2
აპრილიდღის ზოგადი ასტროლოგიური პროგნოზი
რუბრიკა "ფსიქოს" დღევანდელი სტუმარი მომღერალი ნინა წკრიალაშვილია.
- დეპრესიულმა პერიოდმა ჯერ არ გადაიარა შენს ცხოვრებაში?
- დეპრესია სისულელეა და არაფრის მომტანი. თენგოს (ნინას მეუღლე, ტრაგიკულად დაღუპული თენგო წივწივაძე) დაკარგვა ისეთი ტკივილია, რომელიც არასოდეს გაივლის. ცხოვრება გრძელდება და ახლობელი ადამიანები შენი ცუდად ყოფნით არ უნდა შეაწუხო. მყავს 15 წლის შვილი, რომლის გამოც ბევრად უკეთ უნდა ვიყო, ვიდრე აქამდე ვიყავი.
- უკვე ყველამ მოვისმინეთ სიმღერა, რომელიც თენგოს მიუძღვენი. ეს შენი იდეა იყო?
- მუსიკა რუსა მორჩილაძეს ეკუთვნის, არანჟირება - ზაზა ხუბუკელაშვილს, ტექსტი მე და ირინა სანიკიძემ დავწერეთ, კლიპი კი ფოტოგრაფმა აკო ხარისთვალაშვილმა გადაიღო. ამ სიმღერის შექმნის იდეა, რა თქმა უნდა, მე მეკუთვნის. თენგო იმსახურებდა ჩემგან ამ ყველაფერს.
- მომღერალი რომ არ იყო, რა პროფესიას აირჩევდი?
- ალბათ, არქიტექტორი ან ინტერიერის დიზაინერი ვიქნებოდი. თუნდაც იმიტომ, რომ ხშირად ვმოგზაურობ, ბევრი რამ მინახავს და იდეები თავისით მომდის. თან ვფიქრობ, რომ ძალიან სასიამოვნო და საინტერესო პროფესიებია. რა სჯობს რაღაც ახლის შექმნას, მით უმეტეს, როცა შედეგი ესთეტიკურ სიამოვნებას მოგანიჭებს.
- ნინა, წარმოიდგინე, რომ ძველებურად გასუქდი...
- არასოდეს აღარ გავსუქდები, რადგან მიმაჩნია, რომ სიმსუქნე უკულტურობაა. თუ, რა თქმა უნდა, ჰორმონალური ბალანსის დარღვევის პრობლემა არ არის. ჭამა იმად არ ღირს, რომ მსუქანმა იარო.
- ყოველთვის ასეთი მშვიდი ხარ?
- ხანდახან ფეთქებადი ვარ, ხშირად კი თავშეკავებული.
- ბევრი თაყვანისმცემელი გყავს?
- არ ვიცი, არ ვითვლი ხოლმე (იცინის).
- რა უნდა გააკეთოს მამაკაცმა, შენი ყურადღება რომ დაიმსახუროს?
- მამაკაცი არ არის ის თემა, რაზეც შეიძლება ბევრი ვიფიქრო და მათ დავაკვირდე. გულს ვერ უბრძანებ, ან მოგწონს, ან არა.
- პრეზიდენტმა რომ ძვირფასი საჩუქარი გიძღვნას, როგორ მოიქცევი?
- რიგით მოქალაქეებს პრეზიდენტები ძვირფას საჩუქრებს არ უძღვნიან, ამიტომ ვიცი, რომ არ მაჩუქებს.
- მაგრამ შენ ხომ რიგითი არ ხარ, დაგაჯილდოვა კიდეც საპატიო მედლით.
- კი, ვარ ღირსების ორდენის კავალერი, ძალიან ვამაყობ ამით და ეს ორდენი საპატიო ადგილას კიდია ჩემს სახლში.
- კობა ხაბაზმა რომ სერენადა გიმღეროს, რა რეაქცია გექნება?
- კობა ჩემი მეგობარია და ძალიან დიდ პატივს ვცემ, სხვათა შორის ერთადაც გვიმღერია. აი, სერენადას თუ მიმღერებს, ვიფიქრებ, რომ აივანი შეეშალა (იცინის).
ფსიქოლოგის რჩევა
ლევან ოდიშარია - ფსიქოლოგი: აქტიური და იმპულსური ადამიანია. მასში მკაფიოდაა გამოხატული გონებრივ-ინტელექტუალური უნარი. როგორც ჩანს, მისი მოქმედებები მიმართულია პრაქტიკული შედეგებისკენ. შეიმჩნევა ასევე რადიკალიზმიც.
მაკა ქობალია
ყოველკვირეული გაზეთი "ყველა სიახლე"
(გამოდის ოთხშაბათობით)
