3
მაისიდღის ზოგადი ასტროლოგიური პროგნოზი
აშშ-ს თავდაცვის უწყებამ ლიბანის მთავრობას M113-ის ტიპის 200 ჯავშანტრანსპორტიორი უსასყიდლოდ გადასცა. ქალაქ ბიერუთის პორტში ტექნიკა მიმდინარე წლის 6 იანვარს გადმოტვირთეს. ყველა ჯავშანტრანსპორტიორი საბრძოლო მდგომარეობაშია, თუმცა ერთ-ერთ ლიბანურ საწარმოში სრულ ტექნიკურ შემოწმებას გაივლიან.
ლიბანური შეიარაღებული ძალების ფორმირებაში აშშ უდიდეს როლს თამაშობს. 1982 წელს პენტაგონმა ლიბანის არმიის ქვედანაყოფების მოსამზადებლად 80 სამხედრო მრჩეველი მიავლინა. იმავე პერიოდში ლიბანმა აშშ-სა და საფრანგეთში შეიარაღების მასობრივი ყიდვა დაიწყო. 1983 წელს ლიბანმა მათგან 1,2 მილიარდის, მომდევნო 1984-ში კი - 1 მილიარდი აშშ დოლარის ოდენობის სამხედრო პროდუქცია შეიძინა.
1995 წელს სამხედრო დახმარების პროგრამის ფარგლებში ლიბანის თავდაცვის უწყებამ ამერიკული მხარისგან 99 ჯავშანტრანსპორტიორი, 34 საარტილერიო გამწე და 127 ავტომობილი მიიღო.
ბოლო რამდენიმე წლის განმავლობაში სამხედრო დახმარების მოცულობა საგრძნობლად გაიზარდა. მხოლოდ შარშანდელი 2012 წლის განმავლობაში აშშ-მა ახლო აღმოსავლეთის ამ სახელმწიფოს უსასყიდლოდ 140 მილიონი დოლარის სამხედრო პროდუქცია გადასცა. მათ შორის UH-1H-ის ტიპის 6 შვეულმფრენი, მათი სათადარიგო ნაწილები და მფრინავების მოსამზადებელი ტრენაჟორები. სამი წლით ადრე ლიბანელებმა ამერიკელებისგან 12 უპილოტო საფრენი აპარატი RQ-11B მიიღეს. ამრიგად ლიბანი პირველი არაბული სახელმწიფო გახდა, რომელმაც აშშ-ის მთავრობის ნებართვით ამერიკული წარმოების უპილოტო საფრენი აპარატები მიიღო.
დღევანდელი დღის მგომარეობით, ლიბანის განკარგულებაში არსებული იარაღის, სამხედრო აღჭურვილობისა და ტექნიკის დაახლოებით 85% ამერიკული წარმოებისაა. დანარჩენი ნაწილი ბრიტანეთში, საფრანგეთსა და სსრკ-შია დამზადებული.
მოამზადა ნუკრი მგელაძემ topwar.ru- ის მიხედვით.
