"თბილისი ევროპის დედაქალაქია!" - რა ხდებოდა ბოლო რამდენიმე საათი დედაქალაქში: ფოტოებში ასახული მასშტაბური პროტესტი, მთავარი მესიჯები აქციიდან და გეგმა

• ფოტოები: გიორგი ჟამერაშვილი და გიორგი ნიკოლიშვილი, ინტერპრესნიუსი

ევროპის მოედანზე „უცხოური გავლენის გამჭვირვალობის შესახებ“ კანონპროექტის საწინააღმდეგო აქცია დასრულდა. პროტესტის მონაწილეები ტერიტორიას ტოვებენ.

მანამდე ორგანიზატორებმა შეკრებილ საზოგადოებას სცენიდან არაერთხელ მოუწოდეს, რომ ხვალ 22:00 საათზე პარლამენტთან მივიდნენ და მიმართეს სიტყვებით: „ერთად გავუთენოთ საქართველოს“.

მათ აქციის მონაწილეებს მოუწოდეს, ხვალინდელი დღისთვის განსაკუთრებულად მოემზადონ. კერძოდ კი, თან იქონიონ საწვიმრები, ტელეფონის დამტენები, წყალი და ყველა ის ატრიბუტი, რაც მათ ღამის გათევის დროს დასჭირდებათ.

ევროპის მოედანზე სიტყვით გამოსვლები და კონცერტი გაიმართა.

რატი ამაღლობელი: “გაგიმარჯოს საქართველო! დღეს საქართველო ყველა მიმართულებიდან დაიძრა, მტკვარს, სამას არაგველს გამოუყვა, მარცხენა და მარჯვენა გააერთიანა. ჩვენი მოძრაობა 9 აპრილს დაიწყო. ახლაც, პირველი მარში 9 აპრილს იყო. ჩვენ 26 მაისს უნდა გავიმარჯვოთ და ეს დღე ერთად უნდა ვიზეიმოთ. გაუმარჯოს ჩვენს გზას 9 აპრილიდან 26 მაისამდე. გამოვიარეთ რუსთაველი, მარჯვენა და მარცხენა სანაპირო და საქართველოს ისტორიის გულში მოვედით. ჩვენი გული ფეთქავს! ჩვენ ჩვენი გულებიდან გავათბეთ და ავანთეთ საქართველო, როგორც ელვარე და ჩაუქრობი ვარსკვლავი ევროკავშირის დროშაზე. ადამიანებო, რომლებიც ერთმანეთს საქართველოს სიყვარულით იცნობთ, ერთმანეთს ხელები მოკიდებთ და მაღლა აწიეთ. ეს არის საქართველო - თავისუფალი, ლაღი, მოძრავი, შეუჩერებელი! ჩვენ ხვალ ერთად უნდა გავუთენოთ ამ ქვეყანას. ამდენი და კიდევ მეტი უნდა ვიყოთ ხვალ. დავენახოთ მსოფლიოს!”.

ლაშა ბუღაძე: "ეს დღეები, დღევანდელი დღეც, ხვალინდელი და შემდგომი დღეები საქართველოს ისტორიისთვის არის გადამწყვეტი და უმნიშვნელოვანესი. დღეს აქ ვართ ევროპის მოედანზე, ზევიდან დაგვცქერის ვახტანგ გორგასალი, აქ ჰყავდათ ჩვენი წმინდა პატრიარქი ამბროსი ხელაია დაპატიმრებული “ბოლშევიკებს”. საქართველოს ბედი გადაწყვეტილია, ის იქნება დამოუკიდებელი და ევროკავშირის წევრი! ამიტომ, მეგობრებო, დღევანდელი ზეიმი გულისხმობს ჩვენს პოლიტიკურ მობილიზებასაც. ხვალ არის მნიშვნელოვანი დღე. ზეგ, ორშაბათს, “ქართულმა ოცნებამ” ივანიშვილის მარიონეტებმა დანიშნეს საკომიტეტო სხდომა 09:00 საათზე. ჩვენ უნდა ჩავხედოთ ამ 83 დეპუტატს თვალებში! არ უნდა მიიღონ რუსული კანონი, ამიტომ ბევრი უნდა ვიყოთ. ხვალ საღამოს, 22:00 საათიდან შევიკრიბოთ ეროვნულ და წმინდა, ანტირუსულ ადგილზე პარლამენტის წინ! გავათენოთ საქართველოსთვის! რაც ბევრი ვიქნებით და არ დავიღლებით, უფრო მალე გაიტანენ უკან რუსულ კანონს. მთელი მსოფლიო, ცივილიზაცია ჩვენ შემოგვცქერის. თბილისია ევროპის დედაქალაქია”.

მკვლევარი გია ჯაფარიძე: "საქართველო უნდა გახდეს იმ სივრცის ნაწილი, სადაც ადამიანებს არ სცემენ, სადაც სახელმწიფო არ არის დაკავებული საკუთარი მოქალაქეების ტერორით, ჩვენ უნდა გავხდეთ ამ სივრცის ნაწილი. ჩვენ ვიქნებით თავისუფალი ევროპის თავისუფალი მოქალაქეები, ან ჩვენ ვიქნებით იმ სახელმწიფოში, სადაც ასეთი სახით, ასეთი იარებით ივლიან ადამიანები. ჩვენ ვდგავართ გზაგასაყარზე - არჩევანი არის ძალიან მარტივი, ან ჩვენ ვინარჩუნებთ თავისუფლებას, ან ჩვენ ვკარგავთ თავისუფლებას. ახლა, როდესაც ჩვენ აქ ვართ შეკრებული საქართველოს თავისუფლების დასაცავად, უამრავი ადამიანი არის, ან ნაცემი, ან დაკავებული, ჩვენ უნდა გავაგონოთ ჩვენი ხმა მათ, კიდევ ერთხელ უნდა მოვთხოვოთ რუსეთის მარიონეტ ხელისუფლებას, გამოუშვან დაკავებული პოლიტიკური პატიმრები. გამოუშვით! ჩემი მდგომარეობიდან გამომდინარე, ბევრი საუბარი და ყვირილი არ შეიძლება, ამიტომ კიდევ ერთხელ, ხალხო, ხვალ ყველა უკლებლივ, ვინც დღეს აქ ვართ, ვკიდებთ ხელს მინიმუმ ერთ ადამიანს და ვუთენებთ საქართველოს, ვუთენებთ თავისუფლებას, ვუთენებთ ჩვენს შვილებს, ვუთენებთ ჩვენს სტუდენტებს, ვუთენებთ ჩვენს მომავალს, ვუთენებთ ჩვენს თავისუფლებას“, - განაცხადა გია ჯაფარიძემ.

„უცხოური გავლენის გამჭვირვალობის შესახებ“ კანონპროექტის საწინააღმდეგო აქცია ხვალ უნდა განახლდეს. ორგანიზატორებმა ხვალ, პარლამენტთან ღამის გათენება დააანონსეს, რათა 13 მაისს, დეპუტატებს პარლამენტში შესვლისა და იურიდიულ საკითხთა კომიტეტზე კანონპროექტის მესამე მოსმენით განხილვის შესაძლებლობა არ მისცენ.

ნახეთ ფოტოები: რა ხდებოდა მსვლელობისას, სანამ აქტივისტები "ევროპის მოედანზე" მივიდოდნენ