3
აპრილიდღის ზოგადი ასტროლოგიური პროგნოზი
"შეიძლება ბევრმა არ იცოდეს, მაგრამ შეიარაღებული ფორმირებები კახეთშიც იქმნება - ამბობს პოლიტიკური
პარტია "თავისუფალი საქართველოს" დედოფლისწყაროს რაიონული ორგანიზაციის ხელმძღვანელი თამილა გურაშვილი, რომელმაც დაწვრილებით გვიამბო, სად, რომელ სოფლებში მიმდინარეობს ეს პროცესი:
- დღეს საქართველო სერიოზული საფრთხის წინაშე დგას: არსებობს საფუძვლიანი ეჭვი, რომ მთავრობა პროვოკაციების მოწყობას აპირებს, რადგან საქართველოს სხვადასხვა კუთხეში მიმდინარეობს შეიარაღებული ფორმირებების ჩამოყალიბება. ეს ხდება არა მარტო სამეგრელოსა და შიდა ქართლში, არამედ ჩვენთან, კახეთშიც. ჩვენს მხარეშიც ხშირად ჩამოდიან თავდაცვის სამინისტროს წარმომადგენლები, რომლებიც უკვე შეხვდნენ სოფელ მაჩხაანის, მირზაანისა და არბოშიკის მოსახლეობას და წვრთნა ჩაუტარეს. ეს პროცესი ახლა უკვე საზღვრისპირა სოფლებშიც მიმდინარეობს, კერძოდ - ზემო ქედში, არხილოსკალოში, სამთაწყაროში, ქვემო ქედსა და ფიროსმანში.
- ქალბატონო თამილა, მოგვიყევით, როგორ ყალიბდება შეიარაღებული რაზმები?
- ეს, ერთი შეხედვით, უწყინარი პროცესია: თავდაცვის სამინისტროს წარმომადგენლები ხვდებიან მოსახლეობას და იწყებენ ხალხის მობილიზებას. რეზერვში მიჰყავთ მშვიდობიანი მოსახლეობა, განურჩევლად ასაკისა, მარტო ახალგაზრდები კი არა, ზოგიერთი სოფლიდან 75-78 წლის მამაკაცებიც კი. თავდაპირველად მათ ხუთდღიანი წვრთნა უნდა გაიარონ. ურიგებენ ტანსაცმელს, ფეხსაცმელს და შემდეგ ამას შინ ატანენ. ბუნებრივია, წვრთნების დასრულების შემდეგ ისინი სარეზერვო სიაში შეჰყავთ. ზოგიერთ მათგანს იარაღსაც აძლევენ, მაგალითად, სოფელ არბოშიკში ზოგიერთებს იარაღი უკვე შინ აქვთ. ხუთდღიანი წვრთნის შემდეგ იწყება 45-დღიანი წვრთნა. ვინც მასში მონაწილეობას მიიღებს, ჰპირდებიან, რომ გადაუხდიან ხელფასს 800-1000 ლარის ოდენობით. ხალხს უჭირს და, ბუნებრივია, ბევრი ამ თანხის გამოც თანახმაა, რეზერვისტი გახდეს. როცა მეთაურებს ეკითხებიან, რისთვის გვჭირდება ეს სამზადისი, ვის უნდა დავუპირისპრდეთო, პასუხობენ - უნდა დაიცვათ თქვენი სოფელიო. თუმცა ვისგან ან რისგან უნდა დაიცვან, ამას უკვე აღარ ამბობენ.
- იარაღს ყველას ურიგებენ?
- ხუთდღიანი წვრთნის შემდეგ თითოეული მათგანის სახელზე აფორმებენ იარაღს, რომელსაც რაიონის სამხედრო განყოფილებაში ინახავენ. საჭიროების შემთხვევაში გამოგიძახებთ და იარაღს დაგირიგებთო, ეუბნებიან. მთავრობა ამბობს, რომ ეს ჩვეულებრივი სარეზერვო წვრთნებია, მაგრამ რა საჭიროა ეს სამზადისი, რისთვის ხდება ეს ყველაფერი - მტერი მოდის თუ არჩევნებისთვის ემზადებიან - ამ კითხვაზე პასუხი არ არსებობს, თუმცა ფაქტია, რომ კარგი არაფერი ხდება. როდესაც მშვიდობიან მოსახლეობას იარაღს ურიგებ, 75-78 წლის მამაკაცები მიგყავს და რეზერვისტების სიაში წერ, აქ რაღაც ვერაგული ზრახვები იმალება. რა საჭიროა ამდენი რეზერვისტი, როდესაც გყავს ჯარი, გყავს პოლიცია და ყველაფერი გაქვს, რომ მომავალი არჩევნები კანონიერების ფარგლებში ჩატარდეს? სავარაუდოდ, ჩვენი ხელისუფლება აპირებს ქვეყანა სამოქალაქო დაპირისპირებაში ჩაითრიოს, ან რაღაც პროვოკაციები მოაწყოს, თორემ რა საჭიროა შეიარაღებული რაზმების შექმნა ჯერ სამეგრელოში, მერე შიდა ქართლში, ახლა კი კახეთში? ჩვენმა მთავრობამ უნდა განმარტოს - რისთვის არის საჭირო ამ ფორმირებების შექმნა? ფაქტი ჯიუტია: რეზერვისტები უკვე სამხედრო პირები არიან, საგანგებო წვრთნა აქვთ გავლილი და უნდა დაემორჩილონ სამხედრო წესებსა და კანონებს, მით უმეტეს, რომ მათ სახელზე იარაღია გაფორმებული და რასაც უბრძანებენ, უნდა შეასრულონ. მე მგონი ყველა ნორმალურად მოაზროვნე ადამიანი ფიქრობს, რომ უაზრო ომებსა და სამოქალაქო დაპირისპირებებს ჩვენი ახალგაზრდები არ უნდა ეწირებოდნენ. სამწუხაროდ, ჩვენი მთავრობის უაზრო პოლიტიკის შედეგად უამრავი ადამიანი დაიღუპა, მათ შორის დედოფლისწყაროს მკვიდრნიც.
ჩვენი საზოგადოება ძალიან ფხიზლად უნდა მოეკიდოს პროცესებს, რომელიც ჩვენს ქვეყანაში მიმდინარეობს. მეც არ შემეძლო მკითხველისათვის არ გამეზიარებინა ის საეჭვო, უსიამოვნო მოვლენები, რომელიც კახეთში და კონკრეტულად, ჩემს მშობლიურ რაიონში ხდება.
ხათუნა ჩიგოგიძე
ყოველკვირეული გაზეთი "ყველა სიახლე"
(გამოდის ოთხშაბათობით)
