როდის აბრაზებენ რეჟისორს ტასო და ჯეკო
"ჩემი ცოლის დაქალებში" და-ძმა ჯეკომ და ტასომ ყველას შეაყვარეს თავი. პატარა მსახიობებს მთელი დღის განმავლობაში ძალიან ბევრი საქმე აქვთ. გაკვეთილების სწავლაც უნდა მოასწრონ და გადაღებებზე დროულად მისვლაც. ორივეს ძალიან მოსწონს პოპულარობა და ისიც, რომ მათგან ინტერვიუს იღებენ. ტასოს, ანუ ქეთა ორბელაძის სურვილია, მისგან ძალიან ბევრი ინტერვიუ აიღონ. გიორგი ბარბაქაძეს მსგავსი სურვილი არ გამოუთქვამს, თუმცა შეკითხვებს, ქეთას მსგავსად, ისიც ხალისიანად პასუხობდა.
- ვიცი, რომ ქეთა "ეკივოკში" მონაწილეობდა და სერიალში მერე დაინტერესდნენ, გიორგი, შენ როგორ გახდი ჯეკო?
- კასტინგზე მოვედი და ბიჭებიდან მე ამირჩიეს.
- მაშინ გაიცანით ერთმანეთი?
ქეთა:
- კასტინგზე დამეგობრება ვერ მოვახერხეთ. მაშინ ვერ გავიცანით ერთმანეთი. პირველად გადაღებებზე ვნახე გიორგი.
- ალბათ ბევრს და-ძმა ჰგონიხართ.
- ბევრ ჩემს კლასელს უკითხავს, მართლა შენი ძმა არის ჯეკოო?
- როგორც ვიცი, გიორგის, შენგან განსხვავებით, ჰყავს დაც და ძმაც.
გიორგი:
- ძმა მსახიობია. ფილმში "რენე მიდის ჰოლივუდში" ჩემი ძმა ერთ-ერთ მთავარ როლს თამაშობს. დას კი საერთოდ არ აინტერესებს მსახიობობა.
- მართალია, ჯერ პატარები ხართ, მაგრამ ალბათ უკვე ზუსტად ხვდებით, რა პროფესია გექნებათ, როცა გაიზრდებით.
ქეთა:
- მე უკვე დიდი ხანია, მსახიობობა და ვიზაჟისტობა მინდა.
გიორგი:
- მე ჯერ არ ამირჩევია პროფესია.
- მსახიობობა არ გინდა?
- მსახიობობაც მინდა და სხვა პროფესიაც, მაგრამ არ ვიცი, რა ავირჩიო.
- ორივეს სპორტსმენი მშობლები გყავთ. ქეთას მამა ფეხბურთელია, გიორგის დედა - ყოფილი კალათბურთელი. სპორტი არც ერთს არ გაინტერესებთ?
გიორგი:
- ფეხბურთი ძალიან მიყვარს. ორი წელი დავდიოდი.
ქეთა:
- მე კალათბურთელობა მომწონს ძალიან და ცურვა.
- იცი ცურვა?
- ჯერ არა, მაგრამ უკვე უნდა დავიწყო სწავლა. მალე ვაპირებ ცურვაზე სიარულს.
- როგორც ვიცი, წელს სკოლაში პირველად წახვედი.
- ტასოც პირველად წავიდა სკოლაში და მეც.
- ტასო პირველ დღეს გაკვეთილზე ცუდად მოიქცა. მაღალქუსლიანი ფეხსაცმელები ჩაიცვა. შენს გმირს ხომ არ ჰგავხარ?
- არა. ტასოს მსგავსად არ მოვქცეულვარ.
- სერიალში თამაში სწავლაში ხომ არ გიშლის ხელს?
- არ მიშლის. როცა გადაღებები არ მაქვს, გახანგრძლივებულში ვრჩები.
- დარწმუნებული ვარ, კლასში ყველაზე პოპულარული იქნები.
- უფროსკლასელები მეხუტებიან ხოლმე. ყველას ძალიან ვუყვარვარ.
- გიორგი, შენ რომელ კლასში ხარ?
- მეხუთეში გადავედი. ძველი მასწავლებელი მეუბნებოდა, კარგი ბიჭი ხარო. ახლა არც ერთი აღარ მაქებს. გადაღებები რომ მაქვს და რამეს ვერ მოვასწრებ, მეუბნებიან, ისწავლე, შვილოო.
- ე.ი. სერიალში თამაშმა კარგად სწავლაში ხელი შეგიშალა?
- არა. გადაღებების გამო რომ ვაცდენ ხოლმე, მაშინ მეუბნებიან, სკოლა არ გააცდინოო. მეც მეხუტებიან უფროსკლასელები და მეუბნებიან, შენ ხომ "ჩემი ცოლის დაქალებში" თამაშობო.
- დავმეგობრდითო, მითხარით, გადაღებების შემდეგ მშობლებთან ერთად მიდიხართ გასართობად?
ქეთა:
- გარე გადაღებების მერე ერთად მივდივართ ხოლმე სახლში.
- გიჩხუბიათ?
- სერიალში ბევრჯერ, მაგრამ სინამდვილეში ხუმრობით ვჩხუბობთ ხოლმე.
