"ყველაზე სასწაული პროექტი, რაც კი აქამდე გვქონია" - გორის ქალთა კამერული გუნდის სიმღერები მთვარეზე გაიგზავნება
გორის ქალთა კამერული გუნდის ნამუშევრები პროექტ Lunar Codex-ისთვის შეარჩიეს, რაც იმას ნიშნავს, რომ მათი ნამუშევრები მთვარეზე გაიგზავნება. აღნიშნულის შესახებ გორის ქალთა გუნდი ინფორმაციას "ფეისბუქის" ოფიციალურ გვერდზე აქვეყნებს, სადაც აღნიშნულია, რომ მათი ჩანაწერები მთვარეზე 2024 წელს იქნება.
"ყველაზე სასწაული პროექტი, რაც კი აქამდე გვქონია! გორის ქალთა გუნდის ხმები უკვე მთვარეზე!!! არ მოგესმათ! დიახ - მთვარეზე.
აშშ- ის აერონავტიკის და კოსმოსური სივრცის კვლევის ეროვნული სამმართველოს - NASA - National Aeronautics and Space Administration-ის, კომპანია SpaceX-ის და Astrobotic Technology-ს მხარდაჭერით კორპორაცია Incandence Corp-მა შექმნა ციფრული არქივი, სახელწოდებით Lunar Codex (იდეის ავტორი Dr. Samuel Peralta), რომელიც გაიგზავნება მთვარეზე, სადაც შესული იქნება ხელოვანების სხვადასხვა ნამუშევრები მსოფლიოს 90 ქვეყნიდან. საქართველოდან კი შეირჩა გორის ქალთა გუნდი.
სამხატვრო ხელმძღვანელის, თეონა ცირამუას გადაწყვეტილებით ამ პროექტისთვის გაგზავნილია სამი ნამუშევარი. ორი ნაწარმოები- "ეგზერსისი“ და "ლაშარის გზაზე“ ეკუთვნის ჩვენს გენიოს, მსოფლიო კომპოზიტორს, ბატონ იოსებ კეჭაყმაძეს, ხოლო მესამე არის ქართული (აფხაზური) ხალხური სიმღერა "ვარადო“ (სოლისტები თ. ცირამუა, თ. პავლიაშვილი). ყველა ეს ნამუშევარი მოთავსდება მე -2 კაფსულაში და მთვარეზე დაჯდება 2024 წელს!
ნაწარმოებებთან ერთად გაიგზავნა ასევე გუნდის ბრწყინვალე ისტორიაც, რომლის დაარსება ეკუთვნის გენიალურ ბატონ შალვა მოსიძეს და გორის სასწავლებლის გენიალურ ხელმძღვანელს, ბატონ სანდრო კაჭარავას! ასევე ეს სამი ნამუშევარი EP-ს სახით გამოიცა Lenø Records-ზე და მისი მოსმენა შეგიძლიათ ყველა ციფრულ სთრიმინგ პლატფორმაზე (Apple Music, Spotify, etc) https://distrokid.com/hyperfo.../goriwomenschoir/lunar-codex
ძალიან დიდი მადლობა ორგანიზაცია "ნაკვალევი“-ს დამფუძნებელს, ქალბატონ თამარ გოგატიშვილს მხარდაჭერისთვის. www.nakvalevi.org.ge მისი ჩართულობა რომ არა, ეს ამბავი არ მოხდებოდა. უღრმესი და უდიდესი მადლობა გიორგი გვარჯალაძეს, (Lenø Records -ს), გვერდში დგომისთვის და უმაღლესი პროფესიონალიზმისთვის!დიდი მადლობა ჩვენ ფილიპინელ მეგობარს, Romana Go-ს, აქტიური მხარდაჭერისთვის და დახმარებისთვის! უღრმესი მადლობა გუნდის თითოეულ წევრს თავდადებისთვის და მუსიკის ასეთი სიყვარულისთვის! მიუხედავად კოვიდის შემოტევისა, მაინც მოვახერხეთ ამ გენიალური საქმის ბოლომდე მიყვანა!...თუ როგორ მოვახერხეთ, ამის განსჯა თქვენთვის მოგვინდია, ჩვენო უსაყვარლესო გულშემატკივრებო", - ნათქვამია "ფეისბუქზე გამოქვეყნებულ ინფორმაციაში.