დავით კოდუას პატიმრობა შეეფარდა - "ემოციებით დატვირთული ქალია - ეჭვიანობის ნიადაგზე უაზრობაში აღმოვჩნდით, ვიფიქრე, გავარიდებ თავს, ლიფტთან წავიქეცი და "შირმას" დავეჯახე"

ცოლისა და შვილის ძალადობის ფაქტზე დაკავებულ ბიზნესმენს დავით კოდუას აღკვეთის ღონისძიების სახით პატიმრობა შეეფარდა. აღნიშნული გადაწყვეტილება თბილისის საქალაქო სასამართლოს მოსამართლემ რომან ხორავამ გამოაცხადა.

დღევანდელ სასამართლო პროცესზე დაცვის მხარე კოდუას აღკვეთის ღონისძიების გარეშე დატოვებას, პროკურატურა კი პატიმრობის გამოყენებას მოითხოვდა.

მოსამართლის განმარტებით, დაცვის მხარემ ის ვერ დაარწმუნა, რომ კოდუას მხრიდან დანაშაულებრივ ქმედებას ადგილი არ ჰქონია.

"ვერ დამარწმუნეთ, რომ ფიზიკურ ძალადობას არ ჰქონია ადგილი. პოლიციელების, ექიმების ჩვენებები, დაზიანებები მაძლევს იმის საფუძველს დასაბუთებული ვარაუდის სტანდარტით, რომ ძალადობას ჰქონდა ადგილი", - განაცხადა მოსამართლემ.

დღევანდელ სასამართლო პროცესზე სიტყვით ისარგებლა თავად ბრალდებულმაც და განაცხადა, რომ მისი მხრიდან ფიზიკურ ძალადობას არ ჰქონია ადგილი. კოდუას განცხადებით, მას სურდა მეუღლეს გარიდებოდა, თუმცა, ე.წ. კომენდანტის საათის გამო მას სახლიდან არ უშვებდნენ. კოდუას თქმით, ის ლიფტთან წაიქცა და "შირმას" დაეჯახა.

ბრალდებულმა რამდენჯერმე ახსენა, რომ მას 30 წელია ოჯახი აქვს და დეტალებზე არ სურს საუბარი.

"მესამე სართულზე ავედი და ჩემთვის ვიჯექი, ვვახშმობდი და თვითონ ამოვიდა ემოციებით დატვირთული - "ამან თქვა, იმან თქვაო", ავდექი, ლიფტთან დაიწყო - არ წახვიდე, სად მიდიხარო... ლიფტთან წავიქეცი და "შირმას" დავეჯახე, უხერხულიცაა ამაზე საუბარი. მაკავებდნენ, „კომენდატის საათი“ იყო და არ უნდოდათ წავსულიყავი, არ მინდოდა კონფლიქტი და გამოვედი. 4 შვილის მამა, შვილიშვილის ბაბუა ვარ, "იმან თქვა, ამან თქვაზე" აწყობილი ქალი, ემოციებით დატვირთული ქალი იყო, ეჭვიანობის ნიადაგზე უაზრობაში აღმოვჩნდით, ვიფიქრე, გავარიდებ თავს, დამშვიდდება-მეთქი და წავედი. წასასვლელის მეტი რა მაქვს, 4 სახლი მაქვს თბილისში, წყნეთში, ოფისში ჩავედი, „კომენდანტის საათი“ რადგან იყო, იქვე სახლთან ჩავედი", - განაცხადა კოდუამ.

ბიზნესმენის ოჯახი ითხოვდა, რომ სასამართლოს დავით კოდუა გირაოს სანაცვლოდ გაეთავისუფლებინა და შემაკავებელი ორდერი გამოეწერა.

კოდუას ოჯახის წევრებმა - მეუღლემ, ნათია გედევანიშვილმა და შვილმა, კატო კოდუმ დღეს, ჟურნალისტებთან მათ ოჯახში მომხდარი კონფლიქტის შესახებ ისაუბრეს და განმარტეს, რომ კონფლიქტის ღამეს ადგილი ჰქონდა მხოლოდ სიტყვიერ დაპირისპირებას და არა ფიზიკურ ძალადობას.

ნათია გედევანიშვილის განცხადებით, ოჯახში მომხდარი კონფლიქტის შესახებ ჩვენება მან და მისმა შვილმა, კატო კოდუამ ვაკის პოლიციის განყოფილებაში მისცეს. მისივე განმარტებით, ჩვენების მიცემისას პოლიციას განუმარტეს, რომ ადგილი ჰქონდა მხოლოდ სიტყვიერ დაპირისპირებას, რის გამოც დავით კოდუას მიმართ შემაკავებელი ორდერის გამოწერას ითხოვდნენ. გედევანიშვილი განმარტავს, რომ განყოფილებაში მიცემულ ჩვენებას არ ცვლის, თუმცა გაუგებრობას იწვევს ის, რომ პოლიციას სხვა რამ უთხრა, ჩვენებაში კი პოლიციის მიერ სხვა რამეა ასახული.

