"მთელი სოფელი შოკშია... მკვლელმა ავთოს დეიდას დაურეკა, დისშვილი მოგიკალიო" - ვინ იყო ჩოხატაურში მოკლული 26 წლის ბიჭი
ჩოხატაურში, სოფელ გუთურში მოკლული ახალგაზრდა მამაკაცი ერთ-ერთი ბანკის თანამშრომელი იყო. სოფლის რწმუნებული და მოკლულის მეზობელი გია პაიჭაძე AMBEBI.GE -სთან ყვება, რომ გარდაცვლილი 26 წლის ავთო კალანდაძე ერთ-ერთი ბანკის პრობლემური სესხების განყოფილებაში მუშაობდა. მკვლელობის მოტივის შესახებ სოფელში საუბარი ჯერჯერობით უჭირთ.
"შოკში ვართ მთელი სოფელი. უპატიოსნესი დედ-მამა ჰყავს. თვითონაც ისეთი მშვიდი და გაწონასწორებული ბიჭი იყო, კონფლიქტი არავისთან ჰქონია. გაოცებული ვართ ყველა. საერთოდ თბილისში მუშაობდა, რომელიღაც ბანკის პრობლემური სესხების განყოფილებაში. ახლა პანდემიის გამო სოფელში იყო ჩამოსული. ეზოში ყოფილა, ცეცხლსასროლი იარაღი რომ ესროლეს. დეტალები არ ვიცი, როგორ მოკლეს.
ეს მკვლელი აქაური არ არის. მკვლელს მოკლულის დეიდისთვის დაურეკავს და უთქვამს, დისშვილი მოგიკალიო. ამ ქალს საკუთარი შვილებიც ჰყავს და შურისძიება რომ იყოს მასზე, დისშვილს რატომ მოუკლავდნენ. ეს ყველაფერი მოკლული ბიჭის მეორე დეიდამ თქვა. ჩემს დას დაურეკა მკვლელმა და ასე უთხრაო. სხვა არაფერი ვიცი“, - ამბობს გია პაიჭაძე.
როგორც AMBEBI.GE-ს შინაგან საქმეთა სამინისტროში განუცხადეს, მომხდარზე გამოძიება სსკ-ს 108-ე მუხლით დაიწყო, რაც განზრახ მკვლელობას გულისხმობს.
შსს-ს პასუხი ბათუმის აქციის მონაწილეებს - "ვასაჯაროებთ ვიდეოკადრებს, სადაც დაკავებულების ხულიგნობის ფაქტია ასახული"
"თუ ნიკოლოზ ბასილაშვილის ბრალეულობა დამტკიცდება, ღირსეულად მოიხდის სასჯელს და არ გაექცევა" - ადვოკატი
