13
აპრილიდღის ზოგადი ასტროლოგიური პროგნოზი
მისი ნამღერი ვიდეო ინტერნეტში წამიერად ვრცელდება. ასე იყო გუშინაც, როდესაც ნინო ზამბახიძის (ფერმერთა ასოციაციის თავმჯდომარე) მიერ გავრცელებულმა ვიდეომ ინტერნეტი სრულიად მოიცვა. კადრში ჩანს ქალბატონი ნინოს დედა, ლიკა დგებუაძე, რომელიც ალექსანდრე ალიმბარაშვილის ტაქსიში აღმოჩნდა (ვიდეოს ავტორი - ანი ფოჩხუა)...
ვიღაცებისთვის ალექსანდრე მხოლოდ ტაქსის (ერთ-ერთი კომპანიის) მძღოლია, თუმცა ამის პარალელურად ის გიდია. ტურისტებს საქართველოს აცნობს, მანქანითაც თავად ემსახურება და ფოტოებს უღებს. მაგრამ ეს ყველაფერი არ არის მასზე. ალექსანდრე AMBEBI.GE-ს რესპონდენტია და ამბავს საკუთარ თავზე თვითონ გვიყვება.
- გიდი, ტურ-ოპერატორი, ფოტოგრაფი, მძღოლი და ლირიკული ტენორი - ამდენი რამე ერთ ადამიანში?
- ასე გამოვიდა. უკვე 10 წელია, მარტო ვმუშაობ, ჩემი, ანუ ერთი კაცის ტურისტული კომპანია მაქვს.
- ტაქსის კომპანიაშიც მსახურობთ?
- როცა არ მაქვს ტურები, ტაქსით ვმუშაობ. საღამოს, 8 საათის მერე გამოვდივარ. დამატებითი შემოსავლისთვის ურიგო არ არის, თან მე საკუთარი ახალი და კარგი მანქანები მყავს, ამიტომ დისკომფორტი საერთოდ არ მექმნება, თუნდაც საცობში მუშაობით არ ვიღლები. ამასთან, მანქანით მგზავრობა მიყვარს. ასე რომ, ამ ყველაფრისგან დისკომფორტი არ მაქვს. უსაქმოდ სახლში ჯდომა არ მიყვარს და ვცდილობ, ვიმუშაო. ზოგადად ტაქსისტობა ჩემთან იმ გაგებით არ ჯდება, რომ მანქანაზე ტრაფარეტიც არასდროს დამიდგამს, განა მეთაკილება, არა. ამ კონკრეტულ კომპანიას კორპორატიული გამოძახებები აქვს, თან ჩართულია პრემიუმი და ბიზნესკლასი, ამის გამო იქ ვიღაც შემთხვევითი მგზავრი არ ჩაგიჯდება.
- მოკლედ, დიდად არ იგრძნობა, რომ ტაქსაობთ და თან მგზავრებს უმღერით კიდეც...
- კი, ხალხი გადამყავს და დადებით განწყობას ვუქმნი. როცა ვმღერი, ზოგადად, თვითონაც მსიამოვნებს. უცხოელებს ჩემი სიმღერა უფრო აინტერესებთ. ეს ვიდეო, რაც გუშინ გავრცელდა, ხალხმა კი ნახა, მაგრამ მანამდე კიდევ ერთ უცხოელს ვუმღერე და გაგიჟდა... გუშინ სულ 6-მა ადამიანმა მოისმინა ჩემი ნამღერი.
- საერთოდ პროფესიით ვინ ხართ?
- ილიას უნივერსიტეტში ბიზნესის ფაკულტეტი მაქვს დამთავრებული და კონსერვატორიაში - საოპერო ვოკალი. "ილიაში" მეორადზე ტურიზმის კუთხით ვისწავლე. სამივე პროფესიას ვიყენებ...
- საოპერო ვოკალს და კონსერვატორიას არ ველოდი...
- კი, 4 წლის განმავლობაში დილას ჯერ ერთ უნივერსიტეტში ვიყავი, შუადღეს - მეორეში... მანამდე ათწლედი დავამთავრე - 5 წლიდან ვმღერი. მოკლედ, 30 წელია ამ სფეროში ვარ. მაქვს სიმღერის ნიჭი და რატომაც არ გამოვიყენო?!. რაც კარგად გამოგდის, ის უნდა გააკეთო.
- მერე საოპერო ვოკალის მიმართულებით რატომ არ წახვედით?
- ანაზღაურებადი არ არის... ახლა ძალიან ბევრ საქმეს ვაკეთებ, ჩემს უკან ბევრი ხალხია, ვისაც გვერდში ფინანსურად ვუდგავარ. სიმღერაზე რომ გადავერთო, ეს მატერიალურად უკან დამხევს. ანაზღაურებადი რომ იყოს, კიდევ გავრისკავდი... თან დაუფასებელი პროფესიაა... ახლა ასე, ჩემით, ვცდილობ ხოლმე, ხალხს გული გავუხარო...
- ტაქსიში მგზავრი რომ ჯდება, სიმღერას მაშინვე იწყებთ?
- ვეკითხები, ვუთანხმებ, თუ მეტყვიან, რომ კი მოსწონთ, მერე ვუმღერებ.
- ტურზეც უმღერით ადამიანებს?
- მათ ჩემი ინსტაგრამ-გვერდიდან იციან რომ ვმღერი, თუმცა არიან ისეთები, რომლებსაც მაინც არ სჯერა, რომ დავიწყებ ხოლმე, გაოცებული მიყურებენ... ტურისტებთან მუშაობას კიდევ სხვა ენერგია მოაქვს. ძალიან მიყვარს საქართველო, მთაში საფეხმავლო ტურებიც მაქვს, სვანეთში დამყავს ხალხი. ამ დატვირთვას ვუძლებ, რადგან სპორტსმენიც ვარ. ადრე „მამულშიც“ ვცეკვავდი, კალათბურთს კოლია დერიუგინთან ვთამაშობდი... საერთოდ, როცა მხოლოდ ფინანსების გამო არ მუშაობ და როცა შენი საქმე გიყვარს, ნებისმიერ სფეროში ასეა - ყველაფერი დადებითად გამოგდის. ეს ხარისხზეც აისახება. ამასთან, როცა კმაყოფილ ტურისტებს ვხედავ, ესეც სასიამოვნოა. ისინი არასდროს ამბობენ, რომ მათი გიდი ვარ, ამბობენ, რომ მეგობარი ვარ. ჩვენ შორის მეგობრული ურთიერთობა და ატმოსფერო ყალიბდება.
- ცხადია, ენებიც იცით...
- სამი ენა ვიცი - ინგლისური, არაბული და რუსული. კომენტარები წავიკითხე, საწყალი, როგორ ტაქსაობს. რატომ უნდა ტაქსაობდესო?.. ნუ, ამას ისინი წერენ, ვისაც ჩემს შესახებ მეტი ინფორმაცია არ აქვთ... ზოგადად, ადამიანი თუ მუშაობს და საქმე აქვს, არ ვთვლი, რომ საწყალია. პირიქით, უნდა უხაროდეს, რომ საქმე აქვს. ჩვენში რატომღაც ტაქსიზე მუშაობა ეთაკილებათ. საერთოდაც არა, ახალი მანქანაა, კომფორტულად ვარ და შემოსავალიც საკმაოდ კარგია. თუ არ დაგეზარება, იმუშავე და უკმაყოფილო არ დარჩები.
- გიდობამ რა მოგიტანათ?
- სახელი იმ გაგებით, როგორც ბევრმა კომპანიამ მითხრა, თურმე ცნობილი ვყოფილვარ. ამით დიდად არ ვინტერესდები, სად ვარ ცნობილი. ჩემს საქმეს ვაკეთებ გულიანად და მორჩა. გიდების ასოციაციიდანაც დამირეკეს და იგივე მითხრეს, მაგრამ პოპულარობა დიდად არ მხიბლავს... ტელევიზიებშიც არაერთხელ ვყოფილვარ მიწვეული, მაგრამ ამის ინტერესიც არ მაქვს. ჩემთვის ყველაზე მთავარია, რაღაც ღირებული გავაკეთო... თუმცა, სასიამოვნოა ხალხის დადებითი რეაქციები.
- გიდისთვის აუცილებელი რა თვისებებია?
- თავაზიანობა, მანქანის სუფთად და წესრიგში ყოფნა, არამწეველი ვარ, არც ვსვამ, გასაგებია, რომ მანქანაში არც ვაწევინებ და არც ვაჭმევ. ვცდილობ, მაქსიმალური სერვისი შევუქმნა. გულით ვემსახურები, ველოდები და ყველგან დავყვები მთელი პასუხისმგებლობით. გიდისთვის კიდევ ბევრი ეთიკური საკითხია დასაცავი და აუცილებელიც.
- საკუთარ ოჯახზე რას გვეტყვით?
- ყოფილ მეუღლეს 4 წელია დაშორებული ვარ, მარტო ვცხოვრობ. მყავს 7 წლის გოგონა, რომელსაც ვეხმარები... ბავშვობის ოცნება იყო, არ მყოლოდა უფროსი და ჩემი კომპანია მქონოდა. რაც მინდოდა, ის მეკეთებინა და ასეც არის. ჩემი ოცნებაც იყო ცხადია, შვილი და მქონოდა იმის საშუალება, რომ ყველას, გარშემომყოფებს დავხმარებოდი. დღეს ყველაფერი ასეც არის. ბევრი რამ ჩემს ცხოვრებაში დედას დამსახურებაა, ყველგან დამყვებოდა და მეუბნებოდა, რომ ქუჩა არ გინდა, საქმე ჯობიაო. მეც 15 წლიდან ვმუშაობ. ადრევე შევეჩვიე ამ ყველაფერს, საკუთრის ქონას და სხვების დახმარებას. ასეთი ამბებია ჩემთან...
საოპერო მომღერლობა ანაზღაურებადი არააო??თუ კარგი მომღერალი ხარ ერთ სპეკტაკლში გამოიმუშავებ იმდენს რასაც შეიძლება 2 თვეში შოულობ..გაქვს მაგის მონაცემები,მაგრამ ეტყობა დღევანდელი კვერცხი ამჯობინე ხვალინდელ ქათამს...სამწუხაროა
მარტო მე რაც ვიცი 4 ცოლი ყავდა და ერთი მაგდენს კიდე მოასწრებს 🙄😂😂