"ეს ის ექიმია, ვისითაც ქვეყანა იამაყებს" - რას წერენ ქართველი ექიმები გიორგი ღოღობერიძის შესახებ "პრაიმშოუს" სკანდალური გადაცემის შემდეგ

"იმედის" გადაცემა "პრაიმ შოუში" ექიმების ნინო ნადირაძისა და გიორგი ღოღობერიძის დაპირპირებას საზოგადოების მხრიდან აქტიური გამოხმარუება მოჰყვა. გადაცემაში კლინიკურ ონკოლოგსა და ექიმ-რეზიდენტ გიორგი ღოღობერიძეს კარდიოლოგმა ნინო კუზანოვამ შეკითხვა დაუსვა, თუ რამდენად კანონიერია პანდემიის პერიოდში საზოგადოებისთვის რეზიდენტის მხრიდან მიცემული სხვადასხვა სამედიცინო რჩევა. კუზანოვას თქმით, შესაძლოა, ეს საზოგადოებისთვის ზიანის მომტანიც კი აღმოჩნდეს. გადაცემაში გიორგი ღოღობერიძეს ერთგვარი თავის მართლება მოუხდა, რამაც ნინო კუზანოვას მისამართით საზოგადოების ნაწილის გაღიზიანება გამოიწვია.

"მართლა არ ვიცი, რატომ მიმიწვიეს ამ გადაცემაში, მაგრამ ძალიან საწყენი გახდა, როდესაც მიზეზი გადაცემის მსვლელობისას გავიგე. "პრაიმშოუს" გვერდზე იდო ეს ვიდეო, მაგრამ წაშალეს… ჩემ გარდა, კოვიდ პანდემიის დროს, ყველა იძლეოდა რჩევებს, აბსოლუტურად ყველა, განურჩევლად პროფესიისა, მაგრამ ამის მიუხედავად ჩემი გაშავება არჩიეს… არადა არც პოლიტიკური ინტერესი მქონია და არც- ფინანსური, მხოლოდ ხალხის დახმარება მინდოდა და მინდა. რეზიდენტი მალე აღარ ვიქნები, მაგრამ მაინც ძალიან მეამაყება, რომ "რეზიდენტის" სტატუსით გამოვდიოდი! მეწყინა ამგვარი დამოკიდებულება", - დაწერა გიორგი ღოღობერიძემ.

გადაცემის შემდეგ სოციალურ ქსელში გიორგი ღოღობერიძის მხარდასაჭრი უამრავი პოსტი დაიწერა. სოლიდარობის ნიშნად, სოციალურ ქსლეში განცხადებები გააკეთეს ასევე გიორგის კოლოგებმა, ექიმებმა და რეზიდენტებმა:

ზაზა წერეთელი:

"მოიწვიო გადაცემაში ქ. თინა თოფურია და ანტივაქსერულ ფანტაზიას გაქანება მისცე... და შემდეგ იმავე გადაცემამ აკრიტიკოს ახალგაზრდა ადამიანი, გიორგი ღოღობერიძე, რომელიც პოპულარულ ენაზე ცდილობდა მოსახლეობისათის მათთვის საინტერესო სამედიცინო ინფორმაციის მიწოდებას... არის ამაში რაღაც პრაიმტაიმეისებური და ტევე იმედისებური, თუმცა, ახლა ყველა ამ გადაცემას და მის წამყვანს არჩევს და...თავისი სკანდალური როლი კი შეასრულეს, და მათზე საუბრობენ კიდევ ერთხელ, სხვა არ მგონია მაგ გადაცემას რაიმე ოდესმე აინტერესებდა".

გიორგი დოლიძე:

"ჩემი მხარდაჭერა გიორგი ღოღობერიძეს. აკადემიური, ნაკითხი, მტკიცე ხასიათის და პაციენტების მოყვარულ ადამიანს. ეს ის ექიმია, ვისითაც ქვეყანა იამაყებს".

გიორგი ფხაკაძე:

"სრულიად ვეთანხმები ჩემს კოლეგას! ახალგარზდა კოლეგები - ეს არის ჩვენი ქვეყნის მომავალი! მე ვუსურვებ ჩემს კოლეგა, გიორგი ღოღობერიძე წარმატებას!!! მისი რამდენინე ვიდეო მაქვს ნანახი და საკმაოდ საინტერესოდ უხსნის მოსახლეობას სამედიცინო შემთხვევებს და რაც მე ვნახე, სუბორდინაცია (რაც მედიცინაში არის მნიშვნელოვანი) ჰქონდა დაცული და პირველწყაროები (მტკიცებულებით მედიცინაზე დგას თანზმედროვე მედიცინა) აქვს მითითებული/ნახსენები. ვუსურვებ საქართველოს, რომ უფრო მეტი ასეთი ახალგაზრდა კოლეგა გვყავდეს მედიცინის სხვადასხვა დარგში... თანამედროვე მედიცინა დგას: უწყვეტ სამედიცინო განათლებაზე, ხარისხის მუდმივად გაუმჯობესებაზე, დამოუკიდებელ სამედიცინო აკრედიტაციაზე".

