24
მარტიდღის ზოგადი ასტროლოგიური პროგნოზი
ამბობენ, შემთხვევით არაფერი ხდება, ყველაფერი კანონზომიერიაო. მაგალითად, ისტორიაში უამრავი საინტერესო დამთხვევებია, რომელთა შორისაც მისტიკურ კავშირს, ახსნა არ აქვს... გთავაზობთ რამდენიმე მათგანს:
ედვინ ბუთი და რობერტ ლინკოლნი
აბრაამ ლინკოლნის სიკვდილამდე, მისი ვაჟი, რობერტი, ნიუ-ჯერსის შტატში გაემგზავრა. როდესაც მატარებელი დაიძრა, ახალგაზრდა ლინკოლნი შემთხვევით პლატფორმიდან დაბლა ჩავარდა. საბედნიეროდ, ვიღაცამ საყელოზე სტაცა ხელი და პლატფორმის უსაფრთხო ადგილას აიყვანა. მისი მხსნელი ამერიკელი მსახიობი ედვინ ბუთი აღმოჩნდა, რომლის ძმამ, ჯონ უილკს ბუთმა შემდგომში აბრაამ ლინკოლნი მოკლა.
გავრილო პრინციპი და ერცჰერცოგ ფრანც ფერდინანდი
ბოსნიელმა რევოლუციონერმა გავრილო პრინციპმა, რომელმაც ავსტრიელი ერცჰერცოგი მოკლა, თავისი მზაკვრული გეგმის განხორციელება სრულიად შემთხვევით მოახერხა. მას შემდეგ, რაც პირველი მცდელობა, გასწორებოდა ერცჰერცოგს, კრახით დასრულდა, რადიკალმა სხვა ხერხს მიმართა. ავტომობილს, რომლითაც ფრანც ფერდინანდი მეუღლესთან ერთად მგზავრობდა, გზა აებნა. მძღოლმა მანქანა გააჩერა და უკან მობრუნება გადაწყვიტა. სწორედ ამ დროს გადაწყვიტა პრინციპმა, ეს შანსი ხელიდან არ გაეშვა და რამდენჯერმე ესროლა ფრანც ფერდინანდს. შესაძლოა, მძღოლს სწორი მიმართულება რომ აეღო, პირველი მსოფლიო ომი არც კი მომხდარიყო.
ჯეიმს დინი და მისი "მკვლელი" ავტომობილი
ჯეიმს დინი XX საუკუნის 50-იანი წლების ჰოლივუდის მსახიობი გახლდათ. სიმპატიურ ნიჭიერ მსახიობს ვარსკვლავურ კარიერას უწინასწარმეტყველებდნენ, თუმცა 1955 წელს 24 წლის დინი საშინელ ავტოკატასტროფაში დაიღუპა, როდესაც სპორტულ კაბრიოლეტს Porsche Spyder-ს მართავდა. ჯეიმსი ძალზედ ამაყობდა თავისი ავტომობილით, რომელსაც მეტსახელად "პატარა ნაბიჭვარს" უწოდებდა და რომელიც მრავალი წლის განმავლობაში თესდა სიკვდილს მის გარშემო...
1. ავარიის შემდეგ, ძვირადღირებული მანქანის ნარჩენების ავტოფარეხში მოთავსება გადაწყვიტეს. რკინის გროვამ, რომელიც მოულოდნელად მანქანის მისაბმელიდან გადმოვარდა, ერთ-ერთი ავტომექანიკოსი დაასახიჩრა.
2. სპორტულ მანქანაში, რომელსაც ქირურგი სახელად უილიამ ეშრიკი მართავდა, დაამონტაჟეს "პატარა ნაბიჭვრის" ძრავა. ერთ-ერთი შეჯიბრის დროს მანქანამ წონასწორობა დაკარგა, ეშრიკი დაიღუპა...
3. უამრავ ადამიანს სურდა, აღედგინა საბედისწერო Porsche, თუმცა ავტოფარეხს, რომელშიც მანქანას არემონტებდნენ, გაურკვეველ ვითარებაში ცეცხლი წაეკიდა.
4. შემდეგ ავტომობილი ქალაქ საკრამენტოს გამოფენაზე გაიყვანეს, სადაც ის პოდიუმიდან ჩამოვარდა და იქვე მყოფ მოზარდს ბარძაყი დაუზიანა.
5. 1959 წელს წყეული ავტომობილის აღსასრულის დღეც დადგა, როდესაც ამოუხსნელი მიზეზით უეცრად 11 ნაწილად დაიშალა.
მარკ ტვენი და კომეტა გალეა
მწერალი მარკ ტვენი 1835 წელს დაიბადა, იმ დღეს, როდესაც დედამიწას კომეტა გალეამ ჩაუფრინა. 1910 წელს, მისი სიკვდილის დღეს კომეტა კვლავ გამოჩნდა, როგორც ეს მწერალმა იწინასწარმეტყველა...
"ტიტანიკი" და ტიტანი
1898 წელს, "ტიტანიკის" ტრაგედიამდე რამდენიმე წლით ადრე, ამერიკის შეერთებულ შტატებში იმ დროისთვის ჯერ კიდევ ნაკლებად ცნობილმა მწერალმა მორგან ენდრიუ რობერტსონმა, რომელიც მცირე პროზით იყო გატაცებული, გამოსცა ნოველა "ამაოება". მასში აღწერილი იყო უზარმაზარი ლაინერის პირველი და უკანასკნელი რეისი. გემს ერქვა "ტიტანი". ნოველის მიხედვით, ეს იყო ყველაზე დიდი ლაინერი, რომელიც კი აქამდე აშენებულა. რობერტსონის "ტიტანი" წარმოადგენდა გემთმშენებლობის შედევრს უზარმაზარი გემბანებით, უმაღლესი კლასის კაიუტებით, ჩაუძირავსა და დაუმარცხებელს, თუმცა...
...აპრილის ერთ ცივ საღამოს ატლანტის ოკეანეში ძალიან დიდი სიჩქარით, 25 კვანძით მიცურავდა "ტიტანი". ირგვლივ სიჩუმე სუფევდა. გემის 3000 მგზავრიდან კატასტროფაზე არავინ ეჭვობდა. უეცრად ლაინერის პირდაპირ, ნისლიდან აისბერგის კონტურები გამოიკვეთა. რამდენიმე წამიც და 45 000-ტონიანი "ტიტანი" ყინულის მთას შეეჯახა. სულ მალე ლაინერი ფსკერისკენ წავიდა...
ლუდოვიკო XVI და 21 რიცხვი
როდესაც საფრანგეთის მეფე ლუდოვიკო XVI ჯერ კიდევ ბავშვი იყო, ასტროლოგმა უთხრა, ფრთხილად ყოფილიყო ყოველი თვის 21 რიცხვში. ამ პროგნოზმა ისე შეაშინა მეფე, რომ ის არაფერს გეგმავდა 21 რიცხვში. საფრანგეთის რევოლუციამ კი მეფე აიძულა, ჩვეულებისთვის ეღალატა. 1791 წლის 21 ივნისს მეფე და დედოფალი ქვეყნიდან გაქცევის მცდელობისას დააპატიმრეს. შემდეგ, იმავე წლის 21 სექტემბერს საფრანგეთი რესპუბლიკად გამოცხადდა. 1793 წლის 21 იანვარს კი მეფე ლუდოვიკო XVI გილიოტინაზე სიკვდილით დასაჯეს.
რიჩარდ ლოურენსი და ენდრიუ ჯექსონი
1935 წელს რიჩარდ ლოურენსი ამერიკის იმჟამინდელ პრეზიდენტს, ენდრიუ ჯექსონს დაესხა თავს. მას თან 2 რევოლვერი ჰქონდა. ერთ-ერთი მათგანი პრეზიდენტს ზურგში დაუმიზნა, მაგრამ როდესაც სასხლეტს გამოკრა ხელი, იარაღმა უმტყუნა. შემდეგ ბოროტმოქმედი ჯექსონს უფრო მიუახლოვდა და პირდაპირ დაუმიზნა მეორე რევოლვერი, თუმცა ამჯერადაც არ გაუმართლა და იარაღი გაეჭედა. სწორედ ამ მომენტში ვაი-მკვლელმა ხალხის ყურადღება მიიქცია და ის დააკავეს. როდესაც პოლიციელებმა იარაღები შეამოწმეს, აღმოჩნდა, რომ ორივე მუშა მდგომარეობაში იყო.
სტალინი და თემურ ლენგის წყევლა
1941 წლის ივნისში სტალინმა ანთროპოლოგების ჯგუფი მიავლინა სამარყანდში, უზბეკეთში. საბჭოთა ანთროპოლოგთა ჯგუფს, რომელსაც მიხეილ გერასიმოვი ხელმძღვანელობდა, სტალინის ბრძანებით თემურ ლენგის საფლავი უნდა გაეხსნა და გამოკვლევა ჩაეტარებინა. არსებული ლეგენდით, ადგილობრივებმა ჯგუფის წევრები გააფრთხილეს, რომ თუ ისინი საფლავს გახსნიდნენ, თავს დიდი უბედურება დაატყდებოდათ, რადგან საფლავზე ეწერა: "რა ჟამს გაიხსნას ჩემი განსასვენებელი, მოიცვას მსოფლიო სისხლიანმა ომმა…" გერასიმოვმა გაფრთხილება არ გაითვალისწინა და 1941 წლის 21 ივნისს საფლავი გახსნა...
1941 წლის 22 ივნისს გერმანია საბჭოთა კავშირს თავს დაესხა. არავინ იცის, ახდა თუ არა თემურ ლენგის წყევლა, ფაქტია, რომ 4 წლის მანძილზე მსოფლიო სისხლისმღვრელმა ომმა მოიცვა...
AMBEBI.GE-სთვის მოამზადა დუდანა ზაქარაიამ
