ცნობილი მწვრთნელის, ეთერ თუთბერიძის ქალიშვილი და მისი მეწყვილე, რომლებიც საქართველოს სახელით ასპარეზობენ, ევროპის ჩემპიონატზე, პირველი ტურის შემდეგ, 33 მონაწილეს შორის მე-7 ადგილზე არიან

2024 წლის ევროპის ჩემპიონატზე ფიგურული ციგურაობაში, ლიეტუვას ქალაქ კაუნასში, დღეს მოცეკვავე წყვილებმა რიტმულ ცეკვებში იასპარეზეს, რომლის თემატიკა იყო 80-იანი წლების მუსიკა. 21 ქვეყნის 33 მონაწილეს შორის საქართველოს ნაკრების წევრმა დიანა დევისისა და გლებ სმოლკინის წყვილმა 76,33 ქულა დააგროვა და სატურნირო ცხრილში ჯერჯერობით მე- 7 პოზიციაზეა. წყვილი წელს პირველად ასპარეზობს ევროპის ჩემპიონატზე საქართველოს სახელით. სპორტულ ცეკვებში თავისუფალი პროგრამა გაიმართება 13 იანვარს.

გასული წლის ზაფხულში ცნობილი გახდა, რომ რუსეთის ფიგურული ციგურაობის ფედერაციამ მოციგურავე წყვილს დიანა დევისს და გლებ სმოლკინს საქართველოს გუნდში ასპარეზობის უფლება მისცა. ისინი მანამდე სწორედ რუსეთის სახელით გამოდიოდნენ.

დიანა დევისი ეთერ თუთბერიძის ქალიშვილია. თუთბერიძეს სპორტული სამყარო კარგად იცნობს, ის ფიგურულ სრიალში რუსეთის დამსახურებული მწვრთნელია. დიანა დევისის სპორტული პარტნიორი გლებ სმოლკინი მისივე მეუღლეა. დიანა და გლები აშშ-ში ცხოვრობენ და იქვე ვარჯიშობენ.

შეგახსენებთ,11 იანვარს, ისტორიაში პირველად - ფიგურულ ციგურაობაში ქართველების ანასტასია მეტელკინასა და ლუკა ბერულავას სპორტული წყვილი ევროპის ჩემპიონატის ვერცხლის პრიზიორი გახდა.

იხილეთ ასევე:

• ისტორიაში პირველად - ფიგურულ ციგურაობაში ქართველების სპორტული წყვილი ევროპის ჩემპიონატის ვერცხლის პრიზიორი გახდა