19
მაისიდღის ზოგადი ასტროლოგიური პროგნოზი
ებრაელი მგზავრი, რომელიც United Airlines-ის თვითმფრინავით მექსიკიდან ჰიუსტონში მიემგზავრებოდა, ახლა პილოტს უჩივის. მგზავრის თქმით, იმ დროს, როდესაც ის თვითმფრინავის საპირფარეშოთი სარგებლობდა, კაბინაში პილოტი შევარდა და გარეთ ძალით გამოათრია.
ისროელ ლიბმა ავიაკომპანიას და აშშ-ს შიდა უსაფრთხოების დეპარტამენტს სასამართლოში უჩივლა. მისი თქმით, უსაფრთხოების დეპარტამენტის ოფიცრები თვითმფრინავის დაშვებისთანავე მასთან მივიდნენ და ხელბორკილებით წაიყვანეს.
- ლიბი და კიდევ ერთი ებრაელი მგზავრი, გვარად სებაგი, აცხადებენ, რომ თვითმფრინავიდან ჩამოყვანის შემდეგ, აშშ-ს საბაჟო და სასაზღვრო ოფიცრებმა ისინი დროებით საკნებში მოათავსეს და მათი ბარგი გაჩხრიკეს.
სასამართლოში შეტანილი სარჩელის მიხედვით, ლიბი საპირფარეშოში დაახლოებით 20 წუთის განმავლობაში იმყოფებოდა, რა დროსაც, ბორტგამცილებელმა მეორე მგზავრი, სებაგი გააღვიძა და მისი მეგობრის შემოწმება სთხოვა. ლიბმა სებაგს აუხსნა, რომ მას კუჭ-ნაწლავის პრობლემები ჰქონდა და დაარწმუნა, რომ მალე გამოვიდოდა. დაახლოებით 10 წუთის შემდეგ, უკვე პილოტი ესტუმრა სებაგს და ლიბის ხელალა შემოწმება სთხოვა. ამის შემდეგ, პილოტმა დაუყვირა ლიბს და საპირფარეშოს სასწრაფოდ დატოვება მოსთხოვა. ლიბმა პილოტს უთხრა, რომ მალე გამოვიდოდა. საპასუხოდ, “პილოტმა საპირფარეშოს საკეტი ჩაამტვრია, კარი გააღო და ნახევრადშიშველი ლიბი გარეთ გამოათრია“.
სარჩელი ირწმუნება, რომ ამის შემდეგ, ლიბი თავს შეურაცხყოფილად და უხერხულად გრძნობდა.
"პილოტი ორივე მგზავრს, ლიბსა და სებაგს თავიანთი ადგილებისგან ხელის კვრით უბიძგებდა, დაჭერით ემუქრებოდა, თან ნეგატიურად საუბრობდა იმაზე, თუ როგორ იქცევიან ებრაელები",- წერია სარჩელში.
ბოლო ინფორმაციით, დაკავებული მამაკაცები მალევე გაათავისუფლეს და ავიაკომპანიამ მათ უსასყიდლოდ გადასცა მეორე დღის თვითმფრინავის ბილეთები.
წყარო: theguardian
მოამზადა: ანა სიბოშვილმა
