5
აპრილიდღის ზოგადი ასტროლოგიური პროგნოზი
ბიზნესმენ ბორის ბერეზოვსკის, რომელიც ოფიციალური ვერსიით ჩამოხრჩობით გარდაიცვალა, როგორც ირკვევა, ნეკნი ჰქონდა გატეხილი. ამის შესახებ მისი ოჯახის წევრები ირწმუნებიან. ბიზნესმენის გარდაცვალების გარემოებებს ხუთშაბათს დაწყებული გამოძიება გამოავლენს.
პირველადმა გაკვეთამ გამოავლინა, რომ ბერეზოვსკის ნეკნი ჰქონდა გატეხილი, იუწყება გარდაცვლილის ოჯახის წევრზე დაყრდნობით ბრიტანული გაზეთი The Guardian-ი. ამასთან, ოლიგარქის ნათესავმა დაადასტურა, რომ გარდაცვლილს სხეულზე დაჟეჟილობები არ აღმოაჩნდა. ჯერჯერობით, ბრიტანელ სპეციალისტებს მოტეხილობის წარმომავლობის შესახებ ვერსიები და ინფორმაცია, იყო თუ არა იგი სიცოცხლეში შეძენილი, არ გააჩნიათ.
ბერეზოვსკის გარდაცვალებაზე საგამოძიებო პროცედურა ადგილობრივი დროით 09:15 სთ-ზე ბერკშირის საგრაფოში, ქალაქ ვინძორში, საკორონერო სასამართლოში დაიწყება.
The Guardian-ი ვარაუდობს, რომ ბორის ბერეზოვსკის ექვს კვირაზე ადრე ვერ დაკრძალავენ, ამ დროისთვის პოლიცია ექსპერტიზის დასკვნას დაასრულებს და სხეულს ახლობლებს გადასცემს.
ოლიგარქის დაკრძალვის ადგილი ჯერჯერობით უცნობია. რუსეთის მთავრობა არ გამორიცხავს, რომ რუსეთიდან 2000 წელს გაქცეული ბერეზოვსკის ცხედარი სამშობლოში დაკრძალონ. გარდაცვლილის მეგობრები კი ვარაუდობენ, რომ მან შესაძლოა, უკანასკნელი განსასვენებელი ლონდონის ან ისრაელის ტერიტორიაზე ჰპოვოს.
ბერეზოვსკის გარდაცვალების შესახებ ცნობილი 23 მარტის ღამეს გახდა. მისი სხეული იატაკზე, შიგნიდან ჩაკეტილ აბაზანაში იპოვეს. მას ერთადერთი მცველი იცავდა. სკოტლანდ-იარდმა სამშაბათს ცხედრის გაკვეთის ოფიციალური შედეგები გამოაქვეყნა - სპეციალისტებმა ძალადობრივი სიკვდილის ნიშნები ვერ აღმოაჩინეს.
მომზადებულია The Guardian-ის მიხედვით.
