ვაკის პარკის ტრაგედიიდან სამი თვის თავზე, "გრინსერვის +"-მა 3 მილიონიანი ტენდერი მოიგო - რა სამუშაოებს განახორციელებს კომპანია დედაქალაქში?
ვაკის პარკის ტრაგედიიდან 3 თვის შემდეგ, შპს "გინსერვის +" - თბილისის მერიის მიერ გამოცხადებული 3.1 მლნ-იანი ტენდერი მოიგო.
მერიამ ტენდერი გასული წლის 12 დეკემბერს გამოაცხადა და ის დედაქალაქის მასშტაბით დაზიანებული ინფრასტრუქტურის აღდგენის სამუშაოებს შეეხება. მომსახურების შესყიდვის სავარაუდო ღირებულებად მერიამ 3 499 966 ლარი დაასახელა, თუმცა გამარჯვებულმა კომპანიამ მითითებული სამუშაოების ჩატარება უფრო იაფად, 3 145 000 ლარად შესთავაზა.
სატენდერო დოკუმენტაციით ირკვევა, რომ სამშნებლო სხვა სამუშაოებთან ერთად, "გინსერვის +"-ს ევალება ელექტრო სადენებით სხვადასხვა ობიექტის გამართვა, სწორედ ის საქმე, რაშიც კომპანიამ საბედისწრეო შეცდომა დაუშვა და 3 თვის წინ ამას 13 წლის მარიტა მეფარიშვილის სიცოცხლე ემსხვერპლა.
მარიტას ორი თანატოლი დენის დარტყმის შედეგად დაშავდა, თუმცა, საბედნიეროდ, მათი გადარჩენა დევი მეზურნიშვიილმა მოახერხა.
AMBEBI.GE დაუკავშირდა თბილისის მერიას, სადაც გვითხრეს, რომ ჩვენს კითხვებს მოგვიანებით უპასუხებენ.
სამი თვის წინ მომხდარმა ტრაგედიამ მთელი ქვეყანა შეძრა. მაშინ თბილისის მერმა კახა კალაძემ საჯაროდ დადო პირობა, რომ დაისჯებოდა ყველა, ვისაც ამ ტრაგედიაში წვლილი მიუძღვოდა.
ამ ეტაპზე დაკავებულია 9 პირი. მათ შორისა მერიის გარემოს დაცვის საქალაქო სამსახურის უფროსის მოადგილე, გრინსერვისის და მშენექსპერტის დირექტორები, თანამშრომლები და ორი კერძო ელექტროშემდუღებელი.
გამოძიება ვარაუდობს, რომ ბრალდებულთა წრე გაფართოვდება. სახელმწიფო ბრალდების მტკიცებით, ვაკის ტრაგედიაში ბრალი მიუძღვის როგორც სამუშაოების შემსრულებელ კომპანიას, "გრინსერვისს", ისე თბილისის მერიას.
კერძოდ, პროკურორის ინფორმაციით, "გრინსერვის +” ვალდებული იყო წარმოედგინა ინსპექტირების ანგარიში, ხოლო მერიის საქალაქო სამსახურს სამუშაოები უნდა მიეღო მხოლოდ ინსპექტირების ანგარიშის და ექსპერტიზის დასკვნის შესაბამისად.
"2021 წლის 22 ოქტომბერს, ქ.თბილისის მუნიციპალიტეტის მერიის გარემოს დაცვის საქალაქო სამსახურსა და "გრინსერვისი +“-ს შორის გაფორმდა სახელმწიფო შესყიდვების შესახებ ხელშეკრულება, რომლის საგანსაც წარმოადგენდა თბილისში, ვაკის პარკის ტერიტორიაზე არსებული შადრევნების და კასკადის სარეაბილიტაციო სამუშაოები. 2022 წლის 26 აგვისტოს, მხარეებს შორის გაფორმდა მიღება-ჩაბარების აქტი, რომლითაც მერიის გარემოს დაცვის საქალაქო სამსახურმა ჩაიბარა ცენტრალურ შადრევანზე შესრულებული სამუშაოები.
აღნიშნულის შემდგომ, 2022 წლის სექტემბერში, მიუხედავად იმისა, რომ ცენტრალურ შადრევანზე დასრულებული იყო სარეაბილიტაციო სამუშაოები, მერიის გარემოს დაცვის საქალაქო სამსახურის უფროსის მოადგილემ, "გრინსერვისი +“-ის პროექტის მენეჯერს სიტყვიერად მოსთხოვა, რომ ცენტრალურ შადრევანზე დამატებით ჩაეტარებინათ გარკვეული სამუშაოები, კერძოდ უჟანგავი თეთრი ფერის თუნუქის მასალით შეეფუთათ ელექტრო ძრავზე დაერთებული შავი ფერის წყლის მილები.
გრინსერვისი +“-ის პროექტის მენეჯერმა აღნიშნულის შესახებ ინფორმაცია მიაწოდა "გრინსერვისი +“-ის დირექტორს, რომლის მითითებითაც აღნიშნული სამუშაო ქვეკონტრაქტორი ფირმის "ნიუ მეტალ დიზაინი“-ს წარმომადგენელს შეუკვეთეს. ამ უკანასკნელმა თავის მხრივ, სამუშაოს შესრულება "ნიუ მეტალ დიზაინი“-ს მიერ დაქირავებულ ორ ხელოსანს დაავალა.
სამუშაოს ზედამხედველობა და კონტროლი კი, "გრინსერვისი+“-ის სამუშაოთა მწარმოებელს უნდა განეხორციელებინა.22 სექტემბერს, დილის საათებში, ზემოხსენებული ხელოსნები მივიდნენ ცენტრალურ შადრევანთან, მიიტანეს შესაფუთი თუნუქის მასალა და დაიწყეს სამუშაოების შესრულება. სამუშაოების მიმდინარეობისას, ხელოსნებმა დაარღვიეს სამუშაოს წარმოების უსაფრთხოების ნორმები, კერძოდ წყლის მილებზე უჟანგავი თუნუქის მორგების მიზნით, მოხსნეს ელექტრო ძრავის შესაფუთი ლითონის ცხაური, რომლის უკან დამაგრებისას ბეტონის ზედაპირსა და ლითონის ცხაურს შორის მაღალი ძაბვის ელექტრო კაბელი მოაყოლეს. აღნიშნულის გამო, დაზიანდა ელექტრო კაბელის იზოლაცია და მოხდა დენის წყალში გაჟონვა.
"გრინ სერვის+"-ის დირექტორმა შესრულებული სამუშაო შესაბამისი ინსპექტირების ჩატარების გარეშე წარუდგინა მერიის საქალაქო სამსახურს, ხოლო მერიის გარემოს დაცვის სამსახურის უფროსის მოადგილემ აღნიშნული მიიღო შესაბამისი ინსპექტირების გარეშე.თავის მხრივ, "გრინ სერვის +"-ის ქვეკონტრაქტორი ფირმის წარმომადგენელმა არ გადაამოწმა მის მიერ დაქირავებული ხელოსნების მიერ შესრულებული სამუშაო. ხოლო, "გრინ სერვის +"-ის სამუშაოთა მწარმოებელმა არ გაუწია შესაბამისი კონტროლი აღნიშნულ საქმიანობას. აღნიშნულ პირთა მიერ თავიანთი მოვალეობის ჯეროვნად შესრულების შემთხვევაში, გამოვლენილი იქნებოდა ელექტრო სადენის დაზიანების ფაქტი და თავიდან იქნებოდა აცილებული დამდგარი შედეგი" - მიიჩნევს პროკურატურა.
ასევე იხილეთ:
- "მესმის, რომ თქვენ არა კი არა, ვერ გამათავისუფლებთ. ჩემი ერთადერთი თხოვნაა, რომ ... " - რა განაცხადა სასამართლოზე ვაკის პარკის ტრაგედიის თაობაზე დაკავებულმა ლაშა ფურცხვანიძემ
- "მარიტას წინაშე გვაქვს ვალდებულება, რომ მსგავსი ტრაგედია არ განმეორდეს" - კახა კალაძემ საკრებულოში ანგარიში მარიტა მეფარიშვილის ხსოვნისადმი წუთიერი დუმილით დაიწყო
- "ჩვენი ერთადერთი ნუგეში, მისი თავგანწირვაა მეგობრების სიცოცხლის გადასარჩენად" - რას წერს მარიტა მეფარიშვილის დედა?