რას აპირებს ივანიშვილის მთავრობა და რისთვის ემზადება სააკაშვილის ხელისუფლება

ნიკა ჩიტაძე და რამაზ საყვარელიძე ერთმანეთს უპირისპირდებიან. პოლიტიკური ექსპერტები ქვეყანაში შექმნილ ვითარებას სხვადასხვაგვარად აფასებენ. ასევე განსხვავებულ შეხედულებებს გამოთქვამენ სააკაშვილის გუნდის მიერ გადადგმულ ნაბიჯებზე და ახალი ხელისუფლების შესაძლებლობებზე. ნიკა ჩიტაძის აზრით, "ქართული ოცნება" დიდი სირთულეების წინაშე აღმოჩნდება, როგორც კი საზოგადოებას ეიფორია გადაუვლის და წინასაარჩევნოდ გაცემული დაპირებების შესრულებას მოითხოვს. მის პოზიციას არ იზიარებს რამაზ საყვარელიძე და მიიჩნევს, რომ ივანიშვილის გუნდი ქვეყანაში არსებულ პრობლემებს ღირსეულად გაუმკლავდება და ხალხს იმედს არ გაუცრუებს...

- როგორ ფიქრობთ - რა მოლოდინი აქვს საზოგადოებას და რას მოითხოვს ახალი ხელისუფლებისგან?

ნიკა ჩიტაძე:

- ვფიქრობ, რომ საზოგადოება პირველ რიგში, სოციალური პრობლემების მოგვარებას მოითხოვს. იმ ათასობით ამომრჩეველს შორის, ვინც "ქართულ ოცნებას" ხმა მისცა, ნამდვილად არიან ივანიშვილის იდეური მომხრეები, რომლებსაც ქვეყნის პრეზიდენტი სძულთ, მაგრამ მათ შორის მრავლად არიან ახალგაზრდები, რომლებმაც "ოცნების" დროშებით სირბილი გასამრჯელოს იმედით დაიწყეს და ასევე არიან ადამიანები, რომლებიც მდიდარი პრემიერისგან უფასო დაზღვევას, ფულად დახმარებას, პენსიების 200 ლარამდე გაზრდას და სოფლის მეურნეობის დასახმარებლად მილიარდიანი ფონდის შექმნას ელოდებიან. მე ნამდვილად გამიხარდება, თუ ახალი ხელისუფლება ამ მოლოდინის გამართლებას შეძლებს, მაგრამ ეს ძალიან საეჭვოდ მეჩვენება.

რამაზ საყვარელიძე:

- ნიკა ძალიან მიყვარს და არ მინდა ვიფიქრო, რომ მას ასეთი ცუდი აზრი აქვს საკუთარ ხალხზე. ძალიან ცუდია, რომ ასეთი მცოდნე, განათლებული ექსპერტი იაფფასიან პროპაგანდას ეწევა. საზოგადოების ძალიან დიდ ნაწილს სააკაშვილის გუნდის მმართველობის პერიოდში უსამართლობის განცდა გაუჩნდა და დღეს პირველ რიგში, მართლმსაჯულების აღსრულებას ელოდება. ჩემ გარშემო მყოფ პირებზე აღარაფერს ვამბობ - ქუჩაში, მაღაზიებსა და საზოგადოების თავშეყრის სხვა ადგილებში ადამიანები ძალიან ხშირად საუბრობენ იმის შესახებ, რომ ყოფილი ჩინოვნიკებისთვის ამდენი უსამართლობის შერჩენა არ შეიძლება. ჯერ არ მსმენია, ვინმეს ეთქვას, რომ ასე ღარიბულად ცხოვრება არ შეიძლებაო.

- ახალ მინისტრთა კაბინეტზე რას ფიქრობთ?

