"რატომ გადაწყვიტეთ, რომ რუსეთში უნდა ვიარო?" - როგორ უპასუხა ვაჟა სირაძემ ჟურნალისტის კითხვას, სანქციებთან დაკავშირებით

რატომ გადაწყვიტეთ, რომ რუსეთში უნდა ვიარო? სპეციალურად ავრცელებთ ცრუ ინფორმაციას, - ასე პასუხობს თბილისის საპატრულო პოლიციის ხელმძღვანელი ვაჟა სირაძე მედიის მიერ სანქციებთან დაკავშირებით დასმულ შემდეგ კითხვას: "სამმა ქვეყანამ დაგასანქცირათ და შეიძლება ვერც ერთ ევროპულ ქვეყანაში ვეღარ შეხვიდეთ, მზად ხართ მხოლოდ რუსეთში იაროთ?"

• ვაჟა სირაძის განცხადებით, "აქ არავითარი რუსეთი" არ არის, არამედ არიან პოლიციელები, რომელთა სიცოცხლეს და ჯანმრთელობას საფრთხე ექმნება.

"მინდა განვმარტო, რომ აქ არავითარი რუსეთი და არავითარი მსგავსი რამ არ არსებობს, აქ არიან პოლიციელები, რომელთა სიცოცხლეს და ჯანმრთელობას ექმნება საფრთხე. აქ არიან ადამიანები, აქ არის სტრატეგიული შენობა, რომელსაც ანგრევენ და ცეცხლს უკიდებენ. ამ ქვეყანაში არსებობს კანონი, არსებობს სახელმწიფო და ეს ქვეყანა იქნება წელში გამართული. ჩვენ ყოველთვის მივიღებთ შესაბამის ზომებს“, - განაცხადა ვაჟა სირაძემ.

შეგახსენებთ, ესტონეთის, ლიეტუვისა და ლატვიის მიერ დაწესებული სანქციების თანახმად, ბიძინა ივანიშვილი, ვახტანგ გომელაური, შალვა ბედოიძე, იოსებ ჭელიძე, ალექსანდრე დარახველიძე, გიორგი ბუთხუზი, ზვიად ხარაზიშვილი, მილერი ლაგაზაური, მირზა კეზევაძე, ვაჟა სირაძე და თეიმურაზ კუპატაძე ბალტიისპირეთის სახელმწიფოებში შესვლას ვერ შეძლებენ.

წაიკითხეთ ასევე:

• გაბრიელიუს ლანდსბერგისი იმ პირების სიას აქვეყნებს, ვისაც ლიეტუვაში შესვლა აეკრძალათ, მათ შორისაა ბიძინა ივანიშვილი და ვახტანგ გომელაური