3
მაისიდღის ზოგადი ასტროლოგიური პროგნოზი
გაერთიანებული შტაბის ყოფილ უფროსს გიგი კალანდაძეს, რომელიც თავდაცვის ყოფილ მინისტრ ბაჩო ახალაიასთან ერთად ბრალდებულია, საქალაქო სასამართლოს გადაწყვეტილებით ორი ბრალდება მოეხსნა.
თბილისის საქალაქო სასამართლოში მიმდინარე პროცესზე მოსამართლე ეკა არეშიძემ ნაწილობრივ დააკმაყოფილა დაცვის მხარის შუამდგომლობა პროკურატურის მტკიცებულებების ნაწილის დაუშვებლად ცნობაზე.
როგორც მოსამართლემ აღნიშნა, გიგი კალანდაძესთან მიმართებაში, რომელსაც ბრალი პირველად გასული წლის 8 ნოემბერს იუსტიციის მინისტრის მხრიდან წარედგინა, შემდეგ კი - 12 და 19 ნოემბერს პროკურატურის მხრიდან, ბოლო ორი ბრალდების დადგენილება უნდა გაუქმდეს. მოსამართლის განმარტებით, 8 ნოემბრის შემდეგ გიგი კალანდაძე თანამდებობიდან გადააყენეს, თუმცა ოფიციალურად პრეზიდენტს გათავისუფლებაზე ხელი არ ჰქონდა მოწერილი.
"შესაბამისად, კალანდაძე თანამდებობიდან გათავისუფლდა მხოლოდ 5 დეკემბერს და 12 და 19 ნოემბრის მდგომარეობით იგი მითითებული თანამდებობის პირი იყო. აქედან გამომდინარე სასამართლო მიიჩნევს, რომ საბრალდებო დოკუმენტები, რომლებიც 12 და 19 ნოემბერს არის მიღებული, უნდა გაუქმდეს და საქმეში დაუშვებლად იქნეს ცნობილი", - განაცხადა ეკა არეშიძემ.
მისივე თქმით, უნდა გაუქმდეს გიგი კალანდაძისთვის დაკისრებული გირაო, რომელიც მას მეორედ 10 000 ლარის სახით შეეფარდა და თანხა გენშტაბის ყოფილ უფროსს უკან დაუბრუნდეს.
ამასთან, კალანდაძე, რომელსაც 8 ნოემბერს სისხლის სამართლის კოდექსის 333-ე მუხლის შესაბამისად იუსტიციის მინისტრმა ბრალი წარუდგინა, ბრალდებულად სწორედ აღნიშნული მუხლით რჩება. რაც შეეხება გასული წლის 12 და 19 ნოემბერს წარდგენილ ბრალდებებს, რომლებიც დღეს ოფიციალურად გაუქმდა, კალანდაძეს ბრალი ედებოდა თავისუფლების უკანონო აღკვეთაში და სამსახურეობრივი უფლებამოსილების გადამეტებაში, რომელიც გათვალისწინებულია სისხლის სამართლის კოდექსის 143-ე და 333-ე მუხლებით.
სასამართლო პროცესი, სადაც ბაჩო ახალაიას, გიგი კალანდაძის და სხვა ექვსი პირის საქმე განიხილება, საქალაქო სასამართლოში ამ დრომდე გრძელდება. მოსამართლე ეკა არეშიძემ არ დააკმაყოფილა დაცვის მხარის შუამდგომლობის ნაწილი, სადაც მოთხოვნილი იყო ერთ-ერთი ბრალდებულის, მერაბ კიკაბიძის შესახებ მტკიცებულებების გაუქმება, ასევე, გაგა მკურნალიძის პირველადი ჩვენების მტკიცებულება და არ ცნობა. ამის არგუმენტად მოსამართლემ დაასახელა ფაქტი, რომ მკურნალიძესთან მიმართებაში პირადად მისი ადვოკატი პირველი ჩვენების ზეწოლის ქვეშ მიცემაზე საუბრობს, არ არის დასაბუთებული თუ რა ვითარებაში მოხდა მკურნალიძეზე ზეწოლა.
ამ დროისათვის პროცესზე დაცვის მხარის მტკიცებულებების წარდგენა მიმდინარეობს.