ნიკა ჩიტაძე:

- ახალი მინისტრთა კაბინეტიდან რამდენიმე ადამიანს ნამდვილად აქვს შესაფერისი განათლება და მუშაობის გამოცდილებაც აქვს. მაგალითისთვის გეტყვით, რომ მაია ფანჯიკიძე 15 წლის განმავლობაში დიპლომატიურ სამსახურში მოღვაწეობდა და ვფიქრობ, ის საგარეო კურსის კარგი კოორდინატორი იქნება. ასევე პროფესიონალია ალექსი პეტრიაშვილიც. მივესალმები ჯანდაცვის მინისტრად დავით სერგეენკოს დანიშვნას. მან საჩხერის საავადმყოფოში საკმაოდ კარგი მენეჯერული თვისებები გამოავლინა. მაგრამ არ შემიძლია არ გამოვხატო შეშფოთება იმ ფაქტის გამო, რომ ენერგეტიკის მინისტრად კახა კალაძე დანიშნეს. ენერგეტიკა ეკონომიკის ხერხემალია, ამ დარგში ძალიან ბევრი, მნიშვნელოვანი პროექტია განსახორციელებელი. არ ვიცი, რისი იმედი უნდა გვქონდეს კალაძისგან, რომელიც ამბობს, მთავარია გამოვიზამთროთო.

რამაზ საყვარელიძე:

- ძალიან მიკვირს, რომ "ნაციონალებმა" და მათმა მხარდამჭერებმა ენერგეტიკის მინისტრად კახა კალაძის დანიშვნის გამო განგაში ატეხეს. ნუთუ დაავიწყდათ, რომ მათ ეკონომიკის მინისტრად ვერა ქობალია, გარემოს დაცვის მინისტრად კი გოგა ხაჩიძე ჰყავდათ?! სირცხვილით ხმას როგორ იღებენ, როდესაც გოგა ხაჩიძე ახლაც მათი წარმომადგენელია პარლამენტში?! მე ნანახი მაქვს ზვიად გამსახურდიას, ედუარდ შევარდნაძის და მიშა სააკაშვილის მინისტრთა კაბინეტები. ზვიადის დროს მინისტრები პატიოსნები იყვნენ, მაგრამ - არაპროფესიონალები; შევარდნაძის მინისტრები, პირიქით - პროფესიონალები იყვნენ, მაგრამ - არა პატიოსნები; სააკაშვილის მინისტრები არც პროფესიონალები იყვნენ და არც პატიოსნები; ივანიშვილის მინისტრთა კაბინეტში პატიოსნებიც არიან და პროფესიონალებიც. რაც შეეხება კალაძეს: ბატონმა ბიძინამ ითხოვა, - რამდენიმე თვე მაცალეთ და მისგან პროფესიონალს დავაყენებო. ამ ადამიანს ჯერ არასდროს მოვუტყუებივართ, ჯერ კიდევ არ იყო პრემიერი, როდესაც დაპირებების შესრულება დაიწყო; ნუთუ იმდენ ნდობას არ იმსახურებს, რომ კალაძესთან დაკავშირებით ერთი ამბავი არ დავაწიოთ?!

- თქვენი აზრით, რამდენად გულწრფელები არიან "ნაციონალები", როდესაც ახალ ხელისუფლებას თანამშრომლობას სთავაზობენ?

ნიკა ჩიტაძე:

- როდესაც საქმე ჩვენი ქვეყნის ევროპასთან ინტეგრაციას ეხება, "ნაციონალები" გულწრფელები არიან. ამ ხალხმა ძალიან ბევრი საქმე გააკეთა. რა თქმა უნდა, პრობლემები დარჩა, მაგრამ საერთო ჯამში, ქვეყანა დღეს გაცილებით უკეთესია, ვიდრე "ვარდების რევოლუციამდე" იყო. მნიშვნელოვანია ისიც, რომ მათი სახით, ახალ ხელისუფლებას მაქსიმალურად კონსტრუქციული ოპოზიცია ეყოლება.

რამაზ საყვარელიძე:

- სიმართლე რომ გითხრათ, სულ არ მაინტერესებს, რამდენად გულწრფელები არიან "ნაციონალები". ჩემთვის მთავარია, რომ ახალ ხელისუფლებასთან მართლა ითანამშრომლონ. მერე ღამე, თუ უნდათ, სიმწრით იდაყვებიც დაუკბენიათ.

- ის ფაქტი, რომ "ნაციონალები" ბიძინა ივანიშვილს "რუსულ პროექტად" ასახელებდნენ, მხოლოდ წინასაარჩევნოდ გათვლილი, მიზანმიმართული დისკრედიტაცია იყო?

