მნიშვნელოვანი ინფორმაცია
4
მაისიდღის ზოგადი ასტროლოგიური პროგნოზი
კვირა, მთვარის მერვე დღე დაიწყება 11:21-ზე, მთვარე ლომშია
ახალი საქმეების დასაწყებად ნეიტრალური დღეა. დიდ დროსა და ენერგიას ითხოვს ადრე დაწყებული საქმეები. მნიშვნელოვანი გადაწყვეტილებების მიღება სხვა დღისთვის გადადეთ. კარგი დღეა უძრავ ქონებასთან დაკავშირებული საქმეების მოსაგვარებლად. კარგია მივლინების, მოგზაურობის დასაწყებად. ხშირად იმოძრავეთ, გადააადგილეთ ავეჯი, განაახლეთ ინტერიერი. სხვა დღისთვის გადადეთ ქორწინება და ნიშნობა. მოერიდეთ კუჭის გადატვირთვას, მოწევას, სმას. უმჯობესდება ფსიქოემოციური ფონი. ადამიანი უფრო ხალისიანი ხდება. კარგად გამოიძინეთ, მიიღეთ მზის აბაზანები და დიდხანს ისეირნეთ.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
ქობულეთში რუსი დამსვენებლები მომრავლდნენ
23:03 / 29-07-2013
"ბოლო ორი კვირაა, დამსვენებლების რაოდენობამ ერთიორად იმატა. თითქმის ყოველდღე მაქვს მარშრუტი. ღამის რეისიც შემომთავაზეს, მაგრამ უარი ვუთხარი. რამდენიმე წლის წინ საჭესთან ჩამეძინა და კინაღამ თავიც დავიღუპე და სხვებიც დავღუპე. გვერდით ახალგაზრდა ბიჭი მეჯდა და იმან სტაცა საჭეს ხელი... მადლობა უფალს, გადავრჩით და მაშინ დავიფიცე, - ეს ბოლოა, ორ რეისს არასდროს გავაკეთებ-მეთქი", - მიყვება მიკროავტობუსის მძღოლი. მგზავრები გაცხარებით საუბრობენ ამინდზე: "ეს ერთადერთი მარშრუტია, სადაც პოლიტიკის გამო არ ხოცავენ ერთმანეთს, თუმცა შიგადაშიგ, ერთი-ორი ინტრიგანი მაინც გამოერევა", - ღიმილით ამბობს მძღოლი... ცოტაც და... გამარჯობა, მზიანო აჭარავ!..
ადგილობრივთა თქმით, ტურისტების მისაღებად სტარტი უკვე აიღეს. შევეცადე გამერკვია, რა შეიცვალა ჩვეულებრივი ადამიანებისთვის ახალი ხელისუფლების მოსვლის შემდეგ და რას ელოდებიან ისინი ამ მთავრობისა და მიმდინარე სეზონისგან...
მარიკა, 43 წლის:
- ზღვასთან საკმაოდ ახლოს ვცხოვრობ. ოჯახური სასტუმრო მაქვს, მაგრამ რადგან კეთილმოწყობილი არ მქონდა, ყოველწლიურად 4-5 ოჯახზე მეტს ვერ ვიღებდი... 2007 წლის ბოლოს ავიღეთ კრედიტი, სახლი გავარემონტეთ, მოვუმატეთ და... ომიც დაიწყო... ერთი სიტყვით, ის სეზონიც ჩაგვივარდა და მომდევნოც. დავრჩით რამდენიმეათასიანი ბანკის ვალის პირისპირ. ვერავის სთხოვდი ფულს, რადგან გარშემო ყველა ჩვენს დღეში იყო. ბანკი სესხის დაბრუნებას ითხოვდა და სახლის დაკარგვის საფრთხის წინაშე ვიდექით. მეუღლეს ნერვიულობის ნიადაგზე "შაქარი" დაემართა... ვისთანაც კი ხელი მიგვიწვდებოდა, ყველას ვთხოვეთ დახმარება და ასე ტანჯვით მოვედით აქამდე.
- ახლა რა შეიცვალა?
