3
მაისიდღის ზოგადი ასტროლოგიური პროგნოზი
26 სექტემბერს ბესო ჩუბინიძემ "მის ვარსკვლავების" მე-15 დაჯილდოების ცერემონიაზე მიმიპატიჟა, რომელსაც სიმბოლურად შემდეგი სლოგანი მოუფიქრა - "სილამაზე ძალადობის გარეშე". ეს არის კონკურსი პარამეტრების გარეშე, თუმცა ამ ეტაპზე ჭარბწონიანი და გათხოვილი ქალები სცენაზე არ გვინახავს. ათი მონაწილე, რომელიც ჟურნალისტმა და კონკურსის ორგანიზატორმა წარგვიდგინა, საიტზე "სტარ ჯი" მომხმარებელმა ფოტოების საშუალებით თავად შეარჩია. კლუბ "სენატში" მიწვეულ ჟიურის წევრებს მხოლოდ გამარჯვებულის შერჩევა და გოგონებისთვის ნომინაციების დაწესება ევალებოდათ. ჟიური კი შემდეგი შემადგენლობის გახლდათ: ეთერ კაკულია, მამუკა ლომაშვილი, ლიზა ვადაჭკორია, ბედინა, გოგა მესხი და სხვები.
კონკურსანტების წარდგენის შუალედებში იყო მუსიკალური პაუზები, იყო პოლიტიკური პერფორმანსიც, რომლითაც ბესომ თავისი შეხედულება გაგვაცნო შექმნილ ვითარებასთან დაკავშირებით:
- ცალ ხელში მიჭირავს დროშა, რომელიც სოხუმში მქონდა წაღებული ომში, დაჭმუჭნილი, ნატყვიარი და დასვრილი, მე ის ომი წავაგე, მეორე ხელში მიჭირავს ახალი საქართველოს დროშა, რომლითაც ვიყავი 2008 წლის ომში, ოღონდ ამჯერად მებრძოლად არ მიმიღეს. ვიყავი როგორც ჟურნალისტი. სამწუხაროდ, ეს ომიც წავაგე ყველა ქართველთან ერთად. ჩემ უკან ყველა პოლიტიკური პარტიის მაისური კიდია და მე არ მინდა, ამჯერად ამ ადამიანებთან ერთად მესამე ბრძოლაც წავაგო საკუთარ თავთან. ამიტომ მოვუწოდებ ყველა ქართულ პარტიას, გავერთიანდეთ და ერთად ვიბრძოლოთ მესამე ომში გამარჯვებისთვის.
ამ განცხადების შემდეგ საღამო ჩვეულ მხიარულ რიტმს დაუბრუნდა. იყო აზიური ცეკვაც, რეპიც მოვისმინეთ ბედინასგან. ბოლოს გამარჯვებულის ვინაობის დასახელებაც გვაღირსა ჟიურიმ. ეს გახლავთ მარი ქავთარაძე, რომელმაც, იმავდროულად, "მის მომხიბვლელობის" ტიტულიც დაიმსახურა. ტაშს კი ვუკრავდი, მაგრამ მხოლოდ ზრდილობისთვის. ამ კონკურსში პირველად ვნახე გოგონა, რომლითაც მართლაც აღვფრთოვანდი – იზა კურკუმელი, რომელიც, სხვათა შორის, შეყვარებულთან ერთად იყო მოსული და ვერ გაიმარჯვა.
მოკლედ, ასეთი იყო ჩუბინიძისეული პროტესტი ძალადობის წინააღმდეგ. სხვათა შორის, ალბათ არ გაგიკვირდებათ, რომ მას, სიმბოლურად, ქალაქის დასუფთავების სამსახურის მაისური ეცვა...
(გამოდის ორშაბათობით)
