"მიუხედავად "ნაციონალური მოძრაობის" დაპირებისა, რომ არ შექმნიდნენ უსაფრთხოების კუთხით საშიშროებას, სააკაშვილის სასამართლო პროცესი აქციების ფონზე დააანონსეს" - ნინო წილოსანი
"მიუხედავად „ნაციონალური მოძრაობის" დაპირებისა, რომ არ შექმნიდნენ უსაფრთხოების კუთხით რაიმე განსაკუთრებულ საშიშროებას, დღეს სააკაშვილის სასამართლო პროცესის წარმართვა აქციების ფონზე დააანონსეს" - ამის შესახებ ჟურნალისტებთან საპარლამენტო უმრავლესობის წევრმა ნინო წილოსანმა განაცხადა.
მისი თქმით, მისი მხარდამჭერებისგან უსაფრთხოების რისკების უგულებელყოფა პროცესს ვერ წაადგება.
"წლების მანძილზე საზოგადოებაში იყო ინტერესი 7 ნოემბრის საქმეზე დამდგარიყო განაჩენი და გამოვლენილიყვნენ დამნაშავეები. დღეს ამ საქმეზე გაიმართება სასამართლოში მოსმენები. მიუხედავად იმისა, რომ "ნაციონალური მოძრაობა" მუდმივად გვპირდებოდა, რომ მიხეილ სააკაშვილის მონაწილეობასთან დაკავშირებით არ შექმნიდნენ უსაფრთხოების კუთხით რაიმე განსაკუთრებულ საშიშროებას, დღეს დააანონსეს აქციების ფონზე სასამართლო პროცესის წარმართვა. მინდა მოვუწოდო მის მხარდამჭერებს, მისივე ინტერესების გათვალისწინებით, თავი შეიკავონ დესტრუქციული ქმედებებისგან. ყველა ადამიანს აქვს მშვიდობიანი დემონსტრაციის გამართვის შესაძლებლობა, თუმცა, არაერთხელ გვინახავს "ნაციონალური მოძრაობის" დაანონსებული მშვიდობიანი დემონსტრაცია როგორ გადაზრდილა ძალადობრივში,"- განაცხადა წილოსანმა.