"არ დატოვოთ სახლები" - სამხედროებითა და ტანკებით პარალიზებული როსტოვი: რა ხდება დილიდან ქალაქში, რომელიც არსებული ცნობით, "ვაგნერმა" დაიკავა

კერძო სამხედრო კომპანია "ვაგნერის" დამფუძნებელმა, ევგენი პრიგოჟინმა რუსეთის თავდაცვის სამინისტრო მისი სამხედრო ქვედანაყოფის ბანაკებზე სარაკეტო თავდასხმაში დაადანაშაულა, რასაც წუხელ რიგი პროცესები მოჰყვა რუსეთში. პრიგოჟინმა შურისძიება დააანონსა, რის შემდეგაც მოსკოვში ყველა მნიშვნელოვანი ობიექტები, სახელმწიფო დაწესებულებები და სატრანსპორტო ინფრასტრუქტურა გაძლიერებულ დაცვის კონტროლზე გადავიდა. ქუჩებში გამოვიდნენ "ომონისა" და "სობრის" სპეცდანიშნულების რაზმები. ასევე "ვაგნერის” ლიდერის ევგენი პრიგოჟინის განცხადებების შემდეგ, ჯავშანტექნიკა გამოჩნდა როსტოვის ქუჩებში და ადგილზე გეგმა “ციხესიმაგრე” გამოცხადდა.

• ცოტა ხნის წინ ცნობილი გახდა, რომ "ვაგნერი" როსტოვში შევიდა და სამხედრო და ადმინისტრაციული შენობების ნაწილი დაიკავა. ქალაქისა და რაიონის მნიშვნელოვანი ნაწილი მის კონტროლქვეშაა.

ასევე ვრცელდება პრიგოჟინის მიმართვა, რომელიც როსტოვის სამხედრო ოლქის შტაბის ეზოს ტერიტორიაზეა გადაღებული. მიმართვაში ამბობს, რომ ჯარი, როსგვარდიის ნაწილი და პოლიციის მნიშვნელოვანი ძალები მის მხარეს არიან გადმოსული. ასევე მისი თქმით, "ვაგნერის" კონტროლის ქვეშაა როსტოვის აეროდრომი.

"ჩვენი კონტროლის ქვეშაა როსტოვის სამხედრო ობიექტები, მათ შორის აეროდრომი. საბრძოლო სამუშაოებისთვის საჭირო თვითმფრინავები ნორმალურად გადაადგილდებიან, ასევე ხელს არ ვუშლით სასწრაფო დახმარების მანქანების მოძრაობას”- განმარტა პრიგოჟინმა ვიდეომიმართვაში.

როსტოვის ოლქის გუბერნატორმა მოსახლეობას მოუწოდა, არ დატოვონ სახლები და უარი თქვან დედაქალაქის ცენტრში გამგზავრებაზე.

დაათვალიერეთ ფოტოები - რა ხდება დონის როსტოვში 23 ივნისის დილას