"არ მოვქცეულვარ ჭკვიანურად... გადავწყვიტე, დებატებამდე შემომევლო მსოფლიო" - ბაიდენის აღიარება: პრეზიდენტის თქმით, ტრამპთან დებატებისას თითქმის ჩაეძინა
აშშ-ის პრეზიდენტმა, ჯო ბაიდენმა ტრამპთან მისი დებატების შესახებ ისაუბრა და აღნიშნა, რომ ბოლო კვირებში მის მსოფლიო მოგზაურობებს ამ გამოსვლის შედეგში დიდი როლი ჰქონდა.
"ძალიან ჭკვიანურად არ მოვქცეულვარ, გადავწყვიტე, რამდენჯერმე შემომევლო მსოფლიო... დებატებამდე სულ ცოტა ხნით ადრე. არ მოვუსმინე ჩემს თანამშრომლებს... და შემდეგ, სცენაზე თითქმის ჩამეძინა" - თქვა ბაიდენმა ვირჯინიაში გამართულ ფანდრაიზინგის ღონისძიებაზე დონორებთან საუბრისას,
დებატებამდე პრეზიდენტი კემპ დევიდში იყო და მნიშვნელოვანი გამოსვლისთვის ემზადებოდა. არსებული ინფორმაციით, ის ატლანტაში 27 ივნისს, დებატების დილას გაემგზავრა. კემპ დევიდამდე, 14 ივნისს პრეზიდენტი იტალიაში, G7-ის სამიტზე ჩავიდა.
"ეს არ არის გამართლება, არამედ - ახსნა”, - აღნიშნა ბაიდებმა.
მან ბოდიში მოიხადა, მაგრამ ასევე ხაზგასმით აღნიშნა, რომ მისთვის მომდევნო არჩევნების მოგება "კრიტიკულად მნიშვნელოვანია".
პრეზიდენტმა მოკლედ ისაუბრა - დონორების მიმართ მისმა მიმართვამ მხოლოდ ექვსი წუთი გასტანა.
შეგახსენებთ, გასულ კვირას დებატების დროს ბაიდენის გამოსვლამ ამერიკელები შეაშფოთა, რადგან მას კითხვებზე პასუხის გაცემა უჭირდა და დაბალი და ჩახლეჩილი ხმით საუბრობდა.
ერთ მომენტში ტრამპმა აღნიშნა, რომ ბაიდენის ნათქვამი ვერ გაიგო.
"მართლა ვერ გავიგე, რა თქვა ამ წინადადების ბოლოს", - თქვა ტრამპმა დებატების დროს, - "მგონი, თვითონაც არ იცის".
წაიკითხეთ ასევე: