“საქართველო, ლამაზო...” - ევროკავშირის ელჩის მილოცვა ქართულ ენაზე, პრემიერის და "ოცნების" სხვა ლიდერების გამოსვლა და სიტყვის გარეშე დატოვებული პრეზიდენტი - რა ხდებოდა თავისუფლების მოედანზე?
საქართველოსთვის ევროკავშირის წევრობის კანდიდატის სტატუსის მინიჭებას თბილისში, თავისუფლების მოედანზე აღნიშნავენ. ღონისძიება, მთავრობის ორგანიზებით იმართება.
შეკრებაზე პირველი სიტყვით გამომსვლელი იყო პრემიერ-მინისტრი ირაკლი ღარიბაშვილი.
"ეს ისტორიული გამარჯვება გეკუთვნით თქვენ, ჩვენს დაუმარცხებელ, ამაყ, თავისუფლებისმოყვარე ქართველ ხალხს. დიახ, მეგობრებო, ჩვენ ვიბრძოლეთ, ბევრი ვიბრძოლეთ და ერთად გავიმარჯვეთ. ჩვენ, ხელისუფლებამ და ხალხმა ერთად მოვიპოვეთ ევროკავშირის კანდიდატი ქვეყნის სტატუსი... ჩვენ ვიბრძოლეთ და ვიშრომეთ ქართველი ხალხის სახელით. ჩვენ ერთად მოვიპოვეთ ეს გამარჯვება. დიახ, მეგობრებო, ჩვენ არ დავდექით ცალ ფეხზე, მუხლისჩოქებზე, დავდექით მტკიცედ და ღირსეულად მოვიპოვეთ ეს გამარჯვება... მე მინდა, გითხრათ, რომ ეს გზა, რა თქმა უნდა, არ იყო იოლი. ჩვენ ძალიან ბევრი განსაცდელი გავიარეთ, ბევრი სირთულე შეგვხვდა, მაგრამ მტკიცეთ გავიარეთ ეს გზა და მოვედით დღევანდელობამდე", - მიმართა შეკრებილ მოქალაქეებს ირაკლი ღარიბაშვილმა.
პრემიერმა კიდევ ერთხელ განაცხადა, რომ ხელისუფლებამ ომის თავიდან აცილება შეძლო. "ჩვენ ერთად გავიმარჯვეთ, ერთად დავამარცხეთ ჩვენი ქვეყნის შიდა თუ გარე მტრები. ის მოწინააღმდეგე ძალები, რომლებიც ებრძოდნენ ჩვენი ქვეყნისთვის კანდიდატის სტატუსის მინიჭებას... ჩვენ ასევე თავიდან ავიცილეთ მთავარი განსაცდელი, ომი და უბედურება. ჩვენ შევინარჩუნეთ მშვიდობა, დავიცავით ჩვენი ხალხი და ჩვენი ქვეყანა, - თქვა ღარიბაშვილმა და განაგრძო, - 14 დეკემბერი და დღევანდელი დღე შევა საქართველოს ისტორიაში, როგორც ამაყი და ღირსეული ქართველი ერის დამსახურებული გამარჯვების დღე. დღეიდან საქართველო ევროპული ქვეყანა გახდა".
პრემიერ-მინისტრმა მადლობა გადაუხადა ევროპელ, ამერიკელ მეგობრებს და მხარდამჭერებს, ასევე, ევროკავშირის ელჩს. "გუშინ მე პირადად გადავეცი მადლობა ჩვენს ევროპელ ლიდერებს, რომლებმაც მხარი დაგვიჭირეს", - განაცხადა მან.
ირაკლი ღარიბაშვილის განცხადებით, მთავარი ოცნება არის ერთიან ძლიერ ევროპულ სახელმწიფოში ცხოვრება. სიტყვით ასევე გამოვიდნენ პარლამენტის თავმჯდომარე შალვა პაპუაშვილი, "ქართული ოცნების" თავმჯდომარე ირაკლი კობახიძე და თბილისის მერი კახა კალაძე.
შეკრებას შეუერთდა საქართველოს პრეზიდენტი სალომე ზურაბიშვილი, რომელმაც ჟურნალისტებთან საუბარში ბრძანა, რომ თუკი საშუალება მიეცემოდა, მზად იყო სცენიდან მოქალაქეებისთვის მიემართა, თუმცა "ქართული ოცნების" ხელისუფლება ეს არ გააკეთა.
