როგორ ერთობიან ტასო და ჯეკო კადრს მიღმა

ქეთა ორბელაძე და გიორგი ბარბაქაძე სერიალში - "ჩემი ცოლის დაქალები" და-ძმის - ტასუნასა და ჯეკოს როლებს ასრულებენ. პატარებმა მაყურებლის სიმპათია ეკრანზე გამოჩენისთანავე დაიმსახურეს. მათ თანდათანობით მსახიობური უნარ-ჩვევები გამოუმუშავდათ და გადასაღებ მოედანზე თავს კიდევ უფრო თავისუფლად გრძნობენ. ქეთა 6 წლისაა, გიო კი - 10-ის. ამბობენ, რომ გადაღებების პროცესი და თავიანთი გმირები ძალიან მოსწონთ.

- ქეთა, როგორც ვიცი, პირველი კლასის მოსწავლე ხარ. სკოლაში სიარული მოგწონს?

- კი, ძალიან მომწონს. სხვათა შორის, უფროსკლასელებიც მცნობენ. ისინი დასვენებაზე რაღაცებს მჩუქნიან, მეფერებიან და მეუბნებიან, - რა საყვარელი ხარო. სკოლაში ყველაფერი მომწონს, განსაკუთრებით - ინგლისური ენის სწავლა და დავალებების შესრულება. მასწავლებელი რასაც მავალებს, აუცილებლად ვასრულებ. "დედა ენა", ასოების სწავლა მომწონს და უკვე კარგადაც ვკითხულობ. საბავშვო ბაღში რომ დავდიოდი, წერა მაშინაც ვიცოდი.

- ალბათ, გადაღებებს ბევრი დრო მიაქვს. მეცადინეობაში ხელი ხომ არ გეშლება?

- არა, დავალებებს მანამდე ვამზადებ, ვიდრე გადაღებაზე წავალ.

- კლასელები რას გეუბნებიან, უკვე ასეთი პოპულარული გოგონა რომ ხარ?

- ამბობენ, რომ კარგად ვთამაშობ; და კიდევ: სერიალში "ჩემი ცოლის დაქალები" მონაწილეობა ჩვენც გვინდაო.

გიო:

- ჩემი კლასელებიც ამას ამბობენ. სერიალი და ჩვენი პერსონაჟები ძალიან მოსწონთ, ხალისობენ და მსახიობობაზე ისინიც ოცნებობენ.

- თქვენ როგორ გრძნობთ თავს გადასაღებ მოედანზე?

ქეთა:

- ახალი სერიების გადაღების პროცესი ძალიან მომწონს, ამას უკვე შევეჩვიე. სერიალს ყოველთვის ვუყურებ და სხვათა შორის, ჩემი თავიც მომწონს. თავიდან ტექსტის დამახსოვრება მიჭირდა, მაგრამ ახლა - აღარ. სერიალში რომ ვთამაშობ, ჩემს მამიკოსაც მოსწონს. ის ფეხბურთელია. დედიკოს გადაღებებზე დავყავარ, სულ ჩემთან ერთად არის.

- შენ როგორი მოსწავლე ხარ?

გიო:

- 54-ე საჯარო სკოლაში ვსწავლობ. ყველაზე მეტად მათემატიკა, ხელოვნება, ისტორია და ქართული ენა მომწონს. ადრე ფეხბურთზე დავდიოდი, ახლა კი სპორტისთვის ვეღარ ვიცლი. უბრალოდ, თავისუფალ დროს ეზოში, სტადიონზე, მეგობრებთან ერთად ვთამაშობ ხოლმე.

- ჯეკოს როლზე როგორ დაგამტკიცეს?

- "კასტინგზე" ბევრი ბიჭი მოვიდა. ჩვენ რაღაცები გაგვაკეთებინეს. ორი თვის შემდეგ დამირეკეს და მითხრეს, - ჯეკოს როლზე ხართ დამტკიცებულიო. ჩემს სიხარულს საზღვარი არ ჰქონდა! მსახიობობა მომწონს, აქ მოსვლა მიხარია.

