ფოტოები რუსთაველის გამზირიდან: მთავრობისა და პარლამენტის წევრები ოჯახთან ერთად - რა ხდება ადგილზე?

• ფოტოები: ინტერპრესნიუსი

რუსთაველის გამზირზე, სადაც მოქალაქეები ოჯახის სიწმინდის დღესთან დაკავშირებით იკრიბებიან, გზა გადაიკეტა. ისინი ასევე იმყოფებიან ქაშვეთის წმინდა გიორგის სახელობის ტაძრის ეზოშიც, სადაც 13:00-ზე ოჯახის სიწმინდის დღესთან დაკავშირებით პარაკლისი აღევლინა, რომლის დასრულების შემდეგ სამების ტაძრის მიმართულებით მსვლელობა დაიწყეს.

მცირე პარაკლისი საპატრიარქო ტახტის მოსაყდრე, სენაკისა და ჩხოროწყუს მიტროპოლიტმა შიომ (მუჯირი), სამღვდელოებასთან ერთად აღასრულა. ადგილზე შესრულდა საქართველოს ჰიმნი და საზოგადოებას სრულიად საქართველოს კათოლიკოს-პატრიარქმა მიმართა.

"მადლობა უფალს, მიყვარხარ საქართველო" - თქვა ილია მეორემ.

• ადგილზე იმყოფებიან აღმასრულებელი და საკანონმდებლო ორგანოს წევრები. ისინი ოჯახის სიწმინდის დღესთან დაკავშირებით გამართულ ღონისძიებას შვილებთან და მეუღლეებთან ერთად უერთდებიან. კერძოდ, ადგილზე მივიდნენ პრემიერი ირაკლი კობახიძე, დედაქალაქის მერი კახა კალაძე, პარლამენტის თავმჯდომარე შალვა პაპუაშვილი. ასევე, მინისტრთა კაბინეტის წევრები.

განახლება:

ოჯახის სიწმინდის დღესთან დაკავშირებით, ქაშვეთის წმინდა გიორგის სახელობის ტაძრიდან სამების საკათედრო ტაძრის მიმართულებით მსვლელობა დაიწყო.

მსვლელობაში მონაწილეობს პრემიერ-მინისტრი ირაკლი კობახიძე, პარლამენტის თავმჯდომარე შალვა პაპუაშვილი და დედაქალაქის მერი კახა კალაძე.

მას შემდეგ, რაც მოქალაქეები სამების საკათედრო ტაძარში გადაინაცვლებენ სამადლობელი პარაკლისი შესრულდება.

ინფორმაციისთვის, ბოლო ათი წელია, სრულიად საქართველოს კათოლიკოს-პატრიარქის, უწმინდესისა და უნეტარესის, ილია II-ის ლოცვა-კურთხევითა და ინიციატივით, 17 მაისს ქვეყანაში ოჯახის სიწმინდისა და მშობლების პატივისცემის დღე აღინიშნება. მთავრობის გადაწყვეტილებით, წელს 17 მაისი უქმე დღედ გამოცხადდა.

ნახეთ ფოტოები ადგილიდან