"მოქმედებდნენ უკრაინის დავალებით, 1.5 მილიონი რუბლის სანაცვლოდ" - ФСБ აცხადებს, რომ სიმონიანისა და სობჩაკის მკვლელობა ჩაშალეს: როგორ პასუხობს ბრალდებას უკრაინა
რუსეთის უშიშროების ფედერალური სამსახურის (ФСБ ) განცხადებით, ჩაშალეს უკრაინული დაზვერვის შეთქმულება რუსული RT-ის მთავარი რედაქტორის, მარგარიტა სიმონიანისა და ჟურნალისტ ქსენია სობჩაკის წინააღმდეგ. "ეფ-ეს-ბე"-ს ცნობით, დაგეგმილი იყო სიმონიანისა და სობჩაკის მკვლელობა.
"უსაფრთხოების სამსახურმა საგამოძიებო კომიტეტთან და რუსეთის შინაგან საქმეთა სამინისტროსთან ერთად აღკვეთა მარგარიტა სიმონიანისა და ქსენია სობჩაკის მკვლელობა. დაკავებულნი არიან ნეონაცისტური ჯგუფის წევრები მოსკოვსა და რიაზანის რეგიონში, რომლებიც თვალ-ყურს ადევნებდნენ თავიანთ სამიზნეებს სამსახურსა და საცხოვრებელ ადგილებში. საგამოძიებო ღონისძიებების დროს მათ დაადასტურეს მკვლელობის დაგეგმვა უკრაინის უშიშროების სასახურის დავალებით, 1.5 მილიონი რუბლის სანაცვლოდ", - ნათქვამია რუსეთის უშიშროების სამსახურის განცხადებაში.
რუსული ФСБ -ს ბრალდებას გამოეხმაურა უკრაინის პრეზიდენტის ოფისის მრჩეველი, მიახილო პოდოლიაკი და თქვა, რომ უკრაინას საერთო არაფერი აქვს იმასთან, რაზეც რუსეთის უშიშროების სამსახურში საუბრობენ.
"ჩვენ სიმონიანი და სობჩაკი ნამდვილად არაფერში გვჭირდება. მათ არაფერზე არ აქვთ გავლენა, ისინი არ თამაშობენ მნიშვნელოვან როლს იმ პროცესებში, რაც დღეს ხდება“, - განაცხადა პოდოლიაკმა