ლონდა თოლორაია -  "მწვანე სკოლამ" პოლიციას სათვალთვალო კამერებისა და არასრულწლოვანთა კომუნიკაციის ჩანაწერები გადასცა

სახელმწიფო ინსპექტორმა ლონდა თოლორაიამ პრესკონფერენციაზე 15 წლის ლუკა სირაძის საქმის დეტალებზე ისაუბრა. მან მედიის წარმომადგენლებს გააცნო ამ დრომდე საგამოძიებო მოქმედებების შედეგად გამოკვეთილი გარემოებები.

"ვინაიდან საქმე ეხება არასრულწლოვანს, ამავდროულად საგამოძიებო მოქმედებების ჩატარებაში მონაწილეობას იღებს არაერთი არასრულწლოვანი, მე განსაკუთრებული სიფრთხილით ვზომავ ყველა სიტყვას, რომელსაც ამ სისხლის სამართლის საქმესთან დაკავშირებით ვამბობ. დარწმუნებული ვარ, ყველანი ვაცნობიერებთ ამ საქმის განსაკუთრებულად სენსიტიურ ხასიათს და ყველას გთხოვთ, რომ ამ საქმესთან დაკავშირებით საუბარს მოვეკიდოთ განსაკუთრებული სიფრთხილით. როგორც მოგეხსენებათ, ამ საქმეზე სახელმწიფო ინსპექტორის სამსახურმა გამოძიება დაიწყო 12 დეკემბერს, ჩვენ მოგვმართა საია-ს ადვოკატმა, რომელიც მიუთითებდა პოლიციის დაწესებულებაში 15 წლის არასრულწლოვნის მიმართ განხორციელებული სავარაუდო იძულების ფაქტზე. გამოძიება დაიწყო დაუყოვნებლივ, 335-ე მუხლის პირველი ნაწილით, რაც გულისხმობს ჩვენების მიცემის იძულებას.

დღემდე ჩატარებულია 100-ზე მეტი საგამოძიებო მოქმედება ამ საქმეზე, დაიკითხა და ახლაც მიმდინარეობს ყველა იმ პირის გამოკითხვა, რომელსაც შეიძლება მინიმალური ინფორმაციაც კი ჰქონდეს საქმის ფაქტობრივი გარემოებების შესახებ, ამოვიღეთ და დავათვალიერეთ არასრულწლოვნის პერსონალური კომპიუტერი, მობილური ტელეფონი, შემავალი და გამავალი ზარების დეტალური ნუსხა, დავათვალიერეთ შემთხვევის ადგილი, ასევე ყველა ადგილი, რომელიც გამოძიებისთვის შეიძლება ყოფილიყო საინტერესო, ჩავატარეთ სხვადასხვა ტიპის და ამჟამადაც დანიშნულია სხვადასხვა ტიპის ექსპერტიზები და დღემდე გრძელდება საგამოძიებო პროცესი რომელიც აქტიურია. გათვალისწინებით იმისა რომ განსაკუთრებულად მგრძნობიარეა ეს სისხლის სამართლის საქმე, ამ საქმეში ჩართულია ფსიქოლოგი, რომელიც აბსოლუტურად ყველა საგამოძიებო მოქმედებაში, რომელშიც მონაწილეობას იღებენ არასრულწლოვანი ბავშვები, იღებს მონაწილეობას", - განაცხადა თოლორაიამ.

მისი თქმით, ჩატარებული გამოძიებით და ამ ეტაპზე მოპოვებული მტკიცებულებებით, 15 წლის მოზარდმა, რომელმაც თვითმკვლელობა პოლიციაში გამოკითხვის შემდეგ სცადა, პოლიციის დაწესებულებაში ექვსსაათნახევარი დაჰყო.

" 2019 წლის 10 დეკემბერს, დილით, "მწვანე სკოლის" ადმინისტრაციამ აღმოაჩინა, რომ სკოლის გარე და შიდა პერიმეტრი იყო მოხატული და გაკეთებული იყო შესაბამისი წარწერები. აღნიშნული ქმედების ჩამდენი პირის იდენტიფიცირების მიზნით სკოლის ადმინისტრაციამ დაათვალიერა სკოლის პერიმეტრზე დამონტაჟებული სათვალთვალო ვიდეოკამერები. ასევე, ქმედების ჩამდენი პირის იდენტიფიცირების მიზნით, დაიწყო ბავშვების გამოკითხვა ჯგუფურად, ასევე ბავშვებისთვის ამ აუდიო-ვიდეოჩანაწერებზე აღბეჭდილი სურათის წარდგენა, მასზე აღბეჭდილი ჩამდენი პირის იდენტიფიცირების მიზნით და პარალელურ რეჟიმში, გამოძახებული იქნა პოლიცია, ვინაიდან ჩაითვალა, რომ მიღწეული ზიანი იძლეოდა პოლიციისთვის შეტყობინების საჭიროებას.

