თეთრი სამაჯური, უსასრულობის ნიშანი და მარიტა.... - ხვიჩა კვარაცხელიამ ტრაგიკულად დაღუპული 13 წლის გოგონას ხსოვნას პატივი მიაგო
სერია A-ს მე-10 ტურში "ნაპოლიმ“ საკუთარ მოედანზე "ბოლონია“ 3:2 დაამარცხა. ხვიჩა კვარაცხელიამ "ნაპოლის" რიგებში მორიგი წარმატებული მატჩი ჩაატარა.
დაძაბული მატჩის მოგებაში მან გადამწყვეტი როლი ითამაშა. "ნაპოლის" ფეხბურთელებიდან გოლები ჟეზუსმა, ლოზანომ და ოსიმენმა გაიტანეს. ლოზანოს გოლში უდიდესი წვლილი კვარაცხელიამ შეიტანა, რადგანაც ის სწორედ ხვიჩას აქტიურობას მოჰყვა.
ხოლო "ნაპოლის" მესამე გოლი "კვარას" საგოლე გადაცემის შედეგად გავიდა. მისი საგოლე პასი ვიქტორ ოსიმენმა გამოიყენა და თავის გუნდს უპირატესობა მოუტანა.
აღსანიშნავია ერთი დეტალი თამაშიდან - კვარაცხელიამ თავისი თამაში ტრაგიკულად დაღუპულ 13 წლის მარიტა მეფარიშვილს მიუძღვნა.
ფეხბურთელს ხელზე თეთრი სამაჯური ეკეთა. ზედ კი უსასრულობის ნიშანი იყო და მარიტა ეწერა. ფოტო პოპულარულ ქართულ ბლოგზე, Geo Team-ზე გამოქვეყნდა.
შეგახსენებთ, რომ 13 ოქტომბერს, ვაკის პარკში, შადრევანში სამი ბავშვი ბურთის ამოსატანად ჩავიდა, რა დროსაც მათ დენმა დაარტყა. ბავშვები კლინიკაში სასწრაფო დახმარების ბრიგადამ გადაიყვანა. ერთ-ერთი ბავშვის, 13 წლის გოგონას, მარიტა მეფარიშვილის მდგომარეობა თავიდანვე მძიმე იყო და ის ხეჩინაშვილის კლინიკაში გარდაიცვალა.