"ჩემს ამბავს დავიწყებ იმ მომენტიდან, როდესაც... " სამშობიაროს დაბომბვა და გზა რუსების კონტროლირებადი ტერიტორიისკენ - ომის სიმბოლოდ ქცეული ქალი თავს გადახდენილ ამბავს ჰყვება

მარიანა ვიშემირსკაია - ქალი მარიუპოლიდან, რომლის ფოტოც მთელმა მსოფლიომ ნახა და რომელიც უკრაინაში რუსების შეჭრის, ომის სისასტიკის სიმბოლოდ იქცა - ორსული მარიანა სამშობიაროში იმ დროს იყო, როცა რუსებმა დაბომბეს. საბედნიეროდ, გადარჩა და ბავშვიც გააჩინა.

მარიანას განსაცდელი ამით არ დასრულებულა, ოკუპანტებმა ის რუსების მიერ კონტროლირებად ტერიტორიაზე წაიყვანეს.

ვიშემირსკაია ომამდე პოპულარული ინფლუენსერი იყო. მან თავს გადახდენილის შემდეგ პირველად გამოაქვეყნა პოსტი სოციალურ ქსელში და ადამიანებს ომის საკუთარი ამბავი უამბო.

"მას შემდეგ, რაც სოციალურ ქსელში დავბრუნდი, უამრავი შეტყობინება მივიღე ჩემი მკითხველებისგან, რომლებიც მთხოვდნენ მეთქვა, როგორ ვიყავით ჩვენ, ბავშვის მდგომარეობა, რა ხდებოდა ახლა ჩვენს ცხოვრებაში. სამწუხაროდ, ფიზიკურად არ მაქვს იმისი უნარი, რომ ყველა მესიჯი წავიკითხო და მით უმეტეს, თითოეულს ცალ-ცალკე ვუპასუხო.

ამიტომ გადავწყვიტე, სიახლე აქ გაგიზიაროთ. ასე რომ, ჩემს ამბავს დავიწყებ იმ მომენტიდან, როდესაც დონეცკში ოჯახთან ერთად - მეუღლესთან და ქალიშვილთან ერთად ჩამოვედი. მარიუპოლიდან ევაკუაციის შემდეგ, პრიორიტეტი იყო იმის უზრუნველყოფა, რომ ბავშვის ჯანმრთელობა სრულყოფილად გამოგვეკვლია, რადგან სიცოცხლის პირველ დღეებში ისეთ პირობებში აღმოჩნდა, სადაც ექიმების მხრიდან დაკვირვების შესაძლებლობა არ იყო.

იმ საავადმყოფოს დერეფანში, სადაც ევაკუაციამდე ვცხოვრობდით, ტემპერატურა მხოლოდ 6 გრადუსი იყო, რომ აღარაფერი ვთქვათ სანიტარიულ პირობებზე და ხალხის მუდმივ ნაკადზე. გარდა ამისა, საომარი მოქმედებები ჯერ კიდევ მიმდინარეობდა, არ გვქონდა ინფორმაცია, კომუნიკაცია, ინტერნეტი, შეუძლებელი იყო იმის გაგება, თუ რა მოხდებოდა შემდეგ.

დონეცკში გამგზავრებამდე ბავშვის ზუსტი სიმაღლე და წონაც კი არ ვიცოდით, მაგრამ უსაზღვროდ მადლიერი ვარ სამედიცინო პერსონალის, ვინც ჩვენი ბავშვის დაბადებაში დამეხმარა! დონეცკში ჩასვლის პირველ დღეებში ყველა ექიმთან ვიყავით, სანამ საბოლოოდ დავხურეთ ყველაზე მნიშვნელოვანი საკითხი - ბავშვის ჯანმრთელობა, გადავედით მეორეხარისხოვანზე - ჩემს გამოკვლევაზე.

დამეწყო ჯანმრთელობის მცირე პრობლემები (შესაძლოა, დაღლილობის, ან პოსტმშობიარობის პერიოდის გამო), ტემპერატურა ერთი თვის განმავლობაში ორჯერ ავიდა 40-მდე. ცოტა გამოჯანმრთელებულმა რამდენიმე ინტერვიუ მივეცი (მათ შორის, უცხოური მედიას) და უფრო ხშირად დავიწყე სოციალურ ქსელში გამოჩენა.

ახლა მე რეგულარულად მოვუყვები ჩემს აუდიტორიას, თუ რა ხდება ჩემს ცხოვრებაში, მაგრამ მინდა ცოტათი შევცვალო ჩემი პუბლიკაციების თემა - მას შემდეგ რაც დედა გავხდი, ახლა ვეცდები გაგიზიაროთ ახალი გამოცდილება და მოგმართოთ რჩევისთვის. ასევე, მიუხედავად იმისა, რომ ვცდილობდი თავი შორს დამეჭირა სოციალური საკითხებისგან, მაგრამ აღარ შემიძლია განზე დგომა და იგნორირება. ამიტომ, ჩემს აუდიტორიას გავუზიარებ ისტორიებს იმის შესახებ, რაც ხდება ჩემს მშობლიურ ქალაქებში - დონეცკსა და მარიუპოლში და ზოგადად დონბასში, სადაც დავიბადე და საიდანაც არ ვაპირებ არსად წასვლას თუნდაც ამ რთულ დღეებში", - წერს მარიანა ვიშემირსკაია.