ნიკა ჩიტაძე:

- ამასთან დაკავშირებით მეც გამომიხატავს ეჭვი, რადგან ივანიშვილი სულ აცხადებდა, რომ ომი საქართველომ დაიწყო; რომ რუსეთს არ უნდა ვუკიჟინოთ, დამპყრობელი ხარო; რომ სააკაშვილი უნდა ვლანძღოთ და არა პუტინი; პუტინს რომ გაეგო, სააკაშვილს ვხვდებოდი, ჩემი ბიზნესი დაიხურებოდაო... ღმერთმა ქნას, ვცდებოდე! ნამდვილად მივესალმები ივანიშვილისა და ფანჯიკიძის განცხადებას (თუ გულწრფელები არიან) იმის შესახებ, რომ ევროპულ სტრუქტურებში საქართველოს ინტეგრაციისთვის ბრძოლას გააგრძელებენ.

რამაზ საყვარელიძე:

- რა თქმა უნდა, ეს წინასაარჩევნოდ გათვლილი შავი პიარი იყო. სხვა რა შეიძლება ყოფილიყო, ნამდვილად ვერ ვხვდები. აბა, თუ მართლა ფიქრობენ, რომ ივანიშვილი რუსეთის კაცი იყო, ახლა რატომ სთავაზობენ თანამშრომლობას? რადგან არჩევნებში გაიმარჯვა, იმიტომ? დარწმუნებული ვარ, არჩევნებში რომ არ გაემარჯვა, მის წინააღმდეგ სისხლის სამართლის საქმეს აღძრავდნენ.

- როგორ გგონიათ - აგვისტოს ომის თავიდან არიდება შესაძლებელი იყო?

ნიკა ჩიტაძე:

- ჩემი აზრით, შეუძლებელი იყო. მოსკოვი დიდი ხანი საქართველოში შემოჭრის საბაბს ეძებდა. შეგახსენებთ მედვედევის განცხადებას, - ჩვენ რომ საქმეში არ ჩავრეულიყავით, საქართველო ნატოს წევრი გახდებოდა და ეს ალიანსი რუსეთის სამხრეთ საზღვართან მოვიდოდაო. საქართველოს ხელისუფლებამ ომის თავიდან ასარიდებლად მაქსიმუმი გააკეთა, მაგრამ მოსკოვმა ქართული სოფლების დაბომბვით, თბილისი კონფლიქტში იძულებით ჩაითრია. საქართველო ვალდებული იყო, რომ საკუთარი მოქალაქეები დაეცვა.

რამაზ საყვარელიძე:

- მე ვფიქრობ, რომ ომის თავიდან არიდება შესაძლებელი იყო. ქართული სოფლების დაბომბვა რუსებს 2008 წელს არ დაუწყიათ: ახალგორის რაიონის სოფლებთან წლების განმავლობაში მიმდინარეობდა პატარ-პატარა შეტაკებები. ჩვენ იმდენს ვახერხებდით, რომ ეს ფართომასშტაბიან ომში არ გადაზრდილიყო. აშკარაა, რომ სააკაშვილმა შეცდომა დაუშვა. ასეთი შეცდომის პატიება პოლიტიკაში დაუშვებელია, რადგან ეს ჩვენ საკუთარი მოქალაქეების სიცოცხლის ფასად დაგვიჯდა.

- თქვენი აზრით, რას ისახავდა მიზნად კოდორისთვის "ზემო აფხაზეთის" დარქმევა და ცხინვალის იურისდიქციაში ახალგორის დაბრუნება?

ნიკა ჩიტაძე:

- დიდი მადლობა, რომ ეს კითხვა დასვით და მე პასუხის გაცემის საშუალება მომეცა. 1922 წლის 20 აპრილს სოციალისტური საქართველოს შემადგენლობაში სამხრეთ-ოსეთის ავტონომიური ოლქი შეიქმნა და ახალგორიც (მაშინ მას ლენინგორი ერქვა) მას მიაკუთვნეს. გარდა ამისა, მისი მოსახლეობის 50%-ს ეთნიკური ოსი შეადგენდა. ლოგიკური იყო, რომ ეს ტერიტორია ცხინვალის ოლქში შეიყვანეს და დიმიტრი სანაკოევს დაუქვემდებარეს. რაც შეეხება "ზემო აფხაზეთს", იქ კოდორის გარდა, კიდევ სამი ხეობაა. თქვენ გგონიათ, მისთვის "ზემო აფხაზეთი" რომ არ დაერქმიათ, რუსები ამ ტერიტორიას არ მიისაკუთრებდნენ?

რამაზ საყვარელიძე:

- ამ თემაზე მსჯელობა და დავა ძალიან დიდხანს შეიძლება გაგრძელდეს, მაგრამ მე ვერაფერს ვიტყვი, ვიდრე ზუსტად არ გავიგებ, რა ტიპის ურთიერთობა ჰქონდა "ნაცმოძრაობას" და მის ლიდერს კრემლთან. ამ საკითხთან დაკავშირებით ძალიან დიდი ეჭვები მაქვს. მგონია, რომ სააკაშვილს კრემლთან მანამდე ჰქონდა ძალიან მნიშვნელოვანი კავშირი, ვიდრე საქართველოს პრეზიდენტი გახდებოდა. აშკარაა, რომ ის გაცილებით დიდ ანგარიშს უწევდა რუსეთს, ვიდრე ხალხს ეგონა. რას ვგულისხმობ? იმას, რომ სააკაშვილი საქართველოში "რუსულ" პოლიტიკას ატარებდა. ეს შემთხვევით ხდებოდა თუ მიზანმიმართულად, გამოძიების დასადგენია.

- ლაფანყურის სპეცოპერაციასთან დაკავშირებით თქვენი პოზიცია როგორია?

ნიკა ჩიტაძე:

- ვფიქრობ, ხეობაში "ბოევიკები" გადმოვიდნენ და საქართველოს ხელისუფლება იძულებული გახდა, სპეცოპერაცია ჩაეტარებინა. სამწუხაროა, რომ ვიღაცებმა ამ ოპერაციის დისკრედიტაცია დაისახეს მიზნად და ხელისუფლებას დააბრალეს, რომ ამ ამბით სხვა, უფრო მნიშვნელოვანი საკითხებიდან უნდოდა საზოგადოების ყურადღების გადატანა.

რამაზ საყვარელიძე:

- ძალიან მეეჭვება, რომ ლაფანყურში "ბოევიკები" მართლა ყოფილიყვნენ. ასეც რომ ყოფილიყო, მათი დახოცვა რატომ გახდა საჭირო? ნუთუ მთელმა ქართულმა არმიამ რამდენიმე "ბოევიკის" ცოცხლად აყვანა ვერ მოახერხა?! ყოველთვის საეჭვოდ მიიჩნევა სპეცოპერაცია, სადაც დიდი მსხვერპლია. როცა ადამიანებს ხოცავ, ეს იმას ნიშნავ, რომ მოწმეებს იშორებ თავიდან.

- ფიქრობთ თუ არა, რომ ჟვანიასა და შარაძის მკვლელობის საქმეები თავიდან არის გამოსაძიებელი?

ნიკა ჩიტაძე:

- თუ უნდათ, გამოიძიონ, მაგრამ ძალიან ცუდია, რომ ამ ყველაფერს პოლიტიკურ სარჩულს უდებენ. ეს არის ბინძური პიარ-კამპანია და ხალხის ფსიქოლოგიის მოწამვლის მცდელობა.

რამაზ საყვარელიძე:

- აუცილებლად უნდა გამოიძიონ. თუ ეს არ მოხდება, ჩათვალეთ - საზოგადოება, მათ შორის მეც, ვიფიქრებთ, რომ ახალმა ხელისუფლებამ მოლოდინი არ გაამართლა.

- რა უნდა გავაკეთოთ იმისთვის, რომ მართლმსაჯულება სამართლიანად განხორციელდეს?

ნიკა ჩიტაძე:

- პირველ რიგში, სასამართლო დამოუკიდებელი უნდა გახდეს და სისხლისსამართლებრივი დევნა პოლიტიკური ნიშნით არ უნდა განხორციელდეს. ჩემი აზრით, საფრთხის შემცველია ის ფაქტი, რომ გენპროკურორად "ქართული ოცნების" წევრი არჩილ კბილაშვილი დაინიშნა: გამორიცხული არ არის, მან პარტიული ინტერესებიდან გამომდინარე, განახორციელოს ამა თუ იმ პირის სისხლისსამართლებრივი დევნა.

რამაზ საყვარელიძე:

- აქ ორი საინტერესო მომენტია: ერთი - ჩვენ უნდა ვისწავლოთ მართლმსაჯულების განხორციელება ისე, რომ ადამიანის უფლებები არ შეილახოს (მთელი ცივილიზებული მსოფლიო ასე ახორციელებს და ჩვენ რა ღმერთი გაგვიწყრება?!), და მეორე - პოლიტიკური ზეწოლისგან გათავისუფლებული მოსამართლეებისგან, პროფესიონალიზმთან ერთად, პატიოსნებაც მოვითხოვოთ.

- ჯარისა და პოლიციის პოლიტიკური ზეწოლისგან გათავისუფლება რამდენად რეალურად გეჩვენებათ?

ნიკა ჩიტაძე:

- მე არ ვფიქრობ, რომ ჯარი და პოლიცია პოლიტიკური ზეწოლის ქვეშ იყო. ახალი ხელისუფლება ცდილობს, "კუდიანებზე ნადირობა" დაიწყოს. ეს იმისთვის სჭირდებათ, რომ თავი იმართლონ, როდესაც წინასაარჩევნო დაპირებებს ვერ შეასრულებენ და სოციალურ პრობლემებს ვერ მოაგვარებენ. მაინც რაში გამოიხატება, რომ ჯარი და პოლიცია პოლიტიზებულია?..

რამაზ საყვარელიძე:

- ჯარი და პოლიცია რომ პოლიტიზებულია, ამაზე მეტყველებს ის ფაქტები, რომლებიც მხოლოდ საქართველომ კი არა, მთელმა მსოფლიომ იხილა და რომლის გამოც პრეზიდენტ სააკაშვილს ბოდიშის მოხდამ მოუწია. მათ ძალიან უნდოდათ ჩვენი დარწმუნება იმაში, თითქოს ძალადობა მხოლოდ ციხეში ხდებოდა, მაგრამ დღეს უკვე ბიზნესმენებიც ალაპარაკდნენ... ვინც იტყვის, რომ ჯარი და პოლიცია პოლიტიზებული არ იყო, უბრალოდ მატყუარაა.

- კულუარებში ამბობენ, რომ ხელისუფლება რევანშისთვის ემზადება. ფიქრობთ, რომ მას ამის შანსი აქვს?

ნიკა ჩიტაძე:

- მე არ ვიცი, რევანში რას ნიშნავს. თუ "ნაციონალური მოძრაობა" ცდილობს, ძლიერ პოლიტიკურ ძალად დარჩეს და 4 წლის შემდეგ არჩევნებში ისევ მიიღოს მონაწილეობა, რევანში რა შუაშია?! ზოგიერთი შესაძლოა, იმაზე ნერვიულობს, რომ "ოცნება" ხალხისთვის მიცემული დანაპირების შესრულებას ვერ შეძლებს (ხალხი ხომ ფოჩიან კანფეტებს ელოდება) და პრეზიდენტი მთავრობას გადააყენებს. ნუ ნერვიულობენ: თუ "ქართული ოცნება" ხალხს დანაპირებს აუსრულებს, ყველაფერი ნორმალურად იქნება და არჩევნები 4 წლის შემდეგ ჩატარდება. მე პირადად, დიდი სურვილი მაქვს, რომ ასე მოხდეს.

რამაზ საყვარელიძე:

- რევანში ნიშნავს სამაგიეროს მიზღვას, ბრძოლაში ან თამაშში დამარცხებისთვის. არა მგონია, ასეთი რამის გაკეთება შეეძლოს იმ პოლიტიკურ გუნდს, რომლის ნაწილიც უცხოეთში გაიქცა, ნაწილი კი ნელ-ნელა გადადის გამარჯვებულის მხარეს. შეგახსენებთ, რომ პარლამენტში უკვე ექვსმა დეპუტატმა დატოვა "ნაციონალური მოძრაობა". სააკაშვილის გუნდს კიდევ ერთ შემთხვევაში შეუძლია რევანშზე წასვლა - თუ ამ საქმეში ფულს ჩადებს. თუმცა ამას არ ვურჩევდი: "ნაციონალებმა" მათ ხელთ არსებული ფული რომ გამოაჩინონ, დასაჭერად ექნებათ საქმე...

ხათუნა ბახტურიძე

ჟურნალი ”გზა”

(გამოდის ხუთშაბათობით)