14
აპრილიდღის ზოგადი ასტროლოგიური პროგნოზი
მსახიობი ბასა ხარაზი მაყურებელმა სერიალიდან "ჩემი ცოლის დაქალები" გაიცნო. ბასა სერიალში არატრადიციული ორიენტაციის მქონე თორნიკე იოსელიანის როლს ასრულებს. ქართულ შოუბიზნესში ბასას წლებია იცნობენ, მას არაერთი კლიპი აქვს გადაღებული, წარსულში ბასა კლუბებში მიქსავდა კიდეც.
- კინოსა და დრამის სამსახიობო ფაკულტეტი დავამთავრე, მეორადი პროფესიაა მასობრივი სანახაობების რეჟისორი. გადაღებული მაქვს არაერთი კლიპი, მაგრამ ახლა ამ კუთხით აღარ ვმუშაობ. თეატრალური უნივერსიტეტის დამთავრებისთანავე ჯერ მოსკოვში წავედი, მერე ვილნიუსში, იქ დავამთავრე მაგისტრატურა და ლიტვის რუსულ თეატრში ვთამაშობდი. დიდი სურვილი მაქვს ისევ გადავიღო კლიპები, მაგრამ დღეს ეს არავის სჭირდება. საქართველოში ან პატარა ქვეყნის სინდრომი მუშაობს, სადაც კლიპი მხოლოდ სოციალური მდგომარეობის წარმოსაჩენად კეთდება, ან უბრალოდ ამის ბაზარი არ არსებობს. ბევრჯერ ჩემთვის უინტერესო სიმღერაზე უთხოვიათ კლიპის გადაღება, მაგრამ უარი მითქვამს. როცა მუსიკა არ მომწონს, ფანტაზიას უნდა "ვეჯაჯგურო". ყოფილა შემთხვევები, როცა საჩუქრად გადამიღია კლიპი.
- ვიცით, რომ კლუბური ცხოვრების მოყვარული ხართ...
- ადრე დიჯეინგით ვიყავი დაკავებული, ახლა აღარ მაინტერესებს. ლეპტოპის ქონა არ ნიშნავს, რომ დიჯეი ხარ. დიჯეინგი მარტო მუსიკის გაშვება არ არის. მე უფრო ძველი სკოლის წარმომადგენელი ვარ, როცა მუსიკა ფასობდა.
- სერიალში როგორ მოხვდით?
- ბევრმა ადამიანმა თქვა, რომ "ჩემი ცოლის დაქალები" არ ჰგავს საპნის ოპერას და ამიტომ დავინტერესდი. ვერც ვიფიქრებდი, თუ სერიალში მოვხვდებოდი. არც ის ადამიანი ვარ, რომელიც კასტინგებით ცხოვრობს. ახლობელმა მითხრა, გეის როლის შემსრულებელს ეძებენ, მიდი და აგიხსნიან რა სჭირდებათო. არადა, ბევრმა სწორედ იმის გამო თქვა უარი ამ როლზე, რომ გეი უნდა განესახიერებინა. მე მსახიობი ვარ და ნებისმიერი როლით ვინტერესდები.
- ალბათ ანაზღაურებამაც მოგხიბლათ?..
- მე ჯგუფმა მომხიბლა, რომელიც პროფესიონალებით არის დაკომპლექტებული. იქ ყოველდღე რაღაც სიახლეს ეძებენ. გმირიც საინტერესოა, თუნდაც იმიტომ, როგორ მიიღებდა მას ქართული საზოგადოება. ჩემი პერსონაჟის ორიენტაცია შუალედურ ფილმში გაირკვა, "ჩემი ცოლის დაქალის ქორწილის" პრემიერაზე დარბაზში სიცილი რომ გაისმა, მივხვდი - ხალხმა კარგად აღიქვა ეს პერსონაჟი. ალბათ იმიტომ, რომ მე არ ვარ ამაზრზენი და გამაღიზიანებელი გმირი.
- 17 მაისის აქციის შემდეგ საზოგადოების ნაწილმა არაერთხელ დაგადანაშაულათ არატრადიციული ორიენტაციის პროპაგანდაში...
- ყველამ იცის, რომ ნებისმიერ სფეროში შეიძლება იყოს მსგავსი ორიენტაციის ადამიანი. ბევრი მეგობარი მყავს, მაგრამ არ მაინტერესებს მათი პირადი ცხოვრება, როცა შინ შედიან. თუ ვინმეს რამე რჩევა დასჭირდება ჩემგან - კი ბატონო, გვერდით დავუდგები. სანამ 17 მაისის მოვლენები მოხდებოდა, ერთ-ერთ მაღაზიაში ვიყავი და შუახნის ქალბატონმა ლამის მიწაში ჩამდო, ისეთი შეურაცხყოფა მომაყენა. 17 მაისის მოვლენების შემდეგ ყველა მირეკავდა და მეუბნებოდა: გთხოვ, ქუჩაში არ გამოხვიდეო. საწყენია, როცა მსახიობს პერსონაჟთან აიგივებენ. ფილმის გარეთ ყველას ჩვენი ცხოვრება გვაქვს. როგორც მე არ ვერევი სხვის ცხოვრებაში, ისე არ უნდა ჩაერიოს სხვა. ვის რა ფერის საცვალი აცვია, ეს მხოლოდ მისი პირადი საქმეა.
- რამდენ ხანს არ გამოდიოდით ქუჩაში?
- იმ დღესვე გამოვედი გარეთ. ვხედავდი, ხალხი აგრესიულად მიყურებდა. პატარა ბიჭებმა მომაძახეს რაღაცები - "ლგტბ" გინებასავით აღიქმება საქართველოში. დარწმუნებული ვარ, იმ დღეს გამოსული ადამიანების 90% ბიბლიას მხოლოდ მტვრის გადაწმენდისას თუ შეხებია და არც წაუკითხავს...
- ცხოვრებაშიც ირონიული ხართ ისეთი გოგონების მიმართ, როგორებიც შენს ოფისში დასაქმებულები არიან?
- ნებისმიერი ადამიანი შეხედავს ასე. იქ აქცენტია რელიგიაზე, რომ ამბობენ, ზღვაზე მონათლული ბავშვი მიგვყავსო, ვითომ მოუნათლავი ეგრევე დაიწვება მზეზე? დღეს ჩემმა მეგობარმა მითხრა, ბათუმის ერთ-ერთ რესტორანში სამმა გოგონამ იკითხა, ქლაბ-სენდვიჩი ან რამე სხვა სამარხვო გაქვთო? ამაზე ბევრი ვიცინე...
თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
