"პირადად მე ზვიადაურს შევუნდობ! ჩემი შვილიც აპატიებდა" - რას ამბობენ მოკლული ნიკა კენჭოშვილის მშობლები ზვიადაურის გათავისუფლების შემდეგ?

წინანდალში, სისხლიანი დაპირისპირების შედეგად მოკლული ნიკა კენჭოშვილის მშობლები სასამართლოს გადაწყვეტილებას, ზვიადაურის გათავისუფლებასთან დაკავშირებით უსამართლოს უწოდებენ.

მათ ინტერვიუ "ნოდარ მელაძის" შაბათს მისცეს.

როგორც ისინი ამბობენ, სასამართლოს გადაწყვეტილებით მათი შვილი მეორედ მოკლეს. თუმცა, მოკლულის მამის თქმით, მან ზვიადაურს შეუნდო და აპატია, რადგან იცის, რომ ასე მოიქცეოდა მისი შვილიც.

"სამართალი მემგონი არ არსებობს ამ დედამიწაზე. მკვლელი როგორ უნდა გაათავისუფლო. ეს ადამიანი არ უნდა გამოსულიყო ციხიდან, სანამ არ მივიღებდით საბოლოო დასკვნას ექსპერტის. ექსპერტის დასკვნა ჯერ არ არის, საიდან გამოაქვთ ეს გადაწყვეტილაბა?! პირველად ვამბობ ამას, სურათებით გვაქვს ნანახი, 7 ადგილზე აქვს ჩემ შვილს ჭრილობები. რათ უნდოდა ახლოს, მიბჯენით სროლა, თავში წამოერტყა. მე მინდა მოსამართლე მამუკა წიკლაურს მივმართო, მიიღებდა თუ არა მსგავს გადაწყვეტილებას ჩემს შვილთან დაკავშირებით, ის რომ გადარჩენილიყო? ამაზე მიპასუხოს.

რასაც ახლა ვიტყვი, ამას ჩემი შვილის სულის ცხონებისთვის ვიტყვი - ყველაფერი უფლისთვის მიმინდია. პირადად მე ზვიადაურს შევუნდობ და ვაპატიებ!იმიტომ ვაპატიებ რომ ჩემი შვილიც აპატიებდა"- ამბობს 27 წლის ბიჭის მამა.

ნიკა კენჭოშვილის დედის თქმით, ზვიადაურის გათავისუფლების შემდეგ მისი მხრიდან მოწმეების დაშინება გამორიცხული არ არის.

"ასეთი მკვლელი როგორ უნდა გამოუშვან, რატომ ახალისებენ ასეთებს, გინდა პარლამენტის ყოფილი დეპუტატი იყოს, ან თუნდაც ოლიმპიური ჩემპიონი?! რატომ ვცხოვრობთ ასეთ ქვეყანაში?! როგორ არიან დარწმუნებულები იმაში, რომ ჩვენს მოწმეებზე გავლენას არ მოახდენს და რამეს არ დაუშაავებენ ვინმეს. ყოველდღე შიშის ქვეშ ვარ. საფრთხეს ველოდები ყოველდღე მაგათი მხრიდან. გული მტკივა. ისეთმა ადამიანმა მომიკლა შვილი, ვისაც უნდა მიაბარო და იმედი გქონდეს" - ამბობს კენჭოშვილის დედა.

თელავის რაიონულმა სასამართლომ 16 აგვისტოს, წინანდლის ტყეში მომხდარი მკვლელობის საქმეზე დაკავებული ძიუდოისტი ზურაბ ზვიადაური და კიდევ ერთი ბრალდებული ჯაბა ჯანგირაშვილი გირაოს სანაცვლოდ გაათავისუფლა. სასამართლოს გადაწყვეტილებით, ზურაბ ზვიადაური 50 000-ლარიანი გირაოს, ჯაბა ჯანგირაშვილი კი 5 000-ლარიანი გირაოს სანაცვლოდ, სასამართლო დარბაზიდან გათავისუფლდნენ.

ცნობისთვის, შემთხვევა, სოფელ წინანდლის ტყეში მიმდინარე წლის 16 აგვისტოს მოხდა. ორმხრივი სროლის დროს დაიჭრა 5 პირი, მათ შორის 3 გარდაიცვალა. გარდაცვლილთაგან ერთი ყოფილი დეპუტატის და ოლიმპიური ჩემპიონის ზურაბ ზვიადაურის ძმა ზვიად ზვიადაური იყო.

კახეთის პოლიციის დეპარტამენტის თანამშრომლებმა ფაქტზე ორი პირი დააკავეს. ყოფილ პარლამენტარს საგამოძიებო უწყება განზრახ მკვლელობას ედავება, ხოლო ჯაბა ჯანგირაშვილს - იარაღის დაუდევრად შენახვას.