"ნუ დააკნინებთ იმ ფაქტის მნიშვნელობას, რომ ჩვენ რუსული ნავთობის შემოსავლის 90% შევამცირეთ" - ჟოზეფ ბორელი

საგარეო საქმეთა და უშიშროების პოლიტიკის მიმართულებით ევროკავშირის უმაღლესმა წარმომადგენელმა ჟოზეფ ბორელმა BBC Radio 4-თან მიცემულ ინტერვიუში უკრაინელების მიერ გამოთქმულ შიშთან დაკავშირებით, რომ ევროპული დახმარება შენელდა, განაცხადა, რომ ევროპამ რუსული ნავთობის შემოსავლის 90% შეამცირა.

ამასთან, ბორელმა დასძინა, რომ უკრაინისთვის იარაღის მიწოდება მაღალი ტემპით მიმდინარეობს.

"ჩვენ რუსული ნავთობის იმპორტი ავკრძალეთ, 90%-ზე მეტი შეჩერდება და ჩვენ სამხედრო დახმარებით მომარაგებას გავაგრძელებთ. ნუ დააკნინებთ იმ ფაქტის მნიშვნელობას, რომ ჩვენ რუსული ნავთობის შემოსავლის 90% შევამცირეთ“, - განაცხადა ბორელმა.

რაც შეეხება ევროპის მიერ, უკრაინისთვის იარაღის მიწოდებას, ბორელმა დასძინა, რომ ევროპა უკრაინაში იარაღის მიწოდებას მაღალი ტემპით აგრძელებს.

"იარაღის ნაკადი, რომელიც უკრაინისკენ მიედინება, მაღალი ტემპით გრძელდება. ჩვენ ეს შეგვიძლია გავზარდოთ, ყველაფერი შეიძლება გაიზარდოს. უკრაინისთვის იარაღის მიწოდებაში პრობლემას ვერ ვხედავ“, - დასძინა ბორელმა.