რუსეთმა მოქალაქეობის მიღება გაამარტივა
რუსეთის დუმამ მეორე და მესამე მოსმენით მიიღო კანონი რუსეთის მოქალაქეობის გამარტივებული წესით მინიჭებასთან დაკავშირებით იმ თანამემამულეებისთვის, რომლებიც თავისუფლად ფლობენ რუსულ ენას, - ამის შესახებ "რია ნოვოსტი" იუწყება.
ახალი კანონით უცხოეთის მოქალაქემ ან მოქალაქეობის არმქონე პირმა სპეციალურ კომისიაში უნდა გაიაროს გასაუბრება, რომელიც ადგენს, არის თუ არა უცხოელი რუსული ენის მცოდნე. ასეთ ადამიანად მიიჩნევა პირი, რომელიც ფლობს რუსულ ენას და ყოველდღიურად იყენებს მას ოჯახში და "კულტურულ სფეროში".
გასაუბრების გავლა შეუძლიათ ადამიანებს, რომლებიც თვითონ ან რომელთა ნათესავები პირდაპირი ხაზით ცხოვრობდნენ ან ცხოვრობენ ყოფილი საბჭოთა კავშირის ტერიტორიაზე ან რუსეთის იმპერიაში და თანამედროვე რუსეთის საზღვრებში. ეს ნიშნავს, რომ კანონპროექტი ყირიმსაც მოიცავს.
რუსეთის ფედერალური საემიგრაციო სამსახურის ხელმძღვანელის მოადგილის, ეკატერინა ეგოროვას განცხადებით, კომისია არ შეამოწმებს, რამდენად გრამატიკულად საუბრობს ესა თუ ის პირი, არამედ შეამოწმებს იმას, თუ რამდენად თავისუფლად ფლობს ენას და იყენებს თუ არა მას ყოველდღიურ ცხოვრებაში.
დოკუმენტში ჩაწერილია, რომ ასეთი ადამიანების კატეგორიამ რუსეთის მოქალაქეობის მიღების შემდეგ სხვა სახელმწიფოს მოქალაქეობაზე უარი უნდა განაცხადოს.