თამო ბიწაძე:

"გიორგი საქართველოს ღირსეული რეზიდენტია და ღირსეული ექიმი იქნება მალე. ჩვენ, რეზიდენტები შენს გვერდით ვართ, გიორგი ღოღობერიძე"

იაგო ფრანგიშვილი:

"გიორგი ღოღობერიძე ახალგაზრდა ექმია. ეს ინტერნაციონალური გაგებით, ქართული მონათმფლობელური გაგებით კი ექიმი რეზიდენტია ონკოლოგიაში, რომელიც იქეთ იხდის ფულს რეზიდენტურაში. ეს ქართული საზოგადოებრივი რეალობაა. სულ სხვაა ქართული ინდივიდუალური და 21-ე საუკუნის რეალობა. ამ რეალობაში, რომელიც ცოცხლობს და არსებობს პარალელურად იმისა, რასაც კონსერვატიულ ტრადიციული მედიასივრცე გვიჩვენებს, აი ამ ახალ და არამარტო ახალგაზრდულ ინტერნეტ სივრცის რეალობაში. გიორგი ღოღობერიძე ჩამოყალიბებული და მოკაშკაშე ვარსკვლავია. აი აქ ნახეთ რატომ https://www.facebook.com/Usmle.preparation.Ghoghoberidze.Giorgi

აი ამ გვერდზე გიორგის 400.000-ზე მეტი აბონენტი ჰყავს. მის პოდკასტებს დაახლოებით და საშუალოდ თითოეულს 30 დან 80.000-მდე მაყურებელი ყავს. მისი ბოლო ,,პრომოუშენი,, 1,5 მილიონი ნახვით აბსოლუტური ზენიტია ქართული ინტერნეტ მედიასივრცისა. ეს კი იმ შავი პიარის შედეგია, რომელიც ყველაზე ჩაბეტონებული მედიპლეიერის, ,,იმედის,, მიერ იქნა გიორგის წინააღმდეგ და ვითომდა გიორგი ღოღობერიძეს გასაშავებლად მომზადებული. გიორგი ღოღობერიძე ქართული სისტემის, ქართული უსახური სამედიცინო სისტემის თანახმად, არც ექიმია, არც სტუდენტია, დაამთავრა სამედიცინო და არის ონკოლოგიის დახელოვნებაში ანუ რეზიდენტურაში..... და მაინც არ ითვლება ,,ექიმად,, არადა, ამ ,,არაექიმს,, რომელსაც ,,პაციენტის მკურნალობის უფლება,, არა აქვს, აქვს და მიცემული აქვს უფლება, რომ ლექციები იკითხოს და უკითხოს სტუდენტებს ბიოქიმიაში და ფარმაკოლოგიაში - დიახ, ამ ახალგაზრდა კაცს საქართველოს მონათმფლობელურმა სამედიცინო სისტემამ მისცა უფლება, რომ სამედიცინოს სტუდენტებს ასწავლოს, უფასოდ ალბათ, ესაა ამ მონურობის სიმბოლოც. რეზიდენტურაში ფული თავად იხადოს და ექიმად რომ მოიხსენიოს ვინმემ, აი ამაზეც კი ენა უნდა დაგებას, მართლა ექიმი უწოდო თუ არა. აი ესაა მარაზმი. ონკოლოგია არის ექიმის შემდგომი დახელოვნება და არა ,,ექიმი მაშინ ხარ, თუ ან ონკოლოგი ან კარდიოლოგი ან ინტერნისტი ან ყელყურის ექიმი ხარ. ,,აი ესაა ქართული სისტემის პარადოქსიც და მონურობაც. ეს სისტემა აწყობს ყველას - სახელმწიფოს უფასო ექიმი და ავადმყოფის მიმხედი ჰყავს, კლინიკის უფროსობას და მფლობელს ამ რეზიდენტურის ექიმებით არათუ უფასო ექიმი, არამედ აქეთ გადამხდელი ექიმი ჰყავს, რომლებიც მთლიანად არეგულირებენ კლინიკის ქმედითუნარიანობას პირადად მთავარ და უფროს ექიმებსაც აწყობთ ეს მონათმფლობელური სისტემა, მოსწონთ პირადი მორჩილები, ძალაუფლების სიმბოლოა ეს ყველაფერი და ამიტომაც არავინ იღებს ხმას. დამონებული რეზიდენტორები ამ თემაზე დადუმებულნი არიან, სამწუხაროდ, გიორგიც დუმს ამ მნიშვნელოვან თემაზე მიუხედავად იმისა, რომ ისეთი პოპულარობით და აქტუალობით სარგებლობს, რაც ქართულ ინტერნეტ სივრცეში განუმეორებელიც კია.

