როგორ ისვენებენ ცნობილები ზაფხულში

დასვენება, განტვირთვა ფიზიკური სიჯანსაღისა და ფსიქოლოგიური განწყობის აღსადგენად აუცილებელია. ზაფხული კი ამისთვის მშვენიერი დროა. მოკლედ, რთული წლის შემდეგ, სიცოცხლის ხალისი და შრომის უნარი რომ შეინარჩუნო, დასვენებაა საჭირო, რაც

ყველას თავისებურად ესმის, მაგრამ აუცილებელი რომ არის, ამაზე ყველა ვთანხმდებით, თუმცა საქმე ის არის, რომ ზოგი ამას ახერხებს და ზოგიც - ვერა. არსებობენ ადამიანები, რომლებიც საკუთარ სახლშიც მშვენივრად ისვენებენ, ზოგს - მთაში ყოფნა სიამოვნებს, ზოგს - ბარში, ვიღაცას - ზღვის სანაპიროს გარეშე ცხოვრება არ შეუძლია. ზოგიერთი კი უბრალოდ ზურგჩანთამოკიდებული ფეხით დადის, ან საძილე ტომარაში გამოძინება ანიჭებს სიამოვნებას. არიან ადამიანები, ვისაც საკუთარ თავთან მარტო დარჩენა სიამოვნებთ. თუ პიროვნება კონტაქტურია, სასიამოვნო ადამიანების გარემოცვაში ამჯობინებს ყოფნას და ასეთი დასვენება მისთვის დაუვიწყარი ხდება...

საზაფხულო დასვენებასთან დაკავშირებით AMBEBI.GE რამდენიმე ცნობილ ადამიანს გაესაუბრა და გაარკვია, თითოეულ მათგანს როგორი ტიპის დასვენება უყვარს და რა გეგმები აქვს ამ სეზონზე.

რატი დურგლიშვილი, მომღერალი:

- პირველ რიგში, ადამიანებს ვუსურვებ, რომ ეს ზაფხული მაქსიმალურად გამოიყენონ და ნაყოფიერად დაისვენონ. ნახონ საქართველოს ღირშესანიშნაობებიც და უცხოეთშიც წავიდნენ, რა თქმა უნდა, ვისაც ამის საშუალება აქვს. თუმცა ახლა ტურისტულ კომპანიებს ისეთი შეთავაზებები აქვთ, რომ დასასვენებლად ნებისმიერი თანხის პაკეტები არსებობს. თან, ყველგან უამრავი რამ არის სანახავი, როგორც საქართველოში, ისე - უცხოეთში.

მიყვარს ჩვენი ლამაზი ქვეყანა, სადაც თითქმის ყველაფერი მაქვს ნანახი, მაგრამ ამჯერად უცხოეთში წასვლის სურვილი მაქვს, რადგანაც არ არის ცუდი, როცა ქვეყნიდან გადიხარ და სხვა ქვეყნების კულტურებს ეცნობი. ამიტომ, ყველას ვუსურვებ, რომ კარგი ზაფხულის ჰქონოდეს, იღბლიანი და ნაყოფიერი. ახლა რაც შეეხება ჩემს საზაფხულო გეგმებს, როგორც გითხარით, უპირატესობას საქართველოს საზღვრებს გარეთ გასვლას ვანიჭებ, ამიტომ ევროპის რამდენიმე ქალაქის მონახულება მაქვს დაგეგმილი. ოქტომბრიდან ამერიკაში გამგზავრებას ვგეგმავ.

- ე.ი. შენთვის ფასს არ აქვს მნიშვნელობა?

- ყველანაირ სიტუაციაში ვყოფილვარ, როგორც მცირებიუჯეტიანში, ისე სერიოზული თანხაც გადამიხდია. მეგობრებთან ერთად მივდივარ ხოლმე და მერე ჩვენით ვგეგმავთ ტურებს, იქაურ სერვისებს ხშირად არც ვიყენებთ.

- ახლაც მეგობრებთან ერთად გაემგზავრები?

- მყავს ბევრი უცხოელი მეგობარი, რომლებიც ადგილზე რომ ჩავდივარ, სხვადასხვა ქალაქში მხვდებიან და დროს მათ გარემოცვაში ვატარებ. სიმართლე რომ გითხრათ, დასვენება მარტოც მიყვარს, შარშან გემზე რომ ვიყავი, მარტო წავედი და იქიდან 7 მეგობრით ჩამოვედი, თუ არ ჩავთვლით იმას, რომ მთელი გემის მგზავრები გავიცანი. ვგიჟდები ადამიანებთან კომუნიკაციაზე, რადგანაც ისინი მჭირდება. ყურადღება და კომუნიკაცია გვაახალგაზრდავებს და ენერგიას გვძენს. არადა, ჩვენს ქვეყანაში სამწუხაროდ, ამის დეფიციტია, ადამიანებს კომპლექსების გამო რატომღაც ერიდებათ ერთმანეთისთვის გამარჯობის თქმა. მეც მაქვს გარკვეული კომპლექსები, მაგრამ სცენამ სითამამე და მეტი თავისუფლება მომანიჭა.

ზუზუ ბეჟაშვილი, მსახიობი:

- ძალიან მიყვარს დასვენება, მაგრამ ისე არ ხდება ხოლმე, როგორც მინდა, დასვენებას შესაბამისად ვერ ვახერხებ... ცოტა ხნის წინ გადაღებები მქონდა, ახლა ვწუწუნებ, რომ ფული არ მაქვს. დიახ, მთავარი ის არის, რომ დასვენებას დროსთან ერთად, თანხაც უნდა, მაგრამ წელს როგორც ვაპირებდი, ორი კვირით დავისვენო, ამას მაინც მოვახერხებ. საქართველოში თუ საზღვრებს გარეთ, ამას არ აქვს მნიშვნელობა, 2 კვირას აუცილებლად გამოვძებნი. საბერძნეთში მინდა წავიდე, რადგანაც ბათუმზე უკეთ მიმაჩნია, რომ იქ დავისვენებ.

- როგორც ჩანს, აქტიური დასვენება არ გიყვარს?

- ასაკმა თავისი იცის, თუმცა აქტიური დასვენება მიყვარდა, მაგრამ იქიდან დაღლილი ჩამოვდიოდი და მერე აქ თბილისში ვისვენებდი ხოლმე. მოკლედ, ჩვენ რომ დასვენებას ვეძახით, ისეთი არ მინდა.

ისე, დიდი სურვილი მქონდა, ინდოეთში წავსულიყავი, მაგრამ ქართველები ვართ და ისე არ ხდება, როგორც გინდა. ხანდახან საგურამოში წასვლა დამიგეგმავს და ბერლინი გამომსვლია, ბერლინი დამიგეგმავს, სიღნაღში წასვლა ამსრულებია. ამიტომ კონკრეტულად მაინც ვერაფერს ვგეგმავ, მხოლოდ ის ვიცი, რომ 2 კვირა სადღაც უნდა წავიდე. მიყვარს მარტო წასვლა, ოღონდ, მერე მარტო აღარ ვარ ხოლმე, ამას არ ვიცი, როგორი დასვენება ჰქვია...

მაკა ზამბახიძე, მომღერალი:

- ზაფხულის დასვენებასთან დაკავშირებით გრძელვადიანი გეგმები არ მაქვს, რადგანაც შესაბამისად, შემოქმედებითი თვალსაზრისით ვემზადები და მხოლოდ ერთი კვირით, მეგობრებთან ერთად ვგეგმავ ქვეყნის საზღვრებს გარეთ გასვლას, ალბათ, უფრო თურქეთში. ამის გარდა, ზაფხულია და დატვირთულია (სხვადასხვა რეგიონში) კონცერტებითაც. კიდევ სასექტემბროდ კონცერტის სამზადისი მქვს, ვწერ სიმღერებს...

ალეკო ბეგალიშვილი, მსახიობი:

- არა, რა დასვენება, დღეში სამი რეპეტიცია მაქვს თეატრში, გოგა თავაძე "სამგროშიან ოპერას" დგამს, პაატა ციკოლია - საკუთარ პიესას, ილია ჭავჭავაძის იუბილისადმი მიძღვნილ ღონისძიებაშიც ვმონაწილეობ.

ასე რომ, დასვენებას ჯერ ვერ ვახერხებ, აგვისტოში თუ მოვახერხებ ქალაქიდან გასვლას, ისიც არ ვიცი. თან, 11 აგვისტოს ჩემი ძმის წლისთავიც მოდის. იქნებ ვერსადაც ვერ წავიდე...ერთი პერიოდი, მეგობრები კარვებით ვარძიისკენ დავდიოდით და კარგად ვერთობოდით, ვთევზაობდით... თუმცა ზღვაზე დასვენებას თავისი "კაიფი" აქვს, მაგრამ იქ ბევრი ხალხი მოძრაობს და რია-რია მღლის. მოკლედ, წელს თუ მოვახერხე ბიჭებთან ერთად გაქცევა სადმე, კარვით, კარგია.

- დიდი თანხა დასვენებაში არასდროს დაგიხარჯავთ?

- მქონდეს დიდი თანხა და რატომაც არა? ახლა მშვენიერი ტურებია, მაგალითად, 8-დღიანი ტური იტალიისკენ, სიამოვნებით წავიდოდი, მაგრამ ეგ კი არა, ვალები ვერ გამისტუმრებია, უფულო მსახიობი ვარ...

ლალი ფაცია

ambebi.ge