მნიშვნელოვანი ინფორმაცია
3
მაისიდღის ზოგადი ასტროლოგიური პროგნოზი
შაბათი, მთვარის მეშვიდე დღე დაიწყება 09:50-ზე, მთვარე ლომში გადაბრძანდება 15:36-ზე
ისეთი საქმეები წამოიწყეთ, რომლებსაც დღესვე დაასრულებთ და სხვა დროისთვის არ გადადებთ. მნიშვნელოვანი გადაწყვეტილებების მიღება სხვა დროისთვის გადადეთ.
ფინანსური ოპერაციების დაგეგმვასა და უძრავი ქონების ყიდვა-გაყიდვას არ გირჩევთ.
კარგი დღეა მსხვილი საყიდლებისთვის. კარგი დღეა შემოქმედებითი საქმიანობისთვის, სწავლისა და გამოცდების ჩასაბარებლად. უფროსთან და თანამდებობის პირებთან ნებისმიერ საქმეს მარტივად მოაგვარებთ. კარგი დღეა ფიზიკური ვარჯიშებისა და საოჯახო საქმეების შესასრულებლად. ზომიერება გმართებთ საკვებსა და სასმელში. მოერიდეთ გულის გადაღლას; ოპერაციებს გულსა და ზურგზე. შესაძლოა შეგაწუხოთ რადიკულიტმა.
მნიშვნელოვანი ინფორმაცია
მკითხველის რჩევით
ასევე დაგაინტერესებთ
რის თქმას უკრძალავს შვილი გია ბუღაძეს
23:14 / 28-07-2013
მხატვარი გია ბუღაძე მიიჩნევს, რომ პროფესიონალი მკითხველია და ეს ნებისმიერი ადამიანისთვის ყველაზე საამაყო პროფესიაა. იმის შესახებ, თუ როგორ "მოიწამლა" ლიტერატურით, ბატონი გია დიდი გატაცებითა და სიყვარულით საუბრობს:
- ჩემი ბავშვობის ყველაზე ძვირფასი და განუმეორებელი მოგონებაა "ბაში-აჩუკი", ჯერ ფილმი ვნახე, შემდეგ კი მოთხრობაც წავიკითხე, ძალიან პატარა ვიყავი, მაგრამ მაინც საოცრად მომეწონა. ყველაზე დაუვიწყარი ემოცია კი ვაჟა-ფშაველას "შვლის ნუკრის ნაამბობმა" გამოიწვია, ასეთი ძლიერი განცდა ჩემში არც ერთ ნაწარმოებს არ გაუჩენია მთელი ცხოვრების განმავლობაში. დიდი სიყვარულითა და ინტერესით ვკითხულობდი ძმები გრიმების ზღაპრებს, რომლებიც ასევე საოცრად მავსებდა. სხვათა შორის, დედა განათლებული ქალი იყო და ბევრს კითხულობდა, მამას კი ძალიან უყვარდა მოლხენა და ვერ წარმოედგინა, რომ შეიძლება კაციც კითხულობდეს წიგნებს. 8-9 წლისა ვიყავი, როცა სენაკში გამგზავნეს, ბიძის, ოთარ იოსელიანის ოჯახში. სწორედ მან შემაყვარა წიგნის კითხვა. ბიძაჩემი წარმატებული ქირურგი იყო, გუშინდელივით მახსოვს, მის კაბინეტში რომ შევედი და ჭერამდე წიგნები დამხვდა, რამაც ჩემზე უდიდესი შთაბეჭდილება მოახდინა. ამის შემდეგ წამიყვანა ნოქალაქევში - ამ ისტორიულ ადგილას და გზადაგზა მიყვებოდა კონსტანტინე გამსახურდიასა და მის "დიდოსტატის მარჯვენაზე". ასე "მომწამლა" ბიძაჩემმა ლიტერატურით და მისი დღემდე მადლიერი ვარ.
- ალბათ, მისი გავლენით სერიოზული წიგნებითაც დაინტერესდით.
