"მეტრომანები არ უქმდება!" - რა განცხადებას ავრცელებს თბილისის მერია?
თბილისის მერიის ინფორმაციით, სამგზავრო ბარათები, ე.წ. მეტრომანები არ უქმდება. ამის შესახებ ინფორმაცია მერიის "ფეისბუქის" ოფიციალურ გვერდზე ვრცელდება. როგორც განცადებაშია აღნიშნული, ბარათზე აქამდე არსებული ბალანსები სრულად ნარჩუნდება და აღნიშნული თანხის გამოყენება მგზავრს შეუფერხებლად შეუძლია.
"მეტრომანები არ უქმდება! სოციალურ ქსელში ვრცელდება ინფორმაცია, რომ თითქოს აქამდე მოქმედი სამგზავრო ბარათები - მეტრომანები უქმდება, რაც სიცრუეა.აღნიშნული სამგზავრო ბარათები კვლავ რჩება მგზავრობის საფასურის ერჯერადი გადახდის უნივერსალურ საშუალებად, სამგზავრო აბონემენტების პარალელურად. გარდა ამისა, სრულად ნარჩუნდება ბარათზე აქამდე არსებული ბალანსები და აღნიშნული თანხის გამოყენება მგზავრს შეუფერხებლად შეუძლია.მეტრომანით მგზავრობის საფასურის გადახდა აქამდე შესაძლებელი იყო მეტროთი, ავტობუსით და საბაგიროთი მგზავრობისას, ამჟამად კი, ასევე, შესაძლებელია ლურჯი მიკროავტობუსით მგზავრობისას. თბილისის მერიამ არაერთხელ გააკეთა განცხადება, რომ აქამდე მოქმედი ბარათები რჩებოდა ძალაში. მომავალშიც, ნებისმიერი მსგავსი სიახლის შესახებ ინფორმაციას პირველ რიგში, მერია გაავრცელებს." - ნათქვამია თბილისის მერიის განცხადებაში.