3
მაისიდღის ზოგადი ასტროლოგიური პროგნოზი
კიდევ ერთი ვარსკვლავური საღამო, კიდევ ერთი წითელი ხალიჩა და მასზე თავმომწონედ მოსეირნე ჰოლივუდის ვარსკვლავები - ლოს-ანჯელესში რიგით მეცხრამეტე კინომსახიობთა გილდიის დაჯილდოება (SAG awards) გაიმართა.
SAG awards-ის ცერემონიას, რომელზეც ჯილდოები კინოსა და ტელევიზიის დარგში 16 ნომინაციაში გაიცა, Shrine Exposition Center-მა უმასპინძლა.
სანამ ცერემონიის ფავორიტები გამოიკვეთებოდა, ვარსკვლავებმა წითელ ხალიჩაზე დიზაინერების ნამუშევრები წარმოადგინეს. კინომსახიობთა გილდიის სტუმართა კაბებს შორის 2013 წელს ლურჯი ფერი დომინირებდა.
ცნობილი მსახიობი, ნიკოლ კიდმანი წითელ ხალიჩაზე ეპატაჟური დიზაინერის, ვივიენ ვესტვუდის კაბაში გამოჩნდა. შავი ბადისგან შექმნილი კაბა, რომელიც ლურჯი მბრწყინავი მაქმანებით იყო გაფორმებული, ვარსკვლავის ელეგანტურობას უსვამდა ხაზს.
ლურჯ ფერზე შეაჩერა არჩევანი ახალგაზრდა მსახიობმა ამანდა სეიფრიდმაც. კაბის დიზაინი Zac Posen-ს ეკუთვნის. საღამოს კაბა მხრების გარეშე, მჭიდრო წელით და გაშლილი ბოლოთი, ამანდას დახვეწილ სილუეტს კვეთდა.
ტენდენციას არც მარიონ კოტიარი ჩამორჩა. მსახიობი, რომელიც წითელ ხალიჩაზეც და ყოველდღიურ ცხოვრებაშიც უზადო გემოვნებით გამოირჩევა, კინომსახიობთა გილდიის დაჯილდოებაზე Dior-ის თეთრსა და ღია ლურჯ ფერებში გადაწყვეტილი კაბით გამოჩნდა. მსახიობის ერთადერთი აქსესუარი ბრილიანტის ყელსაბამი იყო.
ყოველ წითელ ხალიჩას ჰყავს თავისი ოქროს და ვერცხლის გოგონები. წელს SAG awards-ის ოქროს გოგონას ტიტული Oscar de la Renta-ს კაბაში გამოწყობილ ჯენიფერ გარნერს ხვდა წილად. ხოლო ვერცხლის გოგონა ჰელენ ჰანტი გახდა.
ნაომი ვოთსმა, რომელიც დაჯილდოებაზე Marchesa-ს თეთრ კაბაში გამოეწყო, ნამდვილი ფურორი მოახდინა. თეთრი კაბით და ტრადიციული ღრმა დეკოლტით მოიწონა თავი სოფია ვერგარამაც.
წლის ერთ-ერთ ყველაზე წარმატებულ მსახიობს, ენ ჰეთევეის პაპარაცებმა მოსვენება არც ამჯერად მისცეს. ჰეთევეი შავ, დრამატულ კაბაში იყო გამოწყობილი, რომლის დიზაინი Giambattista Valli-ს ეკუთვნის.
რაც შეეხება მამაკაცებს, ფოტოგრაფების ყურადღების ცენტრში მოხვდა გამარჯვებული ბენ აფლეკი, რომელმაც გილდიის ჯილდო ფილმისთვის "ოპერაცია "არგო" აიღო. საღამოს დაესწრნენ რობერტ დე ნირო, ჯუდ ლოუ, ჰიუ ჯეკმანი, რასელ ქროუ, ალეკ ბოლდუინი.
ახლა კი თავად კინომსახიობთა გილდიის დაჯილდოების გამარჯვებულებზე გადავიდეთ.
მსახიობთა გილდიის უდავო ფავორიტები "ლინკოლნი" და "საბრალონი" გახდნენ, თუმცა ყველა პრეტენდენტს მაინც ბენ აფლეკის ფილმმა, "ოპერაცია"არგომ" აჯობა.
აფლეკის ამ ნამუშევარმა დიდ წარმატებას მიაღწია. ფილმმა უკვე მოიპოვა "ოქროს გლობუსი", ახლა კი კინომსახიობთა გილდიის მთავარი ჯილდოც მიიღო. ახლა "არგო" ოსკარისთვის იბრძოლებს.
"ეს არ არის ჩემი დამსახურება. გამარჯვება დაიმსახურეს იმ არაჩვეულებრივმა ადამიანებმა, რომლებიც ფილმის გადასაღებ მოედანზე მუშაობდნენ", - განაცხადა ბენმა და თავის მეუღლეს, ჯენიფერ გარნერს გადაეხვია.
სიტყვით გამოვიდა ენ ჰეთევეიც, რომელიც ასევე გახდა SAG-ის დაჯილდოების გამარჯვებული და რომელსაც "საბრალონში" თამაშისთვის, წელს მეორეხარისხოვანი როლისთვის "ოსკარსაც" უწინასწარმეტყველებენ.
" SAG-ის ბარათი 14 წლის ასაკში მივიღე. მაშინ ჩემს თვალწინ ახალი სამყარო გადაიშალა. ჩემი სამსახიობო ცხოვრების ყოველი წუთი მიყვარს. მადლობა, რომ ასეთ დიდებულ მსახიობთა გვერდით მეც მომახვედრეთ ნომინანტთა სიაში", - განაცხადა ენმა.
კინომსახიობთა გილდიის დაჯილდოების გამარჯვებულები კი გახდნენ:
მამაკაცის საუკეთესო როლი მხატვრულ ფილმში - დენიელ დეი-ლუისი ფილმისთვის "ლინკოლნი"
ქალის საუკეთესო როლი მხატვრულ ფილმში - ჯენიფერ ლოურენსი ფილმისთვის "ჩემი შეყვარებული შეშლილია"
მსახიობთა საუკეთესო ანსამბლი - "ოპერაცია "არგო"
მამაკაცის საუკეთესო მეორეხარისხოვანი როლი - ტომი ლი ჯონსი ფილმისთვის "ლინკოლნი"
ქალის საუკეთესო მეორეხარისხოვანი როლი - ენ ჰეთევეი ფილმისთვის "საბრალონი"
მამაკაცის საუკეთესო როლი კომედიურ სერიალში - ალეკ ბოლდუინი "სტუდია 30"
ქალის საუკეთესო კომედიური როლი სერიალში - ტინა ფეი "სტუდია 30"
მსახიობთა საუკეთესო ანსამბლი კომედიურ სერიალში - "ამერიკული ოჯახი"
ქალის საუკეთესო როლი ტელეფილმში ან მინი-სერიალში - ჯულიანა მური "თამაში შეიცვალა"
მამაკაცის საუკეთესო როლი ტელეფილმში ან მინი-სერიალში - კევინ კოსტნერი "ჰეტფილდი და მაკკოი"
ქალის საუკეთესო როლი დრამატულ სერიალში -კლერ დეინსი"
მამაკაცის საუკეთესო როლი დრამატულ სერიალში - "ბრაიან კრენსტონი"
მსახიობთა საუკეთესო ანსამბლი დრამატულ სერიალში - "დაუნტონის სააბატო"
მომზადებულია dailymail.co.uk-ის მიხედვით.
