"როცა კანონს იღებ, სადაც წერ, რომ ქვეყანაში კარვის დადგმა არ შეიძლება, ეს შეშინებული ხელისუფლების გადაწყვეტილებაა" - გიორგი ბოტკოველი
"ნაციონალური მოძრაობის“ რეგიონული მდივანი გიორგი ბოტკოველი, შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრების თაობაზე ცვლილებების ინიცირებას „დამფრთხალი და შეშინებული ხელისუფლების საქციელს“ უწოდებს.
როგორც ბოტკოველმა ჟურნალისტებს განუცხადა, ხალხში არსებულ მსგავსი კანონების მიღება ვერ შეაჩერებს.
"ეს არის დამფრთხალი, შეშინებული ხელისუფლების საქციელი. როდესაც კანონს იღებ, სადაც წერ, რომ ქვეყანაში კარვის დადგმა არ შეიძლება, ან სამართლებრივი კონსტიტუციური პროტესტის გამოხატვის შეზღუდვებს განსაზღვრავ კანონით, ეს არის შეშინებული ხელისუფლების გადაწყვეტილება. შეიძლება ამ კანონმა იმ ადამიანებზეც იმოქმედოს, ვინც ტურისტულად აქტიურია, მთაში დადის და კარავს დგამს - დაველოდოთ, შეიძლება ასეთი კანონიც შემოიტანონ.
პროტესტს, რაც ხალხში არსებობს, ასეთი კანონების მიღება ვერ შეაჩერებს. დარწმუნებული ვარ, ქართველი ხალხი ბოლომდე მიიტანს იმ გამარჯვებას, რომელსაც იმსახურებს“,- განაცხადა გიორგი ბოტკოველმა.
შეგახსენებთ, რომ მმართველი გუნდი შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებასა და ახალი ამკრძალავი ნორმების ამოქმედებას გეგმავს.
„ქართული ოცნების“ დეპუტატების ინიციატივით განსახილველად მზად არის „შეკრებებისა და მანიფესტაციების" შესახებ კანონში ცვლილებები, რომლის გათვალისწინებით, შეკრებისა და მანიფესტაციის მონაწილეებს დროებითი კონსტრუქციების მოწყობა ეკრძალებათ თუ მისი მოწყობა: საფრთხეს უქმნის შეკრების ან მანიფესტაციის მონაწილეებს ან სხვა პირებს; ხელს უშლის პოლიციის მიერ საზოგადოებრივი წესრიგისა და უსაფრთხოების დაცვას; იწვევს საწარმოს, დაწესებულების ან ორგანიზაციის ნორმალური ფუნქციონირების შეფერხებას; შეკრების ან მანიფესტაციის ჩატარებას არ უკავშირდება.
ამასთან, კანონის პროექტის მიხედვით, „საჯარო სივრცის იერსახის დამახინჯების თავიდან აცილების მიზნით“, შეკრების ან მანიფესტაციის მონაწილეებს დროებითი კონსტრუქციის მოწყობა იმ შემთხვევაშიც ეკრძალებათ, თუ მისი მოწყობის გარეშე შეკრების ან მანიფესტაციის ჩატარება არსებითად არ ფერხდება.
- მმართველი გუნდი შეკრებისა და მანიფესტაციების დროს დროებითი კონსტრუქციების მოწყობასთან დაკავშირებით კანონის გამკაცრებას გეგმავს