2
აპრილიდღის ზოგადი ასტროლოგიური პროგნოზი
პარლამენტში კვლავ იმის გარკვევას ცდილობენ, კონკრეტულად რა არის სექსუალური ხასიათის პროდუქცია და რაზე წესდება რეგულაცია ადმინისტრაციულ სამართალდარღვევათა კოდექსში შესატანი ცვლილებების პროექტით.
აღნიშნულ კანონში შესატან ცვლილებებს პლენარულ სხდომაზე დღეს პირველი მოსმენით იხილავენ. კანონპროექტი ითვალისწინებს ჯარიმის დაწესებას სექსუალური ხასიათის პროდუქციის სკოლამდელი აღზრდის დაწესებულებაში, ასევე, 18 წლამდე ასაკის პირებისათვის განკუთვნილ დაწესებულება-ორგანიზაციებში და ასეთი დაწესებულების ტერიტორიიდან 50 მეტრის დაშორებით რეალიზაციის შემთხვევაში.
ასევე, დაჯარიმებას გამოიწვევს აღნიშნული პროდუქციის რეკლამირება ფართო მოხმარების საქონლის, ტანსაცმლის, სპორტული ინვენტარის, სათამაშოებისა და კვების პროდუქტების რეალიზაციის ადგილებში.
კანონპროექტი ევროპასთან ინტეგრაციის კომიტეტმა მოამზადა და როგორც კომიტეტის ხელმძღვანელმა ვიქტორ დოლიძემ პლენარულ სხდომაზე განაცხადა, მსგავსი ტიპის რეგულაციები არსებობს არაერთ ევროპულ ქვეყანაში და ის მიზნად მოზარდების მავნე ზეგავლენისგან დაცვას ისახავს.
საპარლამენტო უმცირესობისთვის კი გაურკვეველია, კონკრეტულად რა პროდუქციაზე წესდება შეზღუდვა და ჯარიმები და რა იგულისხმება სექსუალური ხასიათის პროდუქციაში. როგორც დეპუტატმა გოგა ხაჩიძემ აღნიშნა, მისთვის საინტერესოა რა შეიძლება იყოს სექსუალური პროდუქცია იმ ქვეყანაში, სადაც არც ერთი "სექს-შოპი" არ მოქმედებს.
პარლამენტის ვიცე-სპიკერის, გია ბარამიძისთვის კი გაურკვეველია, როგორ შეიძლება აეკრძალოს "17 წლის ვაჟკაცს" პრეზერვატივის ყიდვა.
აღნიშნულ საკითხთან დაკავშირებით დისკუსია პარლამენტში ამ წუთებშიც გრძელდება. პლენარული სხდომის დღის წესრიგის გათვალისწინებით კანონპროექტი დღევანდელ კენჭისყრაზე უნდა გავიდეს პირველი მოსმენით.