- ამბობენ, სესხებს გადაგვივადებენ და ნაწილ-ნაწილ დაფარვის საშუალებას მოგვცემენ. ეს ძალიან დიდი შეღავათი იქნება. სპეციალური კომისია შეიქმნა, რომელიც ჩვენს პრობლემებს სწავლობს და დარჩენილ თანხას იმის მიხედვით დავფარავთ, თუ როგორია ჩვენი ოჯახის მატერიალური მდგომარეობა და შემოსავალი. თუმცა ჯერჯერობით არ ვიცით, სესხი როგორ გადანაწილდება, მაგრამ ყოველ შემთხვევაში, სახლიდან გამოგდების შიში აღარ გვაქვს. როგორც აგვიხსნეს, სააღსრულებო პროცესი შეჩერებულია.
- ტურისტული სეზონი უკვე დაწყებულია. დამსვენებლები გყავთ?
- კი, გვყავს. მართალია, წელს პიარი არ ყოფილა, მაგრამ საკმაოდ ბევრი ტურისტია, უფრო მეტად - რუსები. აქ უკვე ხუმრობენ, რომ ბიძინამ რუსეთიდან ხალხი ჩამოგვიყვანაო.
- რუსები არიან თუ უკრაინელები?
- რუსები არიან, - ლარსით შემოვედით, ბევრი ხალხი იყო და რიგში დგომამ მოგვიწიაო, - უკმაყოფილონი იყვნენ. ახლა ჩემთან მოსკოველი ბებია და შვილიშვილი ისვენებენ. ბებია საბჭოთა კავშირის დროს, ბაკურიანში დასვენების წლებს იხსენებს. მაშინ ცხვარიჭამიაშიც ყოფილა ჩამოსული... გეოლოგი ყოფილა და მთელი საქართველო შემოვლილი მაქვსო. ერთი თვე დარჩებიან.
ნანა, 43 წლის:
- ჩემს ბავშვობაშიც კი არ მახსოვს ამდენი რუსი დამსვენებელი... თურმე, რა უპრეტენზიო ხალხია. ბინა აიღეს და მთელი ღამეც პლაჟზე არიან. ჯერჯერობით სახლში მხოლოდ დასაბანად და მოსაწესრიგებლად მოდიან... სალმისა და დამშვიდობების დროს ღიმილი არ ავიწყდებათ და პოლიტიკაზე მათ ნამდვილად არ ვესაუბრებით. ამბობენ, - ძალიან გვინდოდა საქართველოში ჩამოსვლა, მაგრამ პუტინის უაზრო პოლიტიკის გამო თავს ვიკავებდით, ვფიქრობდით, ვაითუ, მტრულად დაგვხვდნენ-თქო...
- ამბობენ, თურქეთსა და ეგვიპტეში არსებულმა არეულობამ დამსვენებელთა ნაწილი საქართველოში "გადმოისროლაო"...
- დიახ, რამდენიმემ თქვა, ბილეთები დავაბრუნეთ და საქართველოში წამოსვლა ვარჩიეთო. რამდენიმემ ხუმრობით მითხრა, - რას ერჩოდით მიშას, რამდენი რამე გაუკეთებიაო! ჩვენებმა უპასუხეს, - ჩვენი დაქცევის ხარჯზეო... ახალმა თაობამ რუსული საერთოდ არ იცის და ეს აღნიშნეს. რუსი დამსვენებელი ასე თუ ისე, მაინც "ახალი ხილია" ჩვენთვის და ისე ფრთხილად იქცევიან, ისეთი მოზომილები არიან ურთიერთობისას, რომ ზოგჯერ გვგონია, დანაშაულის განცდა აქვთ და ცდილობენ, არ გაგვაღიზიანონ.
სვეტლანა, მაღაზიის გამყიდველი:
- არა მაქვს გასაქირავებელი ბინა, ამიტომ ჩემი პატარა ბიზნესი წამოვიწყე. ტურისტების სიმრავლე, ცხადია, მეც ხელს მაძლევს. ამ ეტაპზე ქობულეთში ბინის ქირა ერთ ადამიანზე 15-20 ლარის ფარგლებშია. საოჯახო ტიპის სასტუმრო შედარებით ძვირია - ორადგილიანი ნომრის ფასი 50-დან 60 ლარამდეა. არ ვიცი, ბათუმში რა ხდება, მაგრამ არა მგონია, დიდი განსხვავება იყოს... წლევანდელი წელი იმითაა გამორჩეული, რომ ქობულეთს უამრავი უცხოელი ტურისტი ეწვია. განსაკუთრებით რუსები აქტიურობენ. ზოგიერთმა ადგილობრივმა "ნაციონალმა" რამდენჯერმე წამოგვაძახა, - ფულის გამო მტერსაც მონებივით ემსახურებითო. რა თქმა უნდა, რუსებს გულისხმობენ...
სერგეი, რუსი დამსვენებელი, 42 წლის:
- საქართველოში ოჯახთან ერთად ჩამოვედი. აქ პირველად ვარ და ძალიან მომწონს. სანამ ქობულეთში ჩამოვიდოდით, თბილისს, მცხეთასა და სიღნაღს ვესტუმრეთ. ძალიან ლამაზი ქვეყანა გაქვთ, თბილი და მზიანი კლიმატით. ერთი კვირაა, ზღვაზე ვართ და ჯერჯერობით არ უწვიმია. ჩემი ცოლი მეუბნება, - ბაშვებმა - კი, მაგრამ ჩვენ მგონი, არ დაგვიმსახურებია სამოთხეში მოხვედრაო... აღფრთოვანებულია საქართველოთი... ცოტაც და ევროპული დონის ტურისტულ ქვეყნად ჩამოყალიბდებით. მხოლოდ წესრიგის გამკაცრება, სანიტარიული ნორმების მეტად დაცვა და ინფრასტრუქტურის განვითარებაა საჭირო. დანარჩენი თქვენს ქვეყანას უფალმა მიჰმადლა...
ლუბა, სერგეის ცოლი:
- ჩემმა მეუღლემ რაღაცები არ გითხრათ და მინდა, მოგიყვეთ ჩვენი აქ ჩამოსვლის ამბავი: თავიდან თურქეთში გვინდოდა წასვლა, მაგრამ იქ ჩვენი ახლობელი გოგონები მუშაობდნენ ბარში და თითქმის ყველა დაბრუნდა: ყოველდღე იკეტება ბარები და კაფეები და სამუშაო არაფერიაო... იქ დასვენება ჩაგვივარდა, არადა, მატერიალურად ის ყველაზე ხელსაყრელი ადგილია. ინტერნეტში ვეძებდით სხვადასხვა ადგილს. მანამდე, აპრილში, საქართველოში საქმიანი ვიზიტით მოგვიწია ჩამოსვლამ და სწორედ მაშინ დავათვალიერეთ ის ადგილები, რომელიც ჩემმა მეუღლემ ჩამოგითვალათ. მაშინ მივხვდით, რომ საქართველო ძალიან დიდი კულტურისა და ტრადიციების ქვეყანაა და ამ ყველაფრის შემონახვისთვის, ქართველი ერი პატივისცემას იმსახურებს. როდესაც თურქეთში წასვლა ჩაგვივარდა, საქართველო გაგვახსენდა... ერთმა მეგობარმა გვითხრა, რომ შარშან აფხაზეთში, კერძოდ, გაგრაში ისვენებდა და ძალიან კმაყოფილი იყო, რადგან წყალი სუფთა იყო და ამინდებმაც შეუწყო ხელი... ჩვენ ვთქვით, რომ ასე არ მოვიქცეოდით, რადგან ეს საქართველოს უპატივცემულობა იქნებოდა. ამიტომაც აჭარაში ჩამოსვლა ვარჩიეთ. ქობულეთის შემდეგ, ცოტა ხნით ბათუმსაც ვესტუმრებით და გონიოსაც... გაისად კი ალბათ მთაში დავგეგმავთ ტურს.
ლალი პაპასკირი
(გამოდის ხუთშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ხანგრძლივი ზრდის შემდეგ, თბილისში პარკირების ჯარიმები შემცირდა, თანაც თითქმის 60%-ით
კვირის კითხვადი სტატიები
მნიშვნელოვანი ინფორმაცია
მკითხველის რჩევით