"ჯერ არ ვიცი მბლოკავენ თუ არა, მე ძალიან ოპტიმისტი და იმედიანი ადამიანი ვარ, ამიტომ არ ვკარგავ იმედს.
როგორ გგონიათ, ყველაფერს არ ვკითხულობ და არ ვისმენ? არა მაქვს რეაქცია, რეაქცია არის, რომ დღეს უნდა ვიზეიმოთ, ყველა ერთად ვიყოთ, ამის ჩემი გამოხატულება არის ის, რომ აქ ვდგავარ წყნარად, სიტყვას მომცემენ - ძალიან ბედნიერი ვიქნები, არ მომცემენ სიტყვას - გავივლი ხალხთან, ეს არის და ეს“, - განაცხადა ზურაბიშვილმა ღონისძიების დასაწყისში.
სცენიდან არავის უხსენებია სალომე ზურაბიშვილის დამსახურება სტატუსის მიღებაში. ერთადერთი, ვინც თავისი გამოსვლა პრეზიდენტის მისალმებით დაიწყო ევროკავშირის ელჩი პაველ ჰერჩინსკი იყო.
მან ქართველ ხალხს ქართულ ენაზე მიმართა.
"მოგესალმებით, ქალბატონო პრეზიდენტო, ბატონო პრემიერო, ბატონო პარლამენტის თავმჯდომარევ, პოლიტიკურო ლიდერებო, ბატონო მერო, ბატონო ელჩებო, ძვირფასო საზოგადოებავ, გილოცავთ, დღეს ისტორიული დღეა!
ევროკავშირის ოცდაშვიდმა სახელმწიფომ ერთხმად გადაწყვიტა საქართველოსთვის კანდიდატის სტატუსის მინიჭება.
გილოცავთ პოლიტიკურ ლიდერებს, გილოცავთ საჯარო მოხელეებს, გილოცავთ სამოქალაქო საზოგადოებას, გილოცავთ მედიას. მაგრამ, უპირველეს ყოვლისა, გილოცავთ საქართველოს მოსახლეობას, რომელიც ერთგულად უჭერს მხარს ევროკავშირში ინტეგრაციას. ევროკავშირში მკაფიოდ ისმის საქართველოს მოსახლეობის ხმა. ისევე როგორც, აქ და ახლა, მე მესმის თქვენი.
დღევანდელი გადაწყვეტილება თითოეული თქვენგანის მიერ გაწეული ძალისხმევის დაფასებაა. ეს ნამდვილად წინგადადგმული ნაბიჯია, თუმცა, საბოლოო მიზანი ევროკავშირის წევრობაა. ამიტომ, ახლა დროა პოლიტიკურმა ლიდერებმა აღასრულონ ხალხის ნება და სწრაფად გაატარონ რეფორმები.
საქართველოს სახელმწიფოს გერბზე წერია - ძალა ერთობაშია. დღეს, ჩემი მთავარი გზავნილიც სწორედ ეს არის - ახლა ევროპული მომავლისთვის გაერთიანების დროა! თითოეული თქვენგანი საქართველოს თანამედროვე ისტორიას ქმნის.
ევროკავშირის წევრობა მოიტანს მშვიდობას, სტაბილურობას და ეკონომიკურ კეთილდღეობას თქვენთვის, თქვენი ოჯახებისა და მომავალი თაობებისთვის. თავის მხრივ, საქართველოს უნიკალური კულტურა და ტრადიციები ევროკავშირს მრავალფეროვნებას შემატებს.
ეს დღე ძალიან ემოციურია ჩემთვის და ჩემი გუნდისთვის. მიხარია, რომ ამ დღეს ერთად ვზეიმობთ.
კიდევ ერთხელ გილოცავ, “საქართველოო, ლამაზო, სხვა საქართველო სად არის?”
წინ, საქართველო, წინ!" - თქვა მან.
სცენაზე მასთან ერთად ევროკავშირის ქვეყნების ელჩებიც იდგნენ. ბატონი ჰერჩინსკის გამოსვლის შემდეგ თავისუფლების მოედანზე კონცერტი დაიწყო.
იხილეთ ასევე: