რა ბედი ეწევათ თევდორე მღვდლის ქუჩაზე აფეთქებული კორპუსის მაცხოვრებლებს - გამგებელი ბოლო მონაცემების შესახებ (ფოტოები)

თევდორე მღვდლის ქუჩის 38 ნომერში მდებარე საცხოვრებელი კორპუსის იმ სადარბაზოში მცხოვრებთა ნაწილს, სადაც აფეთქება მოხდა, სასტუმროში გადაიყვანენ, ნაწილს კი დროებითი ალტერნატიული საცხოვრებელი აქვთ. ამის შესახებ დიდუბის რაიონის გამგებელმა, ირმა ზავრადაშვილმა განაცხადა.

• "აფეთქებულია მეხუთე სართული" - რა ვითარებაა თევდორე მღვდლის ქუჩაზე და როგორია პირველადი დასკვნა მომხდარის მიზეზებზე

მან ისაუბრა თევდორე მღვდლის ქუჩაზე, ერთ-ერთ საცხოვრებელ კორპუსში მომხდარი აფეთქების შესახებ, რომლის შედეგად ერთი ადამიანი დაშავდა.

"აფეთქება 5-სართულიანი კორპუსის მეხუთე სართულზე მდებარე სამოთახიან ბინაში მოხდა. ჯერ არ ვიცით მიზეზი. ვიზუალური დათვალიერებით, დაზიანებულია მეხუთე სართული და მეოთხე სართულის ნაწილი. ადგილზეა მობილიზებული გამგეობა, მერიის ინფრასტრუქტურის სამსახური, ლაბორატორია, მშენებელი კომპანიები, პოლიცია, უსაფრთხოების სამსახური, შსს, "თბილისი ენერჯი" და "თელასი". პირველ სადარბაზოში, სადაც ეს მოხდა, 15 ოჯახი ცხოვრობს და არც ერთ მოსახლეს შიგნით არ შევუშვებთ, გათიშულია დენიც, გაზიც, წყალიც, მთლიანად კომუნიკაციები. ამ ეტაპისთვის 5 ოჯახს გადავიყვანთ სასტუმროში, დანარჩენებს აქვთ ალტერნატიული წასასვლელი. რაც შეეხება მეორე სადარბაზოს, სადაც ასევე კომუნიკაციები ჩახსნილია, იქ შევიდნენ ლაბორატორია და ინფრასტრუქტურის სამსახური, აღმოჩნდა, რომ იქ არ არის დაზიანება და შეიძლება შესვლა, მაგრამ ალტერნატიული შესასვლელი არ ჰქონდათ. გვერდზე ეზოდან ალტერნატიულ შესასვლელს გავუკეთებთ იმ სადარბაზოს და უსაფრთხოების სამსახურის თანამშრომლებთან ერთად, მათ დღეს შევუშვებთ“, - განაცხადა ზავრადაშვილმა.

მანვე უპასუხა კითხვას, თუ როდის შეეძლებათ დაზიანებული სადარბაზოს მობინადრეებს კორპუსში შესვლა.

„ამის ზუსტად თქმა არ შემიძლია, სანამ არ დაიწყებენ საფრთხის შემცველი ელემენტების ჩამოხსნას და გამაგრებით სამუშაოებს. მეორე სადარბაზოში დღესვე შევიყვანთ მცხოვრებლებს, როგორც კი ალტერნატიულ შესასვლელს გავუკეთებთ და დენს აღვუდგენთ. კორპუსის აღდგენა პრაქტიკულად უკვე დაწყებულია. როგორც ყველა დანარჩენ შემთხვევაში, მერიის ინფრასტრუქტურის სამსახური კორპუსს აღადგენს. არც ერთ მოსახლეს არ დავტოვებთ ყურადღების გარეშე", - აღნიშნა გამგებელმა.