"ისეთი შეგრძნება მაქვს, თითქოს კონტრაქტს ხელი მეც მოვაწერე" - შოთა არველაძე გიორგი მიქაუტაძის "აიაქსში" გადასვლას ეხმიანება
ბოლო დროს სულ უფრო მეტ ქართველ ფეხბურთელს ვხედავთ ევროპის ტოპ ჩემპიონატებსა და ტოპ გუნდებში. ამჯერად, საქართველოს ეროვნული ნაკრების ფეხბურთელი, გიორგი მიქაუტაძე, ფრანგული კლუბიდან, "მეციდან" ამსტერდამის აიაქსში გადავიდა. გიორგიმ 2028 წლამდე გააფორმა კონტრაქტი.
- "აიაქსში" წლების წინ ლეგენდარული ქართველი ფეხბურთელი, შოთა არველაძე თამაშობდა და ამ კლუბში კარიერის უმნიშვნელოვანესი წლები აქვს გატარებული. შოთასთვის გიორგის გადასვლა ნიდერლანდებში განსაკუთრებული აღმოჩნდა და ამ ამბავს "ფეისბუქზე" ეხმიანება:
"გიორგი მიქაუტაძის აიაქსში ტრანსფერმა ისეთი შეგრძნება გამიჩინა, თითქოს კონტრაქტს ხელი მეც მოვაწერე. ძალიან ბედნიერი და ამაყი ვარ, რომ აიაქსის უდიდეს ისტორიას კიდევ ერთი ქართველი, კიდევ ერთი ფორვარდი და ახალი თაობის ერთ-ერთი საუკეთესო წარმომადგენელი შეეხება.
გიორგი საუკეთესო ადგილზე მოხვდა და დარწმუნებული ვარ, მისი როლი ამ შესანიშნავ კლუბში იქნება საკვანძო და გულშემატკივრისთვის საყვარელი ფეხბურთელი მოკლე დროში გახდება.
მასთან ერთად, მახარებს სხვა ქართველი ფეხბურთელების წარმატებული ტრანსფერები და იმედი მაქვს, მათი ინდივიდუალური წარმატება და წინ გადადგმული ნაბიჯი საბოლოოდ ეროვნული ნაკრების შედეგზე აისახება", - წერს შოთა არველაძე.