- დიახ, ამ შეხვედრის შემდეგ წავიკითხე კონსტანტინე გამსახურდიას "დიდოსტატის მარჯვენა". ძალიან პატარა ვიყავი და რა გავიგე, ეს სულ სხვა საკითხია, თუმცა ამ რომანმა ჩემს აზროვნებაზე ძალიან იმოქმედა. მერე უკვე სხვა რომანებიც წავიკითხე და დღემდე ვამაყობ იმით, რომ პროფესიონალი მკითხველი ვარ. მართალია, პროფესიონალი პედაგოგი და პროფესიონალი მხატვარი ვარ, მაგრამ ეს ჩემთვის მაინც ყველაზე საამაყო პროფესიაა. დღის განმავლობაში 50-70 ფურცელს მაინც ვკითხულობ, რა თქმა უნდა, ეს არ არის მხოლოდ მხატვრული ლიტერატურა, მიხარია, რომ დღემდე ამ "დაავადებით" ვარ შეპყრობილი.
- რას გვეტყოდით თქვენი სამაგიდო წიგნების თაობაზე?
- ჩემი სამაგიდო წიგნი წლების განმავლობაში იყო გოეთეს "საუბრები ეკერმანთან", ეს იყო ჩემი გზამკვლევი გოეთეს სხვა ნაწარმოებებთან ერთად. აუცილებლად უნდა აღვნიშნო ნოვალისი და არაჩვეულებრივი რუსული ლიტერატურა. ბუნებრივია, ჩემი ყოველდღიური მეგზურია ვაჟა-ფშაველაც, ვაჟა ჩემს ცხოვრებაში ისეთივე მნიშვნელოვანია, როგორც პეიზაჟში - ხეები. როგორც პეიზაჟს ვერ დახატავ ხეების გარეშე, ასევე ვერ წარმომიდგენია ჩემი ყოფაც ვაჟა-ფშაველას გარეშე.
- ბატონო გია, თქვენც ფიქრობთ, რომ თანამედროვე ახალგაზრდობა წიგნს ძალიან დაშორდა?
- მე ლექტორი ვარ და ყოველდღე მიწევს ასეულობით ახალგაზრდასთან ურთიერთობა. მეც ვფიქრობ, რომ კომპიუტერმა ახალგაზრდები ძალიან დააშორა წიგნს, რაც ძალიან სამწუხაროა. შეუძლებელია კომპიუტერით მიიღო ისეთი განათლება, როგორსაც წიგნი გაძლევს. ყველანაირად ვცდილობ ჩემი სტუდენტები ლიტერატურით "მოვწამლო", ვუყვები ათასგვარ ამბავს, მოსმენა უყვართ, მაგრამ წაკითხვა - ნაკლებად. თუმცა, აქვე მინდა დაგამშვიდოთ და გითხრათ, რომ ბოლო პერიოდში წამოვიდა ტალღა განსაკუთრებით ნიჭიერი ბავშვებისა. გვყავს ძალიან ბევრი ნიჭიერი და მაღალი დონის ახალგაზრდა და ამავე დროს გვყავს ძალიან ბევრი ჩამორჩენილიც. თუ ჩემს ბავშვობაში საშუალო მოსწრების ადამიანთა რაოდენობა უფრო მეტი იყო, დღეს ორი უკიდურესობა გამოიკვეთა: გვყავს უზომოდ გონიერი ბავშვები და ამავე დროს არიან ისეთები, რომლებსაც ვერაფერს გააგებინებ. მე ხშირად ვეუბნები ახალგაზრდებს: კარგი წიგნის წაკითხვის შემდეგ ადამიანს ვერ მოკლავ და თუ შემოგაკვდება, იდარდებ მაინც-მეთქი.
- ამ კითხვას ყველა ჩვენი რესპონდენტი განსხვავებულად პასუხობს: პროზა უფრო ახლობელია თქვენთვის, თუ პოეზია?
