9
აპრილიდღის ზოგადი ასტროლოგიური პროგნოზი
ალბათ, ბევრმა არ იცის, რომ თბილისში გასეირნება ცხენითაც არის შესაძლებელი. პროფესიონალი ცხენოსანი კობა მათიაშვილი თავისი ცხენით ჯერჯერობით ძირითადად უცხოელებს ემსახურება. როგორც თვითონ ამბობს, რომ არა ცხენი, ბევრად უფრო შემოსავლიანი ბიზნესი ექნებოდა, მაგრამ ამ ცხოველის გარეშე არსებობა არ შეუძლია.
- მთელი ცხოვრება ცხენის სიახლოვეს მაქვს გატარებული. სამწუხაროდ, საქართველოში ჩამკვდარია ცხენოსნობა. დოღი ხომ აღარ იმართება და ძველი საცხენოსნო თამაშებიც მივიწყებულია. ჯერ კიდევ იმედი მაქვს, რომ შესაძლებელია ამის გადარჩენა და მომხმარებელს ცხენით გასეირნებას ვთავაზობ. ჩემს თავლაში ცხრა ცხენია და მე და ჩემი მეგობრები ერთად ვუვლით. ადრე კინოსტუდიის თავლაში ვმუშაობდი, ფილმებშიც ვმონაწილეობდი, მაგრამ ჩემთვის ცხენი უფრო მნიშვნელოვანია, ვიდრე კინოროლები.
- რომელ ფილმში ხართ გადაღებული?
- ვმონაწილეობდი "ანთიმოზ ივერიელში", "მოკვეთილში"... 14 წლის განმავლობაში კინოსტუდიაში ცხენების სიყვარულით ვმუშაობდი. კინოსტუდიის თავლა რომ დაიხურა, დავიფანტეთ - ზოგი საზღვარგარეთ წავიდა, ზოგმა სხვა საქმეს მოჰკიდა ხელი, მე ცხენებს ვერ ვუღალატე. ეს საქმე დიდ შრომას და ფინანსებს მოითხოვს. ის თანხა, რაც ამაში მაქვს ჩადებული, სხვა ბიზნესში რომ ჩამედო, ახლა ბევრი ფული მექნებოდა, მაგრამ ცხენების გარეშე ცხოვრება არ შემიძლია.
- რა ღირს ცხენით გასეირნება?
- ცხენით გასეირნების საფასური 20 ლარიდან იწყება. გოგონები უფრო მამაცები არიან, მამაკაცი კი უფრო ფრთხილია. ბევრს უთქვამს, ბავშვობიდან ცხენზე ვზივარო, მაგრამ დამჯდარა თუ არა, მივმხვდარვარ, რომ იტყუება.. ცხენი ჭკვიანი ცხოველია, მაგრამ მასთან ურთიერთობა მაინც რისკთან არის დაკავშირებული, ამიტომ ვიდრე სასეირნოდ გავალთ, მანამდე აქვე, თავლაში ვაჩვევ კლიენტისთვის შესაფერის ცხენს.
- შემოსავლიანია ეს ბიზნესი?
- ზოგჯერ საერთოდ არავინ მოდის, მით უმეტეს, თუ წვიმიანი დღეებია. ხანდახან 6-კაციანი ჯგუფიც მოსულა. იმდენი შემოსავალი კი გვაქვს, ცხენებს რომ მოვუაროთ და კარგად გამოვკვებოთ. უცხოელები უფრო გვეტანებიან, მათ უფრო იციან ცხენის ფასი. უყვართ ჯირითი, გასეირნება. ამ ბოლო დროს ქართველებიც დაინტერესდნენ ამ საქმით. ვიდრე შევძლებ, ვეცდები საქართველოში ცხენოსნობა გადავარჩინო.
- როგორ შეძლებთ ამას?
- ერთი ხელის გაწვდენაზეა ჩვენთან ცხენი და ამას არ ვუფრთხილდებით. სუფთა ჯიშის ქართული ცხენი უკვე გადაშენების პირას არის. ცხენოსნობის განვითარება ტურიზმის განვითარებასაც შეუწყობს ხელს. უცხოელებს ძალიან უყვართ ჯირითი, მაგრამ მათთვის ცხენი ადვილად ხელმისაწვდომი არ არის. არქეოლოგებმა პირველი ლაგამი საქართველოში აღმოაჩინეს. ცხენოსნობამ ჩაუყარა საფუძველი პოლოს. მარულა, ისინდი, გარდი, რადრაგაბანი - ეს ქართული საცხენოსნო თამაშები დღეს გაქრობის პირას არის. ამას უნდა მიექცეს ყურადღება და ცხენოსნობაც განვითარდება.
ესაუბრა თამარ ბოჭორიშვილი
ყოველკვირეული გაზეთი "ყველა სიახლე"
(გამოდის ოთხშაბათობით)
