4
აპრილიდღის ზოგადი ასტროლოგიური პროგნოზი
იშხანში სარემონტო სამუშაოებს ერთ-ერთი სამშენებლო კომპანიის მუშები აწარმოებენ. ამის შესახებ "ინტერპრესნიუსს" საქართველოს კათოლიკოს-პატრიარქის ქორეპისკოპოსმა, ახალციხისა და ტაო-კლარჯეთის მიტროპოლიტმა თეოდორემ (ჭუაძე) განუცხადა.
მისივე თქმით, იშხნის დასავლეთის მკლავთან ძალიან დიდი ოდენობის მიწა არის მოხსნილი და გარეთ გამოტანილი. ასევე საკურთხეველთან არის რამდენიმე ადგილზე მიწა ამოთხრილი. ტაძრის ეზოში გატანილია დიდი ოდენობით ქვები, რომლებზეც ფრესკების ფრაგმენტები ჩანს.
"რაც მე ვნახე საგანგაშოა. შიგნით ინტერიერში დასავლეთის მკლავის მიწა მთლიანად მოხსნილია და დასულია იატაკის დონეზე, მაგრამ ნაწილზე იატაკი ჩანს, ნაწილზე –არა. მიწის მოთხრის დროს დაზიანდა იატაკი, თუ საერთოდ არ იყო იქ, არავინ იცის. სამუშაოებს არც არქეოლოგი და არც არქიტექტორი არ ესწრება. მუშები მუშაობენ, რომლებმაც არ იციან არაფერი. თურქი სპეციალისტიც კი არ ესწრება. სამუშაოებს ერთ-ერთი სამშენებლო კომპანია ასრულებს, მათ ძეგლთან შეხება არასდროს ჰქონიათ", - აღნიშნა მეუფემ.
პატრიარქის ქორეპისკოპოსისთვის უცნობია, რომელი თურქული კომპანია ასრულებს სამუშაოებს. მუშები აცხადებენ, რომ მათ სამუშაოების შესრულება თურქეთის სახელმწიფომ დაავალა. კომპანიამ ტენდერში გაიმარჯვა და სამუშაოები თურქეთის მიერ ფინანსდება.
მეუფის განცხადებით, სავარაუდოდ, სამუშაოები 400 დღეში უნდა დაასრულონ.
ქორეპისკოპოსისთვის გაუგებარია, რამ გამოიწვია თურქეთის მხარის მყისიერი რეაქცია, დაეწყო სამუშაოები.
"მომხდარის გამო მივმართეთ თურქეთის საელჩოს საქართველოში, ასევე საქართველოს საგარეო საქმეთა სამინისტროს, რომ მიმართოს თურქეთის საგარეო საქმეთა სამინისტროს. რატომღაც ქართველი სპეციალისტების სამუშაოებში ჩართვის პირობა არ სრულდება. თუ ქართველი სპეციალისტები არ ჩაერთვებიან, ეჭვი მეპარება, რომ იქ რამე გადარჩეს. როგორ გაკეთდება და აღდგება კიდევ საერთოდ არ ვიცით", - აღნიშნა მეუფე თეოდორემ.
ახალციხისა და ტაო-კლარჯეთის მიტროპოლიტი ისტორიულ ტაო-კლარჯეთში ტაძრების მოსანახულებლად 7-8 აპრილს იმყოფებოდა.