კიდევ ერთხელ გთხოვთ, მისი გვერდი ნახოთ, კარგად გაკეთებული პოპულარული სამედიცინო გვერდია სერიოზულ თუ საინტერესო თუ სამხიარულო თემებზე, მაგალითად ,,პირის სუნზეც,, და ,,კოვიდ 19,, ზეც. თქვენ წარმოიდგიენთ და ეს ორი თემა მჭიდრო კავშირშია ერთმანეთთან, რამეთუ კოვიდის დროს პირბადემ პირის სუნისგან იხსნა მსოფლიო.

არა, გიორგი გაცილებით უფრო სერიოზულია, აქვს საუცხოო რეშერში, აქვს გასაგები ენა და დიდი პედაგოგიური ნიჭი. ამიტომაცაა ასე პოპულარული. ამიტომაც, ჩემო გიორგი, გამოიყენე ეს შენი პოპულარობა და იბრძოლე ამ შენი და შენნაერების დაკაბალებისა და დამონების წინააღმდეგ. შევქმნათ ადამიანური სამედიცინო სისტემა და ადამიანის ღირსებასთან შესაბამისი ექიმის დახელოვნების სისტემა"

ნათი ბარბაქაძე:

"გიორგი ღოღობერიძე სამწუხაროდ დღეს მედიცინა დიდი ბიზნესია... ამიტომ მათ იგრძნეს დიდი საფრთხე.. ჩვენ ერთად მოვდიოდით 2010 წლიდან, შენ იყავი მთელ კურსზე გამორჩეული სტუდენტი, ყველაზე შრომისმოყვარე.. მახსოვს 3 დღე ღამეში დაწერე იმუნოლოგიის საგამოცდო საკითხები, რომელიც ჩავაბარეთ შემდგომ ყველამ. გისურვებ ბევრ წარმატებას, ზოგს კი შურის დამარცხებას"

ბიძინა კულუმბეგოვი:

"ბოღმის საჯაროდ ნთხევის მასტერკლასი ჩატარებულია! იმედია ამ კარგ და თავდადებულ ადამიანს ბოდიშს მოუხდიან უსწრაფესად ასეთი სამარცხვინო თავდასხმის გამო"

ლაშა უჩავა:

"სამწუხაროა ფაქტი, როდესაც უფროსი თაობა ამხელა....... ბევრი რამ შეიძლება დაარქვა, ნამდვილად საინტერესო, უკონკურენტო და შეუდარებლად დიდი ძალისხმევა იყო შრომა, რომელიც გასწიე, ძალიან ბევრ “სპეც-პროფესიონალზე” მეტი ინფორმაცია მიაწოდე საზოგადოებას პ.ს. სამწუხაროდ, არ მაქვს შენახული ვიდეო, სადაც ქალბატონი რომელიც ეწინააღმდეგება საჯაროდ დანიშნულების მიცემას, ამავე გადაცემაში მთხოვდა სწორედ იგივეს გაკეთებას"

გიორგი სანიკიძე:

"დღეს მედიცინა ბიზნესია, ექიმებმა იგრძნეს საფრთხე, როცა ბევრად კომპეტენტური ადამიანი უსასყიდლოდ ეხმარებოდა საზოგადოებას! გიორგი წარმატებები! "

თამუნა მჟავანაძე:

"სოლიდარობა ჩემს მეგობარს, კოლეგას, უნიჭიერეს, შესაშურად შრომისმოყვარე და მონდომებულ ადამიანს. "ცუდას რად უნდა მტერობა კარგია მუდამ მტრიანი’’. ვაჟა-ფშაველას ამ სიტყვებს შემდეგნაირად განმარტავენ: ,,შენ ქმნი ღირებულს და ამიტომ გყავს მოშურნე მტრები, ამას უნდა შეეგუო და იამაყო კიდეც. ესაა მორალური კომპენსაცია, რომელიც მტრების ყოლის დისკომფორტს აბალანსებს.

