სოფელ ჭიაურის სკოლაში სწავლა შეწყვეტილია

მიწისძვრის შედეგად ლაგოდეხის რაიონის სოფელ ჭიაურში 15 სახლი და საჯარო სკოლა სერიოზულად არის დაზიანებული. ამის შესახებ "ინტერპრესნიუსს" სოფლის გამგებელმა, ტარიელ ქიმაძემ განუცხადა.

მისივე თქმით, მიწისქვეშა ბიძგები რამდენჯერმე განმეორდა, რის გამოც მოსახლეობა პანიკაშია და მათ წუხანდელი ღამე ქუჩაში გაატარეს.

სოფლის გამგებლის განცხადებით, შეწყვეტილია სასწავლო პროცესიც, რადგან მიწისძვრამ სკოლის შენობაც დააზიანა.

ქიმაძე ამბობს, რომ ელოდებიან განათლების სამინისტროდან ექსპერტებს, რომლებიც ჩაატარებენ ექსპერტიზას, უსაფრთხოა თუ არა სკოლაში სასწავლო პროცესის აღდგენა.

რაც შეეხება ზარალს, როგორც ქიმაძემ განაცხადა, შექმნილია სპეციალური კომისია, რომელიც ზუსტ ზარალს დაითვლის.

5,4 მაგნიტუდის მიწისძვრა საქართველოს აზერბაიჯანის საზღვართან გუშინ მოხდა.

"ინტერპრესნიუსი"