- პროზა ჩემი სიცოცხლეა, თანაც, კარგა ხანია სამეცნიერო ლიტერატურაზე ვმუშაობ და პროზასთან უფრო ხშირი შეხება მაქვს. რაც შეეხება პოეზიას - ჰომეროსის პოემები აუღებელი სიმაღლეა! ჩემთვის არასოდეს დასრულდება ამ პოეტით აღტაცება. ჰომეროსის "ილიადა" და "ოდისეა" ის განძია, რომელიც არ მთავრდება და ამოუწურავია. მე ამ ქმნილებებით ვცოცხლობ და ალბათ მათი თანხლებით მოვკვდები. ამავე დროს ძალიან მიყვარს ჩრდილოური საგები და თავგადასავლები. არ შემიძლია არ ვახსენო დანტე ალიგიერი და რუსთაველი, გალაკტიონი და ტერენტი გრანელი - ესენი ჩემთვის უსაყვარლესი პოეტები არიან. 16-17 წლისა ვიყავი, როცა მოდილიანის შემოქმედებამ გამიტაცა, გავიგე, რომ მოდილიანი ჯიბით ბოდლერის ლექსებს დაატარებდა, მაშინ ტერენტი გრანელის პატარა წიგნი გამოვიდა და მეც ამ კრებულს ჯიბით დავატარებდი. ერთი სიტყვით, მოდილიანს ვბაძავდი, თუმცა როგორც ქართველმა, ქართველი პოეტი ამოვარჩიე.
- თანამედროვე ქართველ მწერლებს შორის ვისი შემოქმედება მოგწონთ გამორჩეულად?
- მართალია, ის ადამიანი მიკრძალავს ამის თქმას, მაგრამ ჩემი შვილის - ლაშა ბუღაძის წიგნებს ძალიან დიდი ინტერესით ვკითხულობ. ძალიან მიყვარს დათო ტურაშვილი და მისი შემოქმედება. რატი ამაღლობელი, რომელიც ასევე ლაშას სამეგობრო წრეს ეკუთვნის და შვილივით მყავს გაზრდილი. მომწონს ბასა ჯანიკაშვილის შემოქმედება, რომელიც ასევე შვილივით მიყვარს. დიდი ინტერესით ვკითხულობ ზაალ სამადაშვილის საოცრად თბილ, კარგ მოთხრობებს და მინდა, რომ მწერლობას დაუბრუნდეს იმიტომ, რომ ძალიან კარგი მწერალია. სულ მინდა ვუთხრა: ზაალ, შეეშვი პოლიტიკას და შენს საქმეს მიხედე-მეთქი!
- და ბოლოს, დაგვისახელეთ წიგნი, რომლის კითხვაც არასოდეს მოგბეზრდებათ?
- როგორც გითხარით, გულისა და გონების წიგნები ჩემთვის არის ჰომეროსის "ილიადა" და "ოდისეა". არაჩვეულებრივია დანტეს "ღვთაებრივი კომედია", გოეთესა და ნოვალისის ქმნილებები. არანაკლებ ძვირფასია ჩემთვის გერმანელი რომანტიკოსების შემოქმედებაც. ჩემს ახალგაზრდობაში შემეძლო განუწყვეტლივ მეკითხა ჰერმან ჰესეს "თამაში ყალბი მარგალიტებით" - ეს გენიალური რომანია, რომელმაც ძალიან დიდი გავლენა მოახდინა ჩემზე.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
გააკეთეთ კომენტარი
sponsored by
ContentRoom
რუბრიკის სხვა სიახლეები
დღის ვიდეო
00:00 / 00:00
ხანგრძლივი ზრდის შემდეგ, თბილისში პარკირების ჯარიმები შემცირდა, თანაც თითქმის 60%-ით
კვირის კითხვადი სტატიები
მნიშვნელოვანი ინფორმაცია
მკითხველის რჩევით
_2019-10-07_pcZAK5dDPSlBIBs.jpg)