- გადაღებების პროცესში, როცა რაიმე არ გამოგდით, გიორგი ლიფონავა რას გეუბნებათ?

ქეთა:

- შენიშვნებს არ გვაძლევს, არ გვიყვირის. ის ყოველთვის გვეფერება, თბილად გვექცევა.

გიო:

- თუ რომელიმე კადრის გადაღება დიდხანს არ გამოგვდის ან რაიმეს გავაფუჭებთ, შეიძლება, სულ პატარა შენიშვნა მივიღოთ.

- როგორც ვიცი, შენ ვიზაჟისტობა გხიბლავს.

ქეთა:

- მაგარია, გოგონები მსახიობებს მაკიაჟს რომ უკეთებენ. სხვათა შორის, რაღაცები მეც დავიმახსოვრე და ზოგჯერ, მსახიობები უფლებას მაძლევენ, რომ მათ რაღაცები წავუსვა. მე მაკიაჟს არ ვიკეთებ იმიტომ, რომ ჯერ პატარა ვარ.

- გაპრანჭვა გიყვარს?

- გაპრანჭვაც მიყვარს და ლამაზი კაბების ჩაცმაც. მომწონს ქუსლიანი ფეხსაცმელი და მძივები...

- სერიალში ყველაზე მეტად, ვინ მოგწონს?

- ლიკუნა - კატოს დაიკო და ნინა მომწონს. ჩემი პერსონაჟი, ტასოც ძალიან მიყვარს. ის ჩემნაირია.

გიო:

- მე ლევან ყოჩიაშვილი მომწონს, ჩვენი "მამიკო".

- ქეთა, ერთ-ერთ სერიაში ძალიან მაგრად იცეკვე. ვინ გასწავლა ასე კარგად ცეკვა?

- ცეკვის წრეზე არ დავდივარ, მაგრამ ჩემი დეიდა - ნუკა ცეკვის მასწავლებელია და ის მასწავლის ხოლმე რაღაცებს.

- დედმამიშვილები თუ გყავთ?

- მე - არა, დედისერთა ვარ.

გიო:

- მე დაც მყავს და ძმაც. ჩვენ ყველანი ერთ სკოლაში დავდივართ.

- ბავშვებო, სერიალის გარდა, რა გატაცებები გაქვთ? თავისუფალ დროს როგორ ერთობით?

ქეთა:

- სიმღერაზე დავდიოდი და "ეკი-ვოკიშიც" გამოვდიოდი. იქაც კარგი იყო, მაგრამ სერიალი უფრო მაგარია. ზაფხულში ურეკში, თურქეთში, ზესტაფონში, წყნეთში ვიყავი და კარგადაც გავერთე.

გიო:

- მე ზაფხულში აჭარაში - ბათუმში, ურეკში, ქობულეთში მივდივარ ხოლმე. ზღვა ძალიან მიყვარს და იქ კარგად ვერთობი.

ქეთა:

- როცა სკოლაში ვართ და ეზოში გავდივართ, მე და ჩემი მეგობრები სულ დავრბივართ და "დაჭერობანას", "სახლობანას", "დედაშვილობანას" ვთამაშობთ ხოლმე.

- შოკოლადი და კანფეტი გიყვარს?

- ძალიან მიყვარს. სამაგიეროდ, ტორტი არ მომწონს.

გიო:

- მე ყველაზე მეტად მწვადი და ხინკალი მიყვარს.

ქეთა:

- მეც მწვადი მიყვარს და ქაბაბი. კიდევ, წვნიანები, რომელსაც დედა მიმზადებს.

- კომპიუტერში რას თამაშობთ ხოლმე?

გიო:

- სროლებზე, მანქანებზე, შეჯიბრებებზე რომ არის, ეგეთი თამაშები მომწონს.

ქეთა:

- მე საბავშვო თამაშების საიტებზე შევდივარ, სადაც გოგონებისთვის კარგი გასართობი რაღაცების ნახვა შეიძლება...

თამთა დადეშელი

ჟურნალი ”გზა”

(გამოდის ხუთშაბათობით)