"დაშავებულია ბავშვი... დედა, რომელიც გარეთ კართან იდგა, აფეთქების შედეგად ეზოში დაეცა" - რა ახალი დეტალები ხდება ცნობილი დიდ დიღომში მომხდარ აფეთქებაზე?

დიდ დიღომში, ე.წ. ბენდუქიძის დასახლებაში მცხოვრებლების ინფორმაციით, აფეთქების შედეგად დაშავებული ქალი და მცირეწლოვანი ბავშვი აღნიშნულ დასახლებაში ქირით რამდენიმე დღის წინ გადავიდნენ.

რაც შეეხება დაშავებულ მამაკაცს, ის ადგილობრივების ინფორმაციით, აფეთქების დროს გვერდზე სახლში იმყოფებოდა.

ამასთანავე, როგორც ადგილობრივები ამბობენ, გუშინ საცხოვრებელი კორპუსის ტერიტორიაზე ბუნებრივი აირის სუნი იგრძნობოდა.

"დაახლოებით 07:00 საათი იქნებოდა აფეთქების ხმა რომ გავიგეთ. გამოვედით, მანქანები იყო დამტვრეული. ბავშვი გამოიყვანეს დამწვარი, ჩვეულებრივად სუნთქავდა. წაიყვანეს და როგორც ვიცი, რეანიმაციაშია. ბევრი დაზარალდა. მთლიანად კორპუსს აქვს დეფორმაცია მიღებული.

დარეკილი იყო, როგორც ვიცი და უთხრეს, ჩვენ არ გვეხებაო. სუნი იყო გუშინ. დაშავებულია ბავშვი და დედა, რომელიც გარეთ კართან იდგა, აფეთქების შედეგად კი ეზოში დაეცა. მესამე ადამიანი გვერდზე სახლში მცხოვრებია და როგორც ვიცი, აფეთქებისას საწოლიდან გადმოვარდა“, - განაცხადა ადგილობრივმა რეზო გოგიაშვილმა.

შემთხვევა დღეს დილით მოხდა. აფეთქების მიზეზი, სავარაუდოდ, ბუნებრივი აირის დაგროვება გახდა.