„ეს იყო სიტყვიერი შელაპარაკება, არანაირ ძალადობას ადგილი არ ჰქონია. პოლიციაში ჩვენების მიცემის მერე, ამობეჭდილზე ხელი მოგვაწერინეს და იქ, რაც წერია წაკითხული არ გვაქვს. საერთოდ აზრზე არ ვართ, წარმოდგენა არ გვაქვს, რა წერია შიგნით ანუ, პოლიციაში თვითონ ბეჭდავდნენ და ჩვენ რომ ხელი მოვაწერეთ, არ წაგვიკითხავს, იმიტომ, რომ ბევრი მედიკამენტი მაქვს მიღებული, ღამის საათები იყო, პროცესი დილამდე გაიწელა და ისე მოვაწერეთ ხელი, უკვე გვაჩქარებდნენ. გვითხრეს, ცოდოები ხართო. წაკითხვა რომ მოვინდომე, არ არის საჭიროო. ჩვენ ვითხოვდით შემაკავებელ ორდერს. მე და კატო ვსაუბრობდით იმაზე, რომ ადგილი ჰქონდა ჯიკაობას. დათოს წასვლა უნდოდა. სიტყვიერი კონფლიქტი იყო“, - განაცხადა ნათია გედევანიშვილმა.

კითხვაზე, ფიზიკურად შეეხო, თუ არა მეუღლე, გედევანიშვილმა ასე უპასუხა: „არა, უბრალოდ ხელი მკრა და დავვარდი, თვალი დავარტყი სავარძელს“.

რაც შეეხება გავრცელებულ ინფორმაციას, რომ დაზიანებები თვითონ დათო კოდუასაც აღენიშნება, მეუღლე ნათია გედევანიშვილმა განმარტა, რომ ამის შესახებ არაფერი იცის.

შვილის, კატო კოდუას განცხადებით კი, ოჯახში მომხდარი კონფლიქტისას დედამ თვალის არეში დაზიანება ლიფტთან მდგარ სავარძელზე დაჯახებით მიიღო.

„არანაირ ფიზიკურ დაპირისპირებას ადგილი არ ჰქონია. უბრალოდ იყო სიტყვიერი შეკამათება. დავითს წასვლა უნდოდა სიტყვიერი დაპირისპირების გამო. რადგანაც „კომენდანტის საათი“ იყო, მოვუწოდეთ, რომ არ წასულიყო, ვინაიდან დაჯარიმდებოდა. ამის შემდეგ გამოვიძახეთ პოლიცია, რათა პრობლემა აგვეცილებინა თავიდან. როცა პოლიცია მოვიდა, დათო ამ დროს სახლიდან წასული იყო. სასწრაფოც მოვიდა, დამამშვიდებლები მოგვცეს და წაგვიყვანეს პილიციაში. იქ პროცესი ძალიან გაიწელა, რაღაცებს გვეკითხებოდნენ. ჩვენ მხოლოდ ორდერს ვითხოვდით, რათა სახლში კონფლიქტი არ ყოფილიყო. რაც პოლიციამ (ჩვენებაში) დაწერა, არც წაგვიკითხავს, დილა იყო, გვაჩქარებდნენ. გვითხრეს ხელი მოაწერეთო და მოვაწერეთ... დათოს წასვლა უნდოდა, როდესაც ლიფტი გაიღო, ვაკავებდით, ვთხოვდით, არ წასულიყო. გვითხრა, გამიშვითო და ნათია დაეცა, მე ეს დავინახე. სავარძელი ლიფტთან არის. სახლში მხოლოდ სიტყვიერი შელაპარაკება იყო“, - განაცხადა კატო კოდუამ.

დავით კოდუას ადვოკატების განმარტებით, კოდუას ჯანმრთელობის მდგომარეობა მძიმეა, მას ხელზე მყესი აქვს გაწყვეტილი, ამასთან, უროლოგიური ოპერაცია აქვს გაკეთებული და მას ყოველდღიურად ინექცია სჭირდება.

შეგახსენებთ, საქართველოს პროკურატურამ ბიზნესმენ დავით კოდუას მეუღლის და შვილის მიმართ განხორციელებული ფიზიკური ძალადობის ფაქტზე ბრალი წარუდგინა. კოდუას ბრალი საქართველოს სისხლის სამართლის კოდექსის 126 პრიმა მუხლის მე-2 ნაწილის ,,გ’’ ქვეპუნქტით (ოჯახის ერთი წევრის მიერ, ოჯახის სხვა წევრის მიმართ ძალადობა, რამაც ფიზიკური ტკივილი გამოიწვია, ჩადენილი ორი ან მეტი პირის მიმართ) განესაზღვრა, რაც სასჯელის სახედ და ზომად ერთიდან-სამ წლამდე თავისუფლების აღკვეთას ითვალისწინებს.