გიორგი:
- სინამდვილეში მთელი ძალით არ ვურტყამთ ერთმანეთს.
- სერიალში ერთხელ მარტო დარჩით. ჯეკო კომპიუტერს ვერ მოშორდა, ტასომ კი ცეკვით გული იჯერა. მარტო რომ რჩებით, მაშინ ასე ერთობით?
ქეთა:
- მე მარტო არასდროს დავრჩენილვარ. მხოლოდ ერთხელ, დედიკო და მამიკო უკრაინაში რომ წავიდნენ, ბებოსთან ვიყავი, მაგრამ ის პერიოდი არ მახსოვს. ძალიან პატარა ვიყავი.
- გადაღებებზე რა ხდება ხოლმე? რეჟისორს აბრაზებთ?
- მე არა, გიო აბრაზებს. თუმცა მეც ხანდახან ვაბრაზებ რეჟისორს.
- რატომ აბრაზებთ?
- ვცელქობთ.
გიორგი:
- კი არ ვცელქობთ, უბრალოდ, ხანდახან ტექსტი რომ გვეშლება და ბევრი დუბლია გადასაღები, მაშინ ბრაზდება.
ქეთა:
- ისევე, როგორც დედა, რეჟისორიც არ მიყვირის, უბრალოდ, მსაყვედურობს, როცა ცუდად ვიქცევი და რამეს ვაფუჭებ.
- გადაღებებიდან ყველაზე მეტად რომელი სცენა მოგეწონათ?
გიორგი:
- მე პირველი სცენა მომეწონა ძალიან. ჩიფსებს რომ ვჭამდით და ბებია რომ ჩავკეტეთ.
ქეთა:
- მეც ეგ სცენა მომეწონა და კიდევ ის სცენა, როცა ვიცეკვე. სერიალში ჩემს თავს არ ვუყურებ ხოლმე.
გიორგი:
- მე ვუყურებ სერიალს.
ქეთა:
- სერიალს მეც ვუყურებ. მარტო ჩემს თავს არ ვუყურებ.
გიორგი:
- როცა შენ ჩანხარ, მაშინ თვალებს ხუჭავ?
ქეთა:
- არა, უკან ვიხედები. ასე იმიტომ ვიქცევი, რომ ჩემს თავზე ძალიან მეცინება.
- დარწმუნებული ვარ, რომ ორივეს ძალიან მოგწონთ სერიალში თამაში.
- მე მინდა, რომ სერიალში რომელიმე ჩემი კლასელი ან მეგობარი შემოვიდეს. მაგალითად, მინდა, ჩემთან სახლში ჩემი მეგობარი ან კლასელი მოვიდეს.
- თქვენს გმირებს როგორ შეაფასებდით?
გიორგი:
- ჩემი აზრით, ჯეკო ცელქი ბავშვია. მშობლებს ზოგჯერ უჯერებს და ზოგჯერ - არა. სერიალში ძალიან ცელქი ვარ, ცხოვრებაში - ნაკლებად.
ქეთა:
- ტასო, ჩემი გმირი, სულ ბებოს აბრაზებს. ეს არ მომწონს. ჩემს ნამდვილ ბებიას მარტო სწავლის დროს ვაბრაზებ და სხვა დროს არა. ჯეკო და ტასო უფრო აბრაზებენ ბებიას, ვიდრე გიორგი და ქეთა.
- თქვენი გმირის სახელები მოგწონთ?
- ძალიან მომწონს ტასო. მინდა, ისევე, როგორც სერიალში, ანასტასია მერქვას და გვარად გოცირიძე ვიყო.
გიორგი:
- მე ასე ძალიან არ მომწონს სახელი ჯეკო. გიორგი უფრო მომწონს.
- გიორგი, ალბათ ხშირად გეკითხებიან, ტასო ხომ არ მოგწონსო.
- ასეთ რაღაცებს არ მეკითხებიან. მეუბნებიან, "ჩემი ცოლის დაქალებში" რა მოხდებაო.
- ისე მოგწონს ვინმე?
- არა.
ქეთა:
- იტყუება, მოსწონს.
გიორგი:
- შენ რა იცი, რომ მომწონს, ჩემი სკოლა თვალით არ გაქვს ნანახი.
ქეთა:
- მინახავს. ამის შეყვარებულს ანა ჰქვია.
გიორგი:
- ხუმრობს, არ დაუჯეროთ.
ქეთა:
- აბა, ჰკითხეთ, ბაღში თუ ჰყავდა შეყვარებული.
გიორგი:
- საბავშვო ბაღში არ დავდიოდი და როგორ უნდა მყოლოდა.
ქეთა:
- არ დადიოდი? უი, მტრისას.
- ქეთა, ალბათ შენ მოეწონე რომელიმე ბიჭს კლასში.
- არა, მე არავის მოვწონვარ.
გიორგი:
- კი, ერთ ბიჭს მოსწონს, ვიცი.
ქეთა:
- ნუ იტყუები.
გიორგი:
- აბა, შენ რომ მოიტყუე, კარგი იყო?
მერი კობიაშვილი
(გამოდის ორშაბათობით)
სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე
"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე
