"აზოვის" მეთაურები სამშობლოში არიან და აცხადებენ, რომ მიზანი ფრონტზე დაბრუნებაა - გაწბილებული კრემლი შეთანხმების დარღვევაში თურქეთსაც ადანაშაულებს

თურქეთიდან უკრაინაში დაბრუნდნენ "აზოვის" პოლკის ის მეთაურები, რომლებიც მარიუპოლში "აზოვსტალის“ დაცვას ხელმძღვანელობდნენ. თურქეთში ისინი რუსეთის ტყვეობიდან გათავისუფლების შემდეგ იმყოფებოდნენ და შეთანხმების მიხედვით, უკრაინაში დაბრუნების უფლება არ ჰქონდათ.

"აზოვის” მეთაურის, დენის პროკოპენკოს განცხადებით, თურქეთიდან უკრაინაში დაბრუნების შემდეგ "აზოვსტალის“ გათავისუფლებული ხუთივე მეთაური ყველაფერს გააკეთებს ომის დასასრულებლად.

კითხვაზე, გეგმავენ თუ არა ფრონტზე დაბრუნებას, პროკოპენკომ უპასუხა: "რა თქმა უნდა, ამისათვის დავბრუნდით უკრაინაში, ეს არის ჩვენი მთავარი მიზანი. "

"ღრმად ვარ დარწმუნებული, რომ არმია გუნდური მუშაობაა და დღეიდან თქვენთან ერთად გავაგრძელებთ ბრძოლას, აუცილებლად ისევ ვიტყვით ჩვენს სიტყვას ბრძოლაში. დღევანდელი დღისთვის მთავარია რომ უკრაინის არმიამ ფრონტის ხაზზე სტრატეგიული ინიციატივა ჩაიგდო ხელში, ყოველდღე წინ მივდივართ, ვანადგურებთ მტერს, ვათავისუფლებთ დროებით ოკუპირებულ ტერიტორიებს, დარწმუნებული ვარ, ყველაფერს გავაკეთებთ, რომ ეს პროცესი დაჩქარდეს და ომი ლოგიკურ დასასრულამდე მივიდეს“, - განაცხადა “აზოვის” მეთაურმა.

• უკრაინის პრეზიდენტის, ვოლოდიმირ ზელენსკის განცხადებით უკრაინაში დაბრუნდნენ დენის პროკოპენკო, სერგეი ვოლინა, სვიტოსლავ პალამარი, ოლეგ ხომენკო, დენის შლეგი.

მომხდარს უკვე მოჰყვა პირველი განცხადებები კრემლში. რუსეთის პრეზიდენტის პრესსპიკერის, დიმიტრი პესკოვის განცხადებით, "აზოვის" მეთაურების თურქეთიდან უკრაინაში დაბრუნება არსებული ხელშეკრულებების პირობების დარღვევაა.

"აზოვის" მეთაურების თურქეთიდან უკრაინაში დაბრუნება სხვა არაფერია, თუ არა არსებული ხელშეკრულებების პირობების პირდაპირი დარღვევა. უფრო მეტიც, ამ შემთხვევაში პირობები დაირღვა როგორც უკრაინული, ასევე, თურქული მხარის მიერ", - განაცხადა პესკოვმა.

მისი მტკიცებით, შეთანხმების თანახმად, ეს პირები კონფლიქტის დასრულებამდე თურქეთში უნდა ყოფილიყვნენ.

"ამავდროულად, რუსეთისთვის არავის უცნობებია ბოევიკების გადაცემის შესახებ“, - აღნიშნა პესკოვმა. მისი თქმით, თურქეთი, უკრაინის შეიარაღებული ძალების ფრონტზე წარუმატებლობის ფონზე, იძულებული გახდა ეს ნაბიჯი გადაედგა.

"შეთანხმებების დარღვევით „აზოვის“ მეთაურების ზელენსკისთვის გადაცემის გადაწყვეტილება, რა თქმა უნდა, პირდაპირ კავშირშია კონტრშეტევის წარუმატებლობასთან. ეს არის წარუმატებლობა, რომელსაც კიევის რეჟიმის ჯარები ახლა ყოველდღიურად აწყდებიან", - განაცხადა პესკოვმა.

მისი თქმით, მალე გაიმართება ჩრდილოატლანტიკური ალიანსის სამიტი, რომლის მზადების კონტექსტში ანკარა დიდი ზეწოლის ქვეშ იმყოფება.

"თავად თურქეთი კი, რა თქმა უნდა, ამ გზით, როგორც ნატო-ს წევრი, აჩვენებს თავის სოლიდარობას ალიანსის მიმართ. ჩვენ ყველას ეს კარგად გვესმის", - განაცხადა პესკოვმა.