პოლიციის მისვლამდე ბავშვებთან კომუნიკაცია აქვს სკოლის ადმინისტრაციას, მათი მისვლის შემდგომ სკოლის ადმინისტრაციამ პოლიციას გადასცა სათვალთვალო კამერების მიერ დაფიქსირებული ჩანაწერები ყოველგვარი სამართლებრივი საფუძვლის გარეშე, ასევე, პოლიციის ხელში მოხვდა არასრულწლოვანთა კომუნიკაციის ამსახველი ჩანაწერები. აღნიშნულის შემდგომ პოლიციაში შედის ოფიციალურად შეტყობინება, რომლის საფუძველზე იწყება გამოძიება უკვე დიდუბე-ჩუღურეთის სამმართველოს პირველ განყოფილებაში, სადაც აღნიშნულ ფაქტზე გამოძიება იწყება 187-ე მუხლით - ნივთის განზრახ დაზიანება, და აღნიშნული სისხლის სამართლის საქმე გამოსაძიებლად ეწერება გამომძიებელ მ.ჩ.-ს.

ამავე დღეს აღნიშნულმა გამომძიებელმა დაიწყო საქმეზე საგამოძიებო მოქმედებების ჩატარება, მათ შორის დაიწყო პოლიციის განყოფილებაში მოწმეთა დაბარება, რომელთა შორის იყო 15 წლის ლ.ს. პოლიციის მხრიდან ამ არასრულწლოვნის გამოძახება მოხდა მშობლის მეშვეობით და მშობელთან ერთად ლ.ს. პოლიციის დაწესებულებაში გამოცხადდა 17:00 საათზე. არასრულწლოვანთან გასაუბრება მიმდინარეობდა დაახლოებით ექვსსაათნახევარი და ის დაწესებულებაში იმყოფებოდა ღამის თორმეტის ნახევრამდე ნახევრამდე, ანუ მისი გამოკითხვის და მასთან გასაუბრების პროცესი გრძელდებოდა ხანგრძლივი ვადით და მათ შორის ღამის საათებში. ვინაიდან პოლიციაში არ არსებობს არასრულწლოვნებისთვის განკუთვნილი სპეციალური ოთახები, არასრულწლოვნის გამოკითხვა მიმდინარეობდა პოლიციაში ერთიან სივრცეში, სადაც ასევე იმყოფებოდნენ პოლიციის სხვა თანამშრომლები.

ჩვენების საფუძველზე გამომძიებელმა მ.ჩ.-მ არასრულწლოვან ლ.ს.-ს უთხრა, რომ დანაშაულის არაღიარების შემთხვევაში მის ძმას, რომელიც სწავლობდა სამხედრო აკადემიაში, შეექმნებოდა გარკვეული სახის პრობლემები, თუ იგი დანაშაულს არ აღიარებდა. ასევე გამომძიებელმა არაარულწლოვანს, 15 წლის ლ.ს.-ს დაუპირისპირა ამავე პერიოდში პოლიციის განყოფილებაში დაბარებული სხვა მოწმეები, რომელთა შორის იყო როგორც სკოლის ადმინისტრაციის წარმომადგენელი, ასევე სხვა არასრულწლოვნები. იმის გამო, რომ გამომძიებელმა არ იმოქმედა არასრულწლოვანთა მართლმსაჯულების ინტერესების შესაბამისად, იმ კანონმდებლობის შესაბამისად, რომლითაც დღეს რეგულირდება საქართველოში არასრულწლოვანთა მართლმსაჯულებით, რომელიც განსაზღვრავს პრინციპებს, რაც უნდა იყოს დაცული პოლიციის დაწესებულებაში, აღნიშნულის გამო, არასრულწლოცვნებმა, რომელიც იმ დღეს იქ იმყოფებოდნენ და რომელთა შორის დაპირისპირება მოხდა, განიცადეს ძალიან ძლიერი ემოციური სტრესი", - განაცხადა თოლორაიამ.

მისივე თქმით, შეკრებილი მტკიცებულებების საფუძველზე, 2019 წლის 17 დეკემბერს, 15:00 საათზე, სახელმწიფო ინსპექტორის სამსახურის საგამოძიებო დეპარტამენტში გამოკითხვაზე გამოძახებული იქნა გამომძიებელი მ.ჩ., რომლის დაკითხვის შემდგომ მიღებული იქნა მისი დაკავების გადაწყვეტილება.

"საქართველოს გენერალური პროკურატურის მიერ მ.ჩ.-ს წარედგინა ბრალდება სსკ-ს 335-ე მუხლის პირველი ნაწილით, ორი ეპიზოდით და ამჟამად მიმდინარეობს აღკვეთის ღონისძიების შეფარდების საკითხი", - აღნიშნა ლონდა თოლორაიამ.