - სულ რომ 5 შვილი ქუჩაში დამიტოვოთ, ბრძოლას ვაგრძელებ

სულ რომ 5 შვილი ქუჩაში დამიტოვოთ და რვავე ბრალდებაზე პატიმრობა შემიფარდოთ, ბრძოლას ვაგრძელებ, - ამის შესახებ თბილისის განვითარების ფონდის საქმეზე გიგი უგულავამ პროკურორების შუამდგომლობის პასუხად განაცხადა, რომლის მიხედვით, მას აღნიშნული საქმის ფარგლებში შეფარდებული გირაო პატიმრობით უნდა შეეცვალოს.

აღმკვეთი ღონისძიების დამძიმების მოტივად პროკურორებმა დღევანდელ სასამართლოზე დაასახელს ის გარემოება, რომ გიგი უგულავამ თბილისის განვითარების ფონდის საქმეზე შეფარდებული გირაოს შემდეგ, დაარღვია გირაოს პირობები, კერძოდ, ჩაიდინა ახალი დანაშაული. ახალ დანაშაულში, როგორც ნათია სონღულაშვილმა განაცხადა, იგულისხმება ახალი ბრალდება, რომლის საფუძველზეც გიგი უგულავა დააპატიმრეს.

"გირაოში ჩადებული ჩემი სიდედრის ბინის ჩამორთმევა უნდათ. ეს არის მართლმსაჯულების ზეიმი?! ჩემი ავადმყოფი სიმამრი ბრალდებულია და რუსთავში უწევთ სიარული, ჩემი ქვისლი გიორგი ღონიაშვილი დააპატიმრეს, მე კი აგერ ვარ. ჩემს სიდედრს ბინას ართმევენ. რაც არ უნდა ქნათ, თუნდაც სახლი ჩამომართვათ, სულ რომ 5 შვილი გარეთ დატოვოთ, რვავე ბრალდებაზე რომ შემიფარდოთ წინასწარი პატიმრობა, მნიშვნელობა არ აქვს, მე ბრძოლას ვაგრძელებ. თქვენ უკვე გადაკვეთეთ ღერძულა ხაზი და გახსენით ის ცეცხლი, რომელშიც თვითონ დაიწვებით", - მიმართა გიგი გულავამ შუამდგომლობის საპასუხოდ პროკურორებს.

მის ადვოკატებს ჯერჯერობით პოზიცია არ დაუფიქსირებიათ. პოზიციის ჩამოსაყალიბებლად მათ პროცესის გადადება ითხოვეს. შემდეგი პროცესი 14 ივლისს ჩაინიშნა, სადაც გახდება ცნობილი დაკმაყოფილდება თუ არა პროკურორების შუამდგომლობა გიგი უგულავასთვის თბილისის განვითარების ფონდის საქმეზე აღმკვეთი ღონისძიების დამძიმებასთან და მისი სიდედრის ბინის აღსრულებაში მიცემასთან დაკავშირებით.

"ინტერპრესნიუსი"