1
აპრილიდღის ზოგადი ასტროლოგიური პროგნოზი
თურქულმა მხარემ იშხნის ტაძრის რესტავრაციის დასრულების ვადა 2014 წლის მაისამდე გაახანგრძლივა, - ამის შესახებ კულტურული მემკვიდრეობის დაცვის ეროვნული სააგენტოს გენერალურმა დირექტორმა მერაბ ბოჭოიძემ განაცხადა.
საქართველოს კულტურის სამინისტროში იშხნის სარეაბილატაციო სამუშაოების მიმდინარეობის შესახებ მორიგი ანგარიშის პრეზენტაცია გაიმართა, რომელსაც კულტურის მინისტრი გურამ ოდიშარია და იშხანზე მე-5 ექსპედიციის მონაწილე პირები ესწრებოდნენ.
პრეზენტაციაზე ექსპედიციის წევრებმა, სპეციალისტებმა კმაყოფილება გამოთქვეს განხორციელებული სამუშაოების გამო.
როგორც მერაბ ბოჭოიძემ განაცხადა, სარესტავრაციო სამუშაოები იშხანზე მეთოდურად გამართულ ჩარჩოებში მიმდინარეობს. რესტავრაციის დროს თურქული მხარე გამოიყენებს ხარისხიან მასალას და ჩანს, რომ მუშა-ხელიც კვალიფიციურია.
მან ასევე აღნიშნა, რომ ტაძრის რესტავრაცია მიმდინარე წლის ბოლომდე უნდა დასრულებულიყო, თუმცა თურქულმა მხარემ ტაძრის სარესტავრაციო ვადა გაახანგრძლივა 2014 წლის მაისამდე და დამატებით თანხაც გამოიყო.
"სარესტავრაციო პროცესი სწორად მიმდინარეობს. რესტავრატორებს დამატებით დრო მიეცათ, მათ აქვთ დრო, რომ სარესტავრაციო სამუშაოები მაისამდე გააგრძელონ", - აღნიშნა მერაბ ბოჭოიძემ.
მისივე თქმით, მომავალი წლიდან შესაძლებელია, რესტავრაციები ჩაუტარონ ოშკსაც და სხვა ტაძრებსაც და თურქულ მხარესთან ასეთი თანამშრომლობა მისაღებია.
ამასთან, ქართული მხარე თურქულ მხარეს სარესტავრაციო სამუშაოების შესახებ რეკომენდაციებსაც გადაუგზავნის. რეკომდაციები ძირითადად მცირე შესწორებებს ითვალისწინებს, კერძოდ დასავლეთ ფასადზე, კარის თავზე მდებარე ღიობის ან სარკმლის ამოშენებას. ასევე, იშხანში იმ პერიოდში, როდესაც მეჩეთი ფუნქციონირებდა, ერთ-ერთ სამხრეთ კედელზე გაკეთდა ორი ღიობი, რომელსაც ასევე ამოშენება სჭირდება. ტაძრის ტერიტორიაზე არქეოლოგიური სამუშაოები შეჩერებულია და ძირითადად მიმდინარეობს გადახურვის სამუშაოები. ამ მომენტისათვის ხდება აღმოსავლეთ კონქის გადაყვანა და თითქმის გადახურულია დასავლეთის, სამხრეთისა და ჩრდილოეთის მკლავები. სპეციალისტები აცხადებენ, რომ იშხანს დანგრევა არ ემუქრება, ასეთი საფრთხის აღარ არსებობს.
საქართველოს კულტურის მინისტრმა გურამ ოდიშარიამ პრეზენტაციაზე ხაზი გაუსვა, რომ 27-29 ოქტომბერს ამ საკითხებზე სტამბოლში გაემგზავრება დელეგაცია, რომელშიც თვითონაც მიიღებს მონაწილეობას.