გუშინდელი გადაცემა იყო ,,გატელევიზორებულ-გარეკლამებულების" ამაო მცდელობა იმისა, რომ ჩაძიროს და ბოლო მოუღოს თავისზე წარმატებულ ახალგაზრდას, რომელმაც თავისი ასაკის მიუხედავად მიაღწია იმას, რასაც თავად ვერ შესწვდნენ ვერცერთ ასაკში. შურის, ღვარძლისა და გაუტანლობის სენით სანამ ვიქნებით შეპყრობილები მოყვასის მიმართ მანამ არაფერი გვეშველება. გიორგი ღოღობერიძე ,,სულ ზევით, ზევით, მაღლა და მაღლა".

ნინო ზამბახიძე:

"სულ თითზე ჩამოსათვლელი ადამიანი ვიცი, ვინც უანგაროდ გვეხმარებოდა კოვიდის მძვინვარების პერიოდში, როდესაც კოვაიდერი შევქმენით! გიორგი ათასობით ადამიანს ეხმარებოდა ინფორმაციული ვაკუუმის პერიოდში! არ მოსულა მსგავსი საქციელი არ! მეტი გააკეთეთ უფრო მეტი, ვიდრე მან შეძლო ხალხის დახმარების კუთხით და მაგაში შეეჯიბრეთ ერთმანეთს!"

თამარ ჯიქია ასათიანი:

"ქალბატონმა ნინომ სიტყვა "პოპულიზმიც"გააჭღერა შოუში, ალბათ ყველა დამეთანხმებით, რომ ამ ტერმინს ნეგატიური შეფერილობა აქვს, რადგან ითვლება, რომ ამ დროს ინტერესების დაცვის სურვილი არაგულწრფელია და მყვირალა განცხადებებით შემოიფარგლება, ფრიად საწყენი და უსამართლოა ასეთი განცხადების გაკეთება გიორგი ღოღობერიძის მიმართ. მეორე პუნქტი:. ლიცენზიას რაც შეეხება, მალე გახდება ლიცენზირებული ექიმი. (ჩააბარებს მაგ უაზრო ტესტებს) ამის დეტონაცია ქალბატონი ნინოს მხრიდან არ იყო კონსტრუქციული და მითუმეტეს ჯანსაღი კრიტიკა. უეცრად კითხვა დამებადა, ისე, ქალბატონ ნინო აქვს ჟურნალისტის ლიცენზია? ადექვატური არგუმეტებით არ ვაპირებ გავაბათილო (ჯანდაბას, იყოს რიტორიკული კითხვა. ;)) გიო, ჩათვალე რომ ეს შესანიშნავი კატალიზატორია შენთვის, რაც უფრო მეტად ფრთებს შეასხამს შენს ალტრუისტულ იდეებს, საამაყო კოლეგა ხარ, მასე გააგრძელე!"

ჯაბა ზარქუა:

"ისე, სამართლიანობისთვის არ შეიძლება ერთი რამ არ ვთქვათ: გიორგი ღოღობერიძეს რომ ლიცენზიის არქონის გამო ამუნათებს ყვითელი გადაცემის ტელეწამყვანი, იმავე გადაცემაში რომ “დოქტორის” სტატუსით ქ-ნი თოფურია უზის და მის ცალსახად მავნებლურ მოსაზრებებს უკრიტიკოდ ტირაჟირებს, ეგ რანაირი სტანდარტია? ძაანაც ნუ მიაწვებიან ამ ლიცენზირების საკითხს, სამწუხაროდ ქართული სამედიცინო ლიცენზია საერთოდ არ არის ამსახველი არათუ მაღალი, არამედ სტანდარტული სამედიცინო ცოდნისაც და ეს ყველას კარგად უნდა გვახსოვდეს რომ ძაანაც ილუზიებში არ გავიჭრათ"

ბექა ბახტაძე:

"სანამ საქართველოში რეზიდენტურა იქნება ფასიანი, ანუ 6 წლიანი სამედიცინო სკოლის შემდეგ რეზიდენტს კიდევ მოთხოვ ფულის გადახდას პროფესიის დაუფლებაში, მანამ არაფერი გვეშველება. ეს პირდაპირ აკნინებს რეზიდენტურის ინსტიტუტს და, რა თქმა უნდა, ქილიკით უყურებენ რეზიდენტებს მავანნი. ხარისხი, გამოცდილება, პაციენტების რაოდენობა, პროცედურები, ტრეინინგის სტანდარტიზაცია ა.შ. ეგ ყველაფერი მეორე ხარისხოვანია ამასთან შედარებით. ვერ ვხვდები, როგორ ეგუებიან რეზიდენტები ამ ყველაფერს, ცვლილებაა საჭირო!"

სოფია ჯანიაშვილი:

"მიუხედავად იმისა, რომ უკვე რამდენჯერმე გამოვხატე ჩემი აზრი ამ ვიდეოსთან დაკავშირებით, თავს ვალდებულად ვთვლი ჩემს ფეისბუქ სივრცეში კიდევ ერთხელ დავაფიქსირო ჩემი პოზიცია.

ჩვენ ყველამ კარგად დავინახეთ, თუ რა საფრთხის წინაშე დგას დღეს საქართველოში ახალგაზრდა, ნიჭიერი ადამიანები, რომლებსაც “ღვაწლმოსილი” საზოგადოება უბრალოდ ვერ ითმენს, ვერ ხედავს და ვერ აფასებს.. პირველ რიგში უნდა ვთქვათ, რომ იმ ურთულეს პერიოდში, რაც ჩვენ ყველამ ერთად გავიარეთ და დღესაც გავდივართ, გიორგის ვიდეო მიმართვები და სამედიცინო რჩევები ყველა ჩვენგანისთვის იყო ერთგვარი გამოფხიზლება, სტიმული და ჩვენ ყველამ ერთად ვიგრძენით, რომ მისი სახით გვყავს ექიმი, ბევრ სხვა ექიმთან ერთად, ვისაც ნამდვილად ადარდებს ადამიანის სიცოცხლე და ჯანმრთელობა. ალბათ არავის გვიკვირს, რომ დღეს ექიმთან მისვლის შესაძლებლობა და სამედიცინო კვლევების ჩატარების ფუფუნება ძალიან ცოტას თუ აქვს საქართველოში, შესაბამისად საზოგადოების უმრავლესობა მიმართავს თვითმკურნალობას, რომელიც უმეტეს შემთხვევაში ან საერთოდ არ არის შედეგიანი ან დროებით გვაძლევს ხოლმე შედეგს. გიორგის ვიდეო მიმართვებში კი ყოველთვის ძალიან სწორად, ყველა წესის დაცვით, სამედიცინო კვლევებიდან გამომდინარე ვისმენთ იმ რჩევებს და პასუხებს, რომელიც ყველა ჩვენგანისთვის დამაკმაყოფილებელი და იმედის მომცემია. ეს ადამიანი დიდ ყურადღებას ამახვილებს იმ საკითხებზე, რომელიც ძირითადად აწუხებს ჩვენს მოსახლეობას, ამიტომ ვფიქრობ, რომ ძალიან დასაფასებელია მისი უანგარო სიკეთე და ესოდენ დიდი ენთუზიაზმი. დიდი იმედი მაქვს ოდესმე მაინც დასრულდება ჩვენს ქვეყანაში გამოცდილი საზოგადოებისგან ახალგაზრდა, დამწყები, ნიჭიერი ადამიანებისადმი თითის ქნევა, მითუმეტეს ასე საჯაროდ და ჩვენ შევძლებთ, რომ დავაფასოთ, დავინახოთ ერთმანეთი, თამამად და ღიად ვაღიაროთ სიკეთით სავსე წამოწყებები და უბრალოდ ვიდგეთ ერთმანეთის გვერდით.

წარმატებებს გისურვებ გიორგი, ძალიან კეთილო და დიდი სიყვარულის მქონე ადამიანო"

დავით მათიაშვილი:

"ეს სამარცხვინო გადაცამა... ეს სამარცხვინო არხი..."

კოლეგებისა და რიგითი ადამიანების მხარდასაჭერ პოსტებს ასევე სოციალურ ქსელში გამოეხმაურა თავად გიორგი ღოღობერიძეც:

"არ ვიცი… მართლა არ ველოდი… ანუ არ მეგონა, თუ ხალხი ასე დამიდგებოდა გვერდით… თითოეულ თქვენგანს უდიდესი მადლობა…ძალიან მეუხერხულა, რომ თქვენი ყურადღება მივიქციე… მართლა ძალიან დიდი ბოდიში და ყველას განსაკუთრებული მადლობა… ყველას, ყველას უკლებრივ… ყველა თქვენგანის ეს მხარდაჭერა ვნახე, ვიგრძენი და იმ იმედით მივიღე, რომ თუ ოდესმე რამე გავხდები, სიკეთითვე დაგიბრუნოთ…

პ.ს. მე მჯერა, რომ არც მათ სურდათ ჩემთვის ცუდი და არც მე